បណ្ឌិត ជេត ជាលី៖ ភាសាបារាំងសំខាន់​សម្រាប់ប្រទេសយើង តែបច្ចុប្បន្ន​មិនសូវមានអ្នករៀន

អក្សរសាស្រ្តបារាំង ជាជំនាញមួយ ដែលធ្លាប់មានអ្នកចាប់អារម្មណ៍រៀនជាច្រើន កាលពីដើម តែក្រោយមក​កម្រិត​នៃនិសិ្សតមានការធ្លាក់ចុះ ដោយសារមិនសូវមានអ្នកចាប់អារម្មណ៍ និងប្រើប្រាស់ច្រើន ក្រៅពីនិស្សិតនៅ​សាលាតិចណូ និងសាលាពេទ្យ។ ជាការពិត ភាសាបារាំង មានសារៈសំខាន់ណាស់សម្រាប់កម្ពុជា ដោយសារឯកសារ​ជាច្រើន​និយាយអំពីកម្ពុជា ត្រូវបានចងក្រងជាភាសាបារាំង។ នេះជាការបញ្ជាក់របស់លោក បណ្ឌិត ជេត ជាលី សកល​វិទ្យាធិការនៃសកលវិទ្យាល័យភូមិន្ទភ្នំពេញ។

លោកបណ្ឌិត ជេត ជាលី បានលើកឡើងថា បច្ចុប្បន្ននេះ និស្សិតរៀនភាសាបារាំង នៅសកលវិទ្យាល័យភូមិន្ទភ្នំពេញ កំពុងធ្លាក់ចុះ ក្នុងមួយឆ្នាំៗ មានអ្នកសិក្សាជំនាញនេះខ្ទង់ ១០០នាក់ប៉ុណ្ណោះ ពោលគឺ​ស្ទើរតែនិស្សិតអាហារូបករណ៍​ទាំងអស់។

​លោកបណ្ឌិត សង្កត់ធ្ងន់ថា« ភាសាបារាំងជាភាសាសំខាន់ មិនអាចអត់បានទេ សម្រាប់ប្រទេសយើង​ដែលធ្លាប់រស់នៅ​ក្រោម​ការ​ចាត់ចែងរបស់បារាំងជាង ៩០ឆ្នាំ ប្រវត្តិសាស្ត្រខ្មែរច្រើនណាស់ បើមិនចេះអានជាភាសាបារាំង គឺរកមិនបានទេ ប៉ុន្តែយុវជនយើងមើលមិនសូវឃើញសារសំខាន់ ឬក៏គាត់រៀនទៅ ពិបាករកការងារធ្វើ ចំនួននិស្សិតនេះ ធ្លាក់ចុះទៅៗ ខ្ញុំបារម្ភមែនទែន យើងត្រូវធ្វើការជាមួយទូតបារាំង ដើម្បីលើកកម្ពស់ឡើងវិញ»។

លោកបណ្ឌិត ជេត ជាលី ក៏កត់សម្គាល់ឃើញថា បារាំងខ្លួនឯងក៏មានការប្រែប្រួលខ្លះដែរ។«ពីមុនអ្នកដែលរៀនពូកែ គាត់(បារាំង)ធ្លាប់យកទៅស្រុកបារាំងពីរបីខែ ដើម្បីឈ្វេងយល់ពីការប្រើប្រាស់ភាសាបារាំង តែឥឡូវគាត់កាត់គោល​ការណ៍​នេះអស់ហើយ»។

ទន្ទឹមនឹងការធ្លាក់ចុះនិស្សិតរៀនភាសាបារាំងនេះ លោកបណ្ឌិត ជេត ជាលី មើលឃើញថា ភាសាថៃ ជប៉ុន អង់គ្លេស ចិន បច្ចុប្បន្នមាននិស្សិតរៀនច្រើន នៅសកលវិទ្យាល័យភូមិន្ទភ្នំពេញ។

និស្សិតដែលបញ្ចប់ការសិក្សាអក្សរសាស្រ្តបារាំង នឹងទទួលបានចំណេះដឹង ផ្នែកវប្បធម៌ អរិយធម៌ សង្គមសេដ្ឋកិច្ច និងប្រវត្តិសាស្ត្រ ភូមិសាស្រ្តនៃប្រទេសបារាំង, ផ្នែកវិធីសាស្រ្តបង្រៀនភាសាបារាំង, ផ្នែកបកប្រែភាសា​បារាំង-ខ្មែរ និងផ្នែកភាសាបរទេសសម្រាប់ឯកទេសភោជនីយអាហារ សណ្ឋាគារ និងឯកទេសផ្សេងទៀត។

ចំពោះនិសិ្សតបញ្ចប់ការសិក្សាជំនាញនេះ អាចបម្រើការងារដូចជា៖ ជាសាស្រ្តាចារ្យភាសាបារាំងតាមគ្រឹះស្ថាន​សិក្សាអប់រំ, ធ្វើការតាមក្រុមហ៊ុនបកប្រែ ក្រុមហ៊ុនឯកជន ស្ថានទូត ឬអង្គការក្រៅរដ្ឋាភិបាល ឬជាមគ្គុទ្ទេសក៍​ផ្នែកភាសាបារាំង ជាដើម៕