ដឹងទេ “វ៉ាក់សាំងឆ្កែឆ្កួត” ប្រសិនជាចាក់មិនគ្រប់ចំនួនតាមការកំណត់ទេ គ្មានអង់ទីគ័រការពារឡើយ!

ជំងឺឆ្កែឆ្កួត គឺជាជំងឺដ៏កាចសាហាវមួយ អាចធ្វើឱ្យប៉ះពាល់ដល់អាយុជីវិតរបស់មនុស្សក្រោយពីត្រូវបានឆ្កែ ឬ ឆ្មាដែលផ្ទុកវីរុសនោះខាំ ។ អ្នកត្រូវរកវិធីសាស្ត្រព្យាបាល ឬ ចាក់ថ្នាំជាប​ន្ទាន់ ប្រសិនជាត្រូវបានសត្វទាំងនោះខាំ ជាពិសេស ត្រូវចាក់ឱ្យបានទៀងទាត់តាមការកំណត់របស់គ្រូពេទ្យ មិនដូច្នេះទេ អ្នកនឹងគ្មានអង់ទីគ័រការពារជំងឺនេះឡើយ។

​

ប្រសិនជាអ្នកត្រូវបានសត្វឆ្កែ ឬ ឆ្មាដែលផ្ទុកមេរោគឆ្កែឆ្កួតខាំ អ្នកត្រូវប្រញាប់លាងរបួសដោយខ្លួនឯងជាមួយសាប៊ូនឹងទឹកឱ្យបានស្អាត។ បន្ទាប់មក ត្រូវលាងរបួសជាមួយនឹងទឹកអាកុលដើម្បីកម្ចាត់មេរោគ និងលាបថ្នាំបេតាឌីន ដាច់ខាតកុំរុំរបួស ឬ ដេររបួសដែលត្រូវបានឆ្កែខាំ។ ក្រោយពីលាងសម្អាតដោយខ្លួនឯងហើយ អ្នកត្រូវប្រញាប់ទៅចាក់ថ្នាំវ៉ាក់សាំងឆ្កែឆ្កួតជាបន្ទាន់ នៅវិទ្យាស្ថានប៉ាស្ទ័រ ស្ថិតនៅលើផ្លូវព្រះមុនីវង្ស ជាប់មន្ទីរពេទ្យកាល់ម៉ែត្រ និងវិទ្យាស្ថានជាតិសុខភាពសាធារណៈ នៅខណ្ឌទួលគោក។ អ្នកក៏អាចចាក់ថ្នាំឆ្កែឆ្កួតនេះនៅតាសមគ្លីនិចឯកជនមួយចំនួនផងដែរ។

ដោយឡែក ចំពោះការចាក់ថ្នាំឆ្កែឆ្កួតនៅវិទ្យាស្ថានប៉ាស្ទ័រ លោកអ្នកចំណាយប្រាក់ត្រឹមតែ ១៥ដុល្លារ ឬ ៦៣,០០០៛ ប៉ុណ្ណោះ ហើយតម្រូវឱ្យចាក់រយៈពេលបីដង តាមការកំណត់របស់គ្រូពេទ្យ គឺរយៈពេល៤ថ្ងៃចាក់ម្តង។ ជាមួយនឹងការចាក់ថ្នាំឆ្កែឆ្កួតនេះ គ្រូពេទ្យនៅវិទ្យាស្ថានប៉ាស្ទ័របាននិយាយថា មនុស្សដែលត្រូវសត្វខាំ ត្រូវចាក់តាមការកំណត់របស់គ្រូពេទ្យ ៣ដង មិនដូច្នេះទេ ថ្នាំដែលបានចាក់ទៅនោះ នឹងមិនដុះអង់ទីគ័រការពារមេរោគឡើយ។

បើតាមរបាយការណ៍របស់អង្គការ Animal Rescue Cambodia ចេញនៅខែកញ្ញា ឆ្នាំ២០២២ បានបញ្ជាក់ថា ជារៀងរាល់ឆ្នាំ នៅវិទ្យាស្ថានប៉ាស្ទ័រ បានចាក់វ៉ាក់សាំងការពារជំងឺឆ្កែឆ្កួតដល់ប្រជាជន ប្រហែល ២១,០០០នាក់។

សូមជម្រាបថា ដើម្បីអាចជៀសវាងពីជំងឺឆ្កែឆ្កួត មនុស្សត្រូវចាក់ថ្នាំបង្ការឆ្កែឆ្កួតមុនត្រូវឆ្កែខាំ រីឯ សត្វឆ្កែ ឬ ឆ្មា ក៏ដូចគ្នាដែរ ម្ចាស់ត្រូវយកចិត្តទុកដាក់ជាមួយពួកវា ព្យាយាមចាក់វ៉ាក់សាំងការពារដល់សត្វទាំងនោះឱ្យបានទៀតទាត់ផងដែរ។ ជាមួយគ្នានេះ រយៈពេល៦ឆ្នាំចុងក្រោយ អង្គការ Animal Rescue Cambodia  បានចាក់វ៉ាក់សាំងការពារជំងឺឆ្កែឆ្កួត និងជំងឺទូទៅដល់សត្វឆ្កែ និងឆ្មាអនាថា ឬនៅក្នុងសហគមន៍ក្រីក្រ ប្រមាណ ១៥,៣០០ ដូស៕

ដោយ៖ អុន ស្រីមាន