ព័ត៌មានជាតិ

ផ្លូវមួយខ្សែក្នុងឃុំអូរដា ផ្អាកការធ្វើចរាចរ ដោយសារទឹកច្រោះដាច់ក្បាលស្ពាន

បានផុស

៤ years មុន

នៅ

ថ្ងៃព្រហស្បតិ៍ ១៣ តុលា ២០២២

ដោយ

ផ្លូវមួយខ្សែក្នុងស្រុកកំរៀង ស្ថិតក្បែរព្រំដែនថៃ ត្រូវបានខូចខាតទាំងស្រុង នៅព្រឹកថ្ងៃទី ១៣ តុលានេះ រថយន្តផ្អាកការធ្វើចរាចរឆ្លងកាត់ ហើយម៉ូតូក៏ពិបាកចរាចរដែរ ដោយសារទឹកជំនន់ហក់ឡើងខ្លាំង លិចដល់ជាងពាក់កណ្ដាល នៃបង្កាន់ដៃស្ពាន ច្រោះដាច់ដីក្បាលស្ពានទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា កាលពីប៉ុន្មានថ្ងៃចុងក្រោយនេះ ទឹកតាមអូរព្រំដែនថៃ ជន់ឡើងយ៉ាងខ្លាំង បណ្ដាលឲ្យលិចលង់ផលដំណាំប្រជាពលរដ្ឋ និងផ្លូវថ្នល់មួយចំនួនត្រូវខូចខាតទាំងស្រុង ពិសេសធ្វើឲ្យស្ទះចរាចរមិនអាចឆ្លងកាត់បានឡើយសម្រាប់ច្រកអន្តរជាតិដូង។

លុះព្រឹកថ្ងៃទី ១១ ខែតុលា ឆ្នាំ ២០២២ កន្លងទៅថ្មីៗនេះ សន្ទុះទឹកក្នុងអូរព្រំដែន បានបែកមកដល់ភូមិមួយចំនួន ក្នុងស្រុកកំរៀង ពិសេសឃុំអូរដា តែម្ដង។ សន្ទុះទឹក បានជន់លិចដល់បង្កាន់ដៃស្ពានក្នុងភូមិលំផាត់ តម្រូវឲ្យអាជ្ញាធរបិទផ្អាកការធ្វើចរាចរបណ្ដោះអាសន្ន រង់ចាំទឹកស្រកវិញសិន ព្រោះខ្លាចជួបឧបទ្ទវហេតុណាមួយដែលយើងមើលមិនឃើញ។

ផ្លូវមួយខ្សែឆ្លងកាត់ស្ពានលំផាត់នេះ ក៏ជាផ្លូវដ៏មានសារៈសំខាន់ដែរ ដែលផ្សារភ្ជាប់ទៅកាន់ភូមិសំរោង និងភូមិតាំងយូរ ជាដើម ក្នុងការដឹកនាំកសិផលរបស់ប្រជាពលរដ្ឋមកកាន់ផ្លូវជាតិ និងទីផ្សារព្រំដែន។

មកទល់នឹងព្រឹកថ្ងៃទី ១៣ តុលានេះ បើតាមប្រភពពីប្រជាពលរដ្ឋបានបញ្ជាក់ថា ទឹកមានការស្រកចុះផុតស្ពានហើយ។ ដោយឡែកក្បាលស្ពានទាំងសងខាង ក៏មានការខូចខាតយ៉ាងធ្ងន់ធ្ងរដែរ ដោយសារតែកម្លាំងទឹកច្រោះ នាំយកដីក្បាលស្ពានទៅជាមួយ ហើយបច្ចុប្បន្នមិនទាន់មានអង្គភាពជំនាញ ឬក៏ខាងអាជ្ញាធរ ឃុំ ស្រុក ចុះទៅពិនិត្យ ដើម្បីធ្វើការជួសជុលជាបណ្ដោះអាសន្ននៅឡើយទេ។ ហេតុដូច្នេះហើយ បានជាប្រជាពលរដ្ឋនាំគ្នាយកដុំថ្មមកតម្រៀបនៅក្បាលស្ពាន ទុកគ្រាន់ឲ្យម៉ូតូពួកគាត់បានឆ្លងកាត់ទាំងលំបាក៕

អត្ថបទ ៖ សោ និយមរ័ត្ន