ព័ត៌មានជាតិ

សៀវភៅកវីបណ្ឌិតសម័យអង្គរត្រូវបានដាក់សម្ពោធក្រោយស្រាវជ្រាវអស់ពេល៦ឆ្នាំ

បានផុស

៤ ខែ មុន

នៅ

ថ្ងៃពុធ ៤ កុម្ភៈ ២០២៦

ដោយ

សៀវភៅកវីបណ្ឌិតសម័យអង្គរ៖ ប្រវត្តិ និងស្នាដៃ ដែលជាការចំណាយពេលស្រាវជ្រាវ៦ឆ្នាំរបស់សាស្ត្រាចារ្យនៃសាកលវិទ្យាល័យភូមិន្ទភ្នំពេញ៤រូបគឺលោក ពិ ខាត់ណា លោក វ៉ាន់ វី បណ្ឌិត ឆោម គន្ធា និងបណ្ឌិត អ៊ុន លាង ត្រូវបានដាក់សម្ពោធកាលពីថ្ងៃទី៣ ខែមករា ឆ្នាំ២០២៥ ដែលជាឯកសារដ៏សំខាន់មួយដែលបានបង្ហាញដល់កូនខ្មែរជំនាន់ក្រោយនូវអ្នកប្រាជ្ញខ្មែរដែលបានជួយចក្រភពខ្មែរឱ្យរីកចម្រើននាពេលអតីតកាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅចំពោះមុខសិស្សជាង៧០នាក់ក្នុងទីធ្លាក្នុងបរិវេណនៃបណ្ណាល័យហ៊ុន សែន នៃសាកលវិទ្យាល័យភូមិន្ទភ្នំពេញសាស្ត្រាចារ្យ វ៉ាន វី មានប្រសាសន៍ថាការរីកចម្រើនរបស់កម្ពុជាក្នុងសម័យអង្គរពិតណាស់ត្រូវការធនធានមនុស្សដែលពូកែ ហើយកវីបណ្ឌិតទាំងនេះហើយបានជួយឱ្យចក្រភពខ្មែរបានរុងរឿងនោះ។

លោកថា៖ «ជាទូទៅយើងស្គាល់ព្រះនាមព្រះមហាក្សត្រលោកដឹកនាំប្រទេសហើយលោកចាត់ចែងដឹកនាំអ្វីផ្សេងៗ តែនៅពីក្រោយព្រះមហាក្សត្រនោះគឺក្រុមបណ្ឌិត កវីទាំងឡាយដែលបានរៀនសូត្រចេះដឹងជ្រៅជ្រះ។ ហើយរបៀបសិក្សានោះមានបកស្រាយក្នុងការសិក្សានេះខ្លះដែរ»។

បើតាមលោក វ៉ាន់ វី ឯកសារស្រាវជ្រាវនេះជាការចងក្រងលំអិតពីអ្នកប្រាជ្ញា៥រូបដែលមានកេរ្តិ៍ឈ្មោះលេចធ្លោពីសតវត្សទី៩ ដល់ទី១២។ ក្រៅតែពីប្រវត្តិ និងស្មាដៃ អ្នកស្រាវជ្រាវក៏បានចងក្រងនូវរូបភាពរបស់អ្នកប្រាជ្ញទាំង៥ផងដែរ។

ព្រាហ្មណ៍បណ្ឌិត៥រូបដែលបានស្រាវជ្រាវមកចងក្រងក្នុងសៀវភៅគឺ ព្រាហ្មណ៍ សិវសោម ព្រាហ្មណ៍ យជ្ញរវាហៈ ព្រាហ្មណ៍ សិវាចារ្យ ព្រាហ្មណ៍ ទិវាករបណ្ឌិត និងព្រះនាងឥន្ទទេវី។

សាស្ត្រាចារ្យដែលបានចូលរួមស្រាវជ្រាវសៀវភៅនេះផងដែរលោក ពិ ខាត់ណា មានប្រសាសន៍ថាការស្រាវជ្រាវនេះជាការសម្រេចជោគជ័យដ៏ធំមួយនៃការប៉ុនប៉ងរបស់អ្នកស្រាវជ្រាវខ្មែរសម័យទំនើបនេះ។

លោកថា៖ «មានអ្នកធ្លាប់ប៉ុនប៉ង មិនមែនថាគាត់មិនគិតទេ! គាត់គិតថាត្រូវធ្វើតែអ្វីដែលគាត់ធ្វើសម័យគាត់វានៅត្រឹមតែជាការប៉ុនប៉ង។ ហេតុអ្វីប៉ុនប៉ង? ព្រោះអត់ទាន់មានលទ្ធភាព ធនធានគ្រប់គ្រាន់ដើម្បីធ្វើកិច្ចការហ្នឹងទេ អត់មានធនធានអត់មានគ្នា។ ព្រោះដើម្បីធ្វើបានមិនមែនដេកយល់សប្ដិទេ! ព្រោះយើងត្រូវការពិនិត្យឯកសារសហសម័យដែលជាសិលាចារឹក ជាប្រភពឯកសារតែមួយគត់ដែលយើងជឿទុកចិត្ត»។

ដើម្បីបានសៀវភៅមួយក្បាលនេះអ្នកស្រាវជ្រាវបានចំណាយពេលសិក្សាស្រាវជ្រាវទាំងលើឯកសាររបស់អ្នកស្រាវជ្រាវពីមុនដូចជាហ្សកហ្សីដែស ឌុយប៉ុងត៍ បណ្ឌិត ពៅ សាវរស ផ្ទៀងផ្ទាត់ជាមួយសិលាចារិក ព្រមទាំងពិនិត្យលើឯកសារសិលាចារឹកភាសាចាមថែមទៀតផង។ សៀវភៅនេះមានកម្រាស់១៧៦ទំព័រ និងត្រូវបានបោះពុម្ពដោយសាកលវិទ្យាល័យភូមិន្ទភ្នំពេញ។

និស្សិតឆ្នាំទី៣ ផ្នែកប្រវត្តិវិទ្យានៃសាកលវិទ្យាល័យភូមិន្ទភ្នំពេញលោក រស់ សានីឧត្តម បានបង្ហាញអារម្មណ៍សប្បាយចិត្តចំពោះសៀវភៅស្រាវជ្រាវថ្មីនេះដែលបានឱ្យកូនចៅខ្មែរបានស្គាល់បុព្វបុរស អ្នកប្រាជ្ញរបស់ខ្លួន និងបានស្វែងយល់ពីគំនិតអ្នកប្រាជ្ញាទាំងនោះ។

លោកថា៖ «សៀវភៅនេះល្អមែនទែនដែលយើងបានលើកយកអំពីស្នាដៃរបស់គាត់(អ្នកប្រាជ្ញ)ចងក្រងឡើងដើម្បីទុកឱ្យកូនចៅជំនាន់ក្រោយបានសិក្សាបន្ត និងស្វែងយល់ពីគំនិតដែលអ្នកប្រាជ្ញសរសេរហ្នឹងដើម្បីយកអភិវឌ្ឍន៍នាពេលបច្ចុប្បន្ន»។

សាកលវិទ្យាធិការសាកលវិទ្យាល័យភូមិន្ទភ្នំពេញលោក ជេត ជាលី មានប្រសាសន៍ក្នុងពិធីសម្ពោធនោះដោយបានថ្លែងអំណរគុណដល់ក្រុមអ្នកស្រាវជ្រាវ និងចាត់ទុកសៀវភៅនេះជាការស្រាវជ្រាវដែលមានគុណប្រយោជន៍ ហើយទិន្នន័យដែលបានចុះក្នុងសៀវភៅនឹងបានជាការត្រួសត្រាយផ្លូវសម្រាប់អ្នកស្រាវជ្រាវបន្តទៅមុខទៀត។

លោកថា៖ «ខ្ញុំជឿថាសៀវភៅនេះដែលប្អូននឹងអានឃើញមានអ្នកប្រាជ្ញប៉ុន្មាននាក់ដែលមានមិនជាលំអិតដែរ អ៊ីចឹងជាជំហានទី១យើងរកបានប៉ុនហ្នឹង។ ប៉ុន្ដែគិតថាទៅថ្ងៃក្រោយទៀតបើលោកគ្រូអ្នកគ្រូ ដែលសរសេរនេះចាស់ៗអស់ទៅប្រហែលជាមានតែក្រុមប្អូនឯងហ្នឹងហើយដែលត្រូវបន្តស្រាវជ្រាវឱ្យមានអ្នកប្រាជ្ញាមានអីនឹងគេនឹងឯងកុំឱ្យប្រទេសមួយគ្មានអ្នកប្រាជ្ញមួយសោះ»។

សៀវភៅនេះបានចាប់ផ្ដើមចែកចាយលក់លើទីផ្សារហើយដោយក្នុងមួយក្បាលតម្លៃ១០ដុល្លារ ដោយឡែកចំពោះនិស្សិតសាកលវិទ្យាល័យភូមិន្ទភ្នំពេញទទួលបានការបញ្ចុះតម្លៃ៥០%។ ក្នុងអារម្ភកថា

រដ្ឋមន្ត្រីអប់រំលោក ហង់ជួន ណារ៉ុន បានបង្ហាញជំនឿចិត្តថាសៀវភៅនេះនឹងក្លាយជាឯកសារដ៏សំខាន់មួយសម្រាប់និស្សិត គ្រូបង្រៀន អ្នកស្រាវជ្រាវ និងសាធារណជនទូទៅ ដែលមានបំណងចង់ស្វែងយល់ឱ្យកាន់តែច្បាស់អំពីភាពប៉ិនប្រសប់ខាងបញ្ញាញាណរបស់បុព្វបុរសខ្មែរ នៅសម័យមហានគរ។ ការយល់ដឹងអំពីស្នាដៃរបស់អស់លោកទាំងនេះគឺមិនត្រឹមតែជាការគោរពចំពោះអតីតកាលប៉ុណ្ណោះទេ តែជាការបណ្ដុះស្មារតីស្នេហាជាតិ និងមោទនភាពលើអត្តសញ្ញាណខ្មែរផងដែរ៕