ក្រុមហ៊ុន រុករកមាស​មួយ​នៅខេត្តក្រចេះ គ្រោងផលិតមាស​ឲ្យ​បាន២០គីឡូក្នុងមួយខែ

ក្រុមហ៊ុន រុករកមាស Xing Yuan Kanng Yeak Co., Ltd ដែល​ទទួលបានអាជ្ញាប័ណ្ណពី​ក្រសួងរ៉ែ និងថាមពល​គ្រោងផលិតមាស​ឲ្យ​បាន២០គីឡូនៅក្នុងមួយខែ ដែលគិត​ដល់ខែធ្នូឆ្នាំ២០២២ខាងមុខនេះ គ្រោងផលិតមាស​ឲ្យបាន៦០គីឡូ។ នេះ​បើ​យោងតាមប្រសាសន៍របស់លោក ស៊ុយ សែម រដ្ឋមន្ត្រីក្រសួងរ៉ែ និង​ ថាមពល នៅក្នុងឱកាសដែល​លោកបាន​អញ្ជើញ​ជា​អធិបតី​ក្នុង​ដំណើរការ​កត់ត្រា​ទិន្នន័យ​ស្ល​រ៉ែ​មាស​លើក​ទី​១ របស់​ក្រុមហ៊ុន Xing Yuan Kanng Yeak Co., Ltd ដោយមាន​ការចូលរួម​ពី​លោក វ៉ា ថន អភិបាល នៃ​គណៈ​អភិបាលខេត្ត​ក្រចេះ ថ្នាក់ដឹកនាំ​ក្រសួង និង​មន្ត្រី​ជំនាញ​ពាក់ព័ន្ធ​ជាច្រើនរូប​។

សូម​ជម្រាបជូន​ថា នៅ​ព្រឹក​ថ្ងៃទី​១០ ខែតុលា ឆ្នាំ​២០២២ នេះ ក្រុមហ៊ុន Xing Yuan Kanng Yeak Co., Ltd បាន​បើក​ដំណើរការ​កត់ត្រា​ទិន្នន័យ​ស្ល​រ៉ែ​មាស​លើក​ទី​១ របស់ខ្លួន ដែល​ក្នុង​នោះបាន​កត់ត្រា​ថ្លឹង​កំហាប់​រ៉ែ​មាស (Gold Concentrates) មាន​ទម្ងន់ ៧ ៨៤៩ ក្រាម និង​បាន​យក​កំហាប់​រ៉ែ​មាស​នោះ​ទៅ​ស្ល និង​ចាក់ចេញ​ជា​ដុំ​មាស (Gold Doré) បាន​ចំនួន ០៧​ដុំ មាន​ទម្ងន់​សរុប ៨ ២១២,២៧ ក្រាម ដែលមាន​អត្រា​ភាព​សុទ្ធ ៩៩.៩% ។

តាម​គម្រោង​សាកល្បង ៣​ខែ ដំបូង ក្រុមហ៊ុន​គ្រោង​ផលិត​ឱ្យបាន ២០​គីឡូក្រាម​ក្នុង​មួយខែ ដែល​គិត​ត្រឹម​ខែធ្នូ ឆ្នាំ​២០២២ ខាងមុខនេះ ក្រុមហ៊ុន​គ្រោង​ផលិត​ឱ្យបាន ចំនួន ៦០​គីឡូក្រាម​។​

​ក្រុមហ៊ុន Xing Yuan Kanng Yeak Co., Ltd ទទួលបាន​អាជ្ញា​ប័ណ្ណ​ឧស្សាហកម្ម​អាជីវកម្ម​រ៉ែ​មាស ពី​ក្រសួង​រ៉ែ​និង​ថាមពល កាលពី​ខែសីហា ឆ្នាំ​២០១៨ លើ​ទំហំ​ដី​ចំនួន ២៨ គីឡូម៉ែត្រ​ក្រឡា ដើម្បី​ប្រតិបត្តិការ​អាជីវកម្ម​រ៉ែ​មាស​របស់ខ្លួន​នៅ​ស្រុក​សំបូរ ខេត្តក្រចេះ​។ ក្រោយពី​ទទួលបាន​អាជ្ញា​ប័ណ្ណ ក្រុមហ៊ុន​បាន​ដំឡើង​ខ្សែសង្វាក់​ផលិតកម្ម​អាជីវកម្ម​របស់​ខ្លួន តែដោយសារ​តែ​បញ្ហា​កូ​វីដ​១៩ ក្រុមហ៊ុន​ទើបតែ​បានបញ្ចប់​ការសាងសង់ និង​រៀបចំ​ខ្សែសង្វាក់​ផលិតកម្ម​របស់ខ្លួន​នៅក្នុង​ខែតុលា ឆ្នាំ​២០២២ នេះ៕