សម្លាប់​រួច​ដឹក​សព​យក​ទៅ​ចង​ក​​បង្វែង​ដាន សមត្ថកិច្ច​​បង្ហាញ​អត្តសញ្ញាណជន​រងគ្រោះ

ខេត្តបន្ទាយមានជ័យ៖ លោកវរសេនីយ៍ឯកជា ស្លូញ អធិការនគរបាលស្រុកស្វាយចេក បានប្រាប់អ្នកយកព័ត៍មានឲ្យដឹងថា យុវជនដែលប្រទះស្លាប់នៅក្នុងខ្ទមចំការដំឡូងមីនោះ ត្រូវបានគេស្គាល់អត្តសញ្ញាណគឺ ឈ្មោះ ស៊ុន សាន អាយុ៣៥ឆ្នាំ នៅភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។

ចំពោះការស្លាប់របស់យុវជនម្នាក់នេះ គឺជាករណីមនុស្សឃាត មិនមែនជាអំពើធ្វើអត្តឃាតនោះទេ។

លោកអធិការបានបញ្ជាក់ថា នៅវេលាម៉ោង៦.៣០នាទីព្រឹក ថ្ងៃទី៣០ ខែ ធ្នូ ឆ្នាំ ២០២០ មានប្រជាពលរដ្ឋប្រទះឃើញសពយុវជនម្នាក់ស្លាប់ដោយធ្វើអត្តឃាត ខាងលិចផ្លូវជាតិលេខ៥៨ ប្រហែល២០ម៉ែត្រនៅ នៅខាងត្បូងភូមិចំការគរប្រហែល៥០០ម៉ែត្រ ក្នុងខ្ទមចំការដំឡូងមីមួយកន្លែងរបស់ ឈ្មោះឈុន ភ្លុក ភេទប្រុស អាយុ៤៩ឆ្នាំ ស្ថិតក្នុងភូមិចំការគរ ឃុំស្វាយចេក ស្រុកស្វាយចេក ខេត្តបន្ទាយមានជ័យ។

លោកអធិការបានបញ្ជាក់ថា ឆ្លងតាមការត្រួតពិនិត្យក្រុមការងារ បានរកឃើញស្លាកស្នាមរបួសនៅលើក្បាល លើស្មងជើងទាំងសងខាង ហើយមិនមានចេញទឹកកាមនិងលៀនអណ្តាតនោះឡើយ។ តាមការសន្និដ្ឋានរបស់ក្រុមការងារ សង្ស័យជនរងគ្រោះត្រូវគេសម្លាប់នៅកន្លែងផ្សេង ហើយយកសពមកចងព្យួរនៅ​ខ្ទមចម្ការ​ ជាមួយនឹងខ្សែពានគោយន្តកន្ត្រៃ។

ប្រភព​ពី​ក្រុម​គ្រួសារ​ជន​រងគ្រោះ​បានផ្តល់ព័ត៌មានមកសមត្ថកិច្ចថា ជនរងគ្រោះឈ្មោះ ស៊ុន សាន ភេទប្រុសអាយុ៣៥ឆ្នាំ នៅភូមិសែសិន សង្កាត់អូរអំបិល ក្រុងសិរីសោភ័ណ ជាមនុស្សខូចសរសៃប្រាសាទ ធ្លាប់ដើរចូលផ្ទះគេផ្ទះឯង ហើយក៏ធ្លាប់ជាប់ពន្ធនាគារពាក់ព័ន្ធករណីគ្រឿងញៀនទើបចេញពីពន្ធនា​គារ​ផងដែរ។

សពជនរងគ្រោះត្រូវបានក្រុមគ្រួសាររៀបចំបូជានៅវត្តចំការគ ស្ថិតក្នុងភូមិចំការគ ឃុំស្វាយចេក ។ទាក់ទិននឹងករណីស្លាប់របស់ជនរងគ្រោះឈ្មោះស៊ុន សាន នេះ លោកអធិការនរបាលស្រុកស្វាយចេក បានបញ្ជាក់ទៀតថានគរបាលជំនាញកំពុងយកចិត្តទុកដាក់ស្រាវជ្រាវរកជនដៃដល់ដែលប្រព្រឹត្តទៅលើជនរងគ្រោះ ដើម្បីយកមកផ្តន្ទាទោសច្បាប់៕

អត្ថបទ៖ វ៉ាន់ ណាង