សាកលវិទ្យាល័យភូមិន្ទភ្នំពេញ រៀបចំប្រកួតប្រលោមលោកខ្នាតខ្លីពី “សង្គ្រាម និងសន្តិភាព” សម្រាប់និស្សិតកំពុងរៀនទីនោះ

នៅរសៀលថ្ងៃទី១៥ ខែកញ្ញា ឆ្នាំ២០២៥ ទំព័រហ្វេសប៊ុករបស់សាកលវិទ្យាល័យភូមិន្ទភ្នំពេញ បានប្រកាសពីកម្មវិធីប្រកួតប្រជែងសំណេរប្រលោមលោកខ្នាតខ្លី ក្រោមប្រធានបទ “សង្គ្រាម និងសន្តិភាព” ដើម្បីជាការលើកកម្ពស់វិស័យអក្សរសិល្ប៍នៅកម្ពុជា និងឱ្យយុវជនកម្ពុជាស្វែងយល់ពីការឈ្លានពានរបស់ថៃ លើទឹកដីកម្ពុជា។

ការប្រកួតនេះ រៀបចំដោយ ដេប៉ាតឺម៉ង់អក្សរសាស្រ្តខ្មែរ ភាសាវិទ្យា និងប្រវត្តិវិទ្យា មហាវិទ្យាល័យសង្គមសាស្រ្ត-មនុស្សសាស្រ្តនៃសាកលវិទ្យាល័យភូមិន្ទភ្នំពេញ។ ក្រៅពីចូលរួមលើកកម្ពស់អក្សរសិល្ប៍នៅកម្ពុជា កម្មវិធីប្រកួតប្រជែងសំណេរប្រលោមលោកខ្នាតខ្លី នេះ មានបំណងចង់ឱ្យយុវជនខ្មែរ ស្វែងយល់ពីវិនាសសកម្មនៃការឈ្លានពានរបស់ថៃ លើទឹកដីកម្ពុជា ភាពក្លាហានរបស់កងទ័ពកម្ពុជាក្នុងការការពារដែនអធិបតេយ្យភាពរបស់ខ្លួន សាមគ្គីភាពជាធ្លុងមួយរបស់ប្រជាជាតិខ្មែរ និងមនោសញ្ចេតនាស្នេហាជាតិ និងតម្លៃនៃសន្តិភាព។

ចំពោះលក្ខខណ្ឌនៃការចូលរួមប្រកួត បេក្ខជនត្រូវតែជានិស្សិតដែលកំពុងសិក្សានៅសាកលវិទ្យាល័យភូមិន្ទភ្នំពេញ។ អត្ថបទដាក់ប្រកួតជាភាសាខ្មែរ ( Microsoft word & PDF), ចំណងជើង ពុម្ពអក្សរ Khmer OS Muol Light ទំហំ ១២ pt, ខ្លឹមសារប្រលោមលោក តម្រូវឱ្យដាក់ពុម្ពអក្សរ Khmer OS Siemreap ទំហំ ១២pt ចំណែកចំនួនទំព័រចន្លោះពី ៤០ ទៅ៥០ទំព័រ។

សូមជម្រាបថា ម្ចាស់ជ័យលាភីលេខ១ ក្នុងការប្រកួតប្រជែងនេះ នឹងទទួលបានប្រាក់រង្វាន់ចំនួន ៤លានរៀល, ជ័យលាភីលេខ២ ទទួលបាន ៣លានរៀល, ជ័យលាភីលេខ៣ ទទួលបាន ២លានរៀល និងអ្នកបានលេខ៤ លេខ៥ ទទួលបានរង្វាន់លួងចិត្ត ២សែនរៀល។ ផុតកំណត់ទទួលពាក្យចាប់ពីថ្ងៃផ្សាយដំណឹង ដល់ថ្ងៃទី៣០ ខែធ្នូ ឆ្នាំ២០២៥ មុនម៉ោង ៥រសៀល៕