សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសជាថ្មីនូវការប្ដូរផ្ដាច់កម្ចាត់ចោលនូវមនោគមន៍វិជ្ជាជ្រុលនិយម នៃជនក្បត់ជាតិ ៣ជំនាន់ ហើយវិធីកម្ចាត់នោះ គឺឲ្យអ្នកទាំងឡាយដែលនៅក្បែរខ្លួនបុគ្គលនោះ ចាកចេញជាបន្តបន្ទាប់។

សម្តេចតេជោ ហ៊ុន សែន បានថ្លែងក្នុងពិធីសំណេះសំណាល ជាមួយប្រជាពលរដ្ឋជាច្រើនគ្រួសារបន្ថែមទៀត ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ស្ថិតក្រោមការគ្រប់គ្រងរបស់អាជ្ញាធរជាតិអប្សរា មករស់នៅតំបន់អភិវឌ្ឍន៍ថ្មី រុនតាឯក នាព្រឹកថ្ងៃទី ២១ ខែតុលានេះថា សម្ដេច នឹងប្ដូរផ្ដាច់កម្ចាត់ចោលនូវមនោគមន៍វិជ្ជាជ្រុលនិយម នៃជនក្បត់ជាតិ ៣ជំនាន់ ដើម្បីសុខសន្តិភាពរបស់ប្រទេសជាតិ និងប្រជាពលរដ្ឋ ហើយមានបុគ្គលតែម្នាក់ប៉ុណ្ណោះ ដែលត្រូវកម្ចាត់។

សម្ដេចតេជោ ហ៊ុន សែន មិនបានថ្លែងឲ្យចំឈ្មោះនោះទេ តែគេអាចដឹងថា ចង់សំដៅទៅលើលោក សម រង្ស៊ី អតីតមេបក្សប្រឆាំង ដែលជាទណ្ឌិតកំពុងរត់គេចខ្លួននៅក្រៅប្រទេស។ សម្ដេចតេជោ ហ៊ុន សែន បានថ្លែងទៀតថា «ដរាបណា អ្នកឯងមិនព្រមប្រកាសរំសាយចោល នូវនយោបាយមានឯងអត់អាញ់ ហើយធ្វើការសុំទោសថ្លែងជូនប្រជាពលរដ្ឋថា ចាប់ពីពេលនេះតទៅខ្ញុំបញ្ឈប់នូវនយោបាយផ្ដួលរំលំរដ្ឋាភិបាល គឺដរាបនោះ យើងត្រូវតែកម្ចាត់ ហើយវិធីកម្ចាត់នោះវាងាយទេ គឺបានសេចក្ដីថា ផ្ដាច់ខ្លួនចេញពីអ្នកហ្នឹងមក រាប់ទាំងអាចអ្នកទៅជាមួយមេហ្នឹងៗ»។

ជាមួយគ្នានេះ សម្ដេចតេជោ ហ៊ុន សែន ក៏បានបញ្ជាក់ជាថ្មីថា គណបក្សនយោបាយ ដែលភ្ជាប់ខ្លួនជាមួយអតីតមេបក្សប្រឆាំងរូបនេះ នឹងត្រូវប្ដឹងទៅតុលាការរំលាយគណបក្សនោះចោល តែម្ដង៕

អត្ថបទ៖ ឃួន សុភ័ក្រ