សម្ដេចតេជោ ហ៊ុន សែន ទទួលជួបពិភាក្សាជាមួយគណៈប្រតិភូរដ្ឋមន្ត្រីសហគមន៍ សង្គម និងវប្បធម៌អាស៊ាន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ បានលើកទឹកចិត្តឲ្យគណៈប្រតិភូអាស៊ានទាំងអស់ ដែលចូលរួមកិច្ចប្រជុំក្រុមប្រឹក្សាសហគមន៍ សង្គម វប្បធម៌អាស៊ានលើកទី ២៨ នាពេលនេះ ខិតខំធ្វើយ៉ាងណាឲ្យកិច្ចប្រជុំទទួលបានលទ្ធផលជាផ្លែផ្កា។

ការលើកទឹកចិត្តនេះ គ្រាដែលសម្ដេចតេជោ ហ៊ុន សែន នៅព្រឹកថ្ងៃទី ១៣ ខែតុលា ឆ្នាំ ២០២២ បានទទួលជួបពិភាក្សាជាមួយគណៈប្រតិភូរដ្ឋមន្ត្រី សហគមន៍ សង្គម និងវប្បធម៌អាស៊ាន ដែលដឹកនាំដោយរដ្ឋមន្ត្រីក្រសួងវប្បធម៌ យុវជន និងកីឡា នៃប្រទេសព្រុយណេ។

នៅក្នុងឱកាសនោះ សម្ដេចតេជោ ហ៊ុន សែន បាន​ស្វាគមន៍ និងថ្លែងអំណរគុណដល់គណៈប្រតិភូទាំងអស់ ដែលបានអញ្ជើញមកចូលរួមដោយផ្ទាល់ ក្នុងកិច្ចប្រជុំក្រុមប្រឹក្សាសហគមន៍ សង្គម វប្បធម៌អាស៊ានលើកទី ២៨ នៅក្នុប្រទេសកម្ពុជានាពេលនេះ។

សម្ដេចតេជោ បានបន្តថា អាស៊ាន សរសស្តម្ភចំនួន ៣ គឺទី១. សរសស្តម្ភ សន្តិសុខនយោបាយ, ទី២. សរសស្តម្ភ សហគមន៍សេដ្ឋកិច្ច, និងទី៣. សរសស្តម្ភ សហគមន៍ វប្បធម៌។ សម្រាប់សរសស្តម្ភទី៣នេះ គឺសមាជិកអាស៊ានទាំងអស់ បាននិងកំពុងចូលរួមប្រជុំនាពេលនេះ ដោយសរសស្តម្ភនេះ គឺពិតជាមានសារៈសំខាន់ខ្លាំងណាស់។

ក្នុងន័យនេះ សម្ដេចតេជោ ហ៊ុន សែន បានលើកទឹកចិត្តឲ្យគណៈប្រតិភូទាំងអស់ ប្រឹងប្រែងធ្វើយ៉ាងណាពង្រឹងកិច្ចសហប្រតិបត្តិការ ហើយធ្វើយ៉ាងណាឲ្យកិច្ចប្រជុំក្រុមប្រឹក្សាសហគមន៍ សង្គម វប្បធម៌អាស៊ានលើកទី ២៨ នាពេលនេះ ឲ្យទទួលបានលទ្ធផលជាផ្លែផ្កា៕