ត្រាំ ឆ្លើយតបទៅ ហ្សេលេនស្គី៖ «រឿងដាក់ទណ្ឌកម្មរុស្ស៊ីឬមិនដាក់ ខ្ញុំជាអ្នកសម្រេច មិនមែនអ្នកផ្សេងទេ»

ថ្លែងប្រាប់អ្នកសារព័ត៌មានកាលពីថ្ងៃពុធទី២១ខែឧសភាឆ្នាំ២០២៥ ពាក់ព័ន្ធការអំពាវនាវរបស់មេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី ឲ្យទីក្រុងវ៉ាស៊ីនតោន ដាក់ទណ្ឌកម្មកាន់តែតឹងរ៉ឹងលើរុស្ស៊ី, ប្រធានាធិបតីអាមេរិក ដូណាល់ ត្រាំ និយាយថា រឿងដាក់ទណ្ឌកម្មឬមិនដាក់ លោកជាអ្នកសម្រេច មិនមែនអ្នកផ្សេងទេ!

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុននេះលោកហ្សេលេនស្គី បានអំពាវនាវឲ្យអាមេរិក ដាក់ទណ្ឌកម្មបន្ថែមទៀតរឹតតែខ្លាំងទីក្រុងមូស្គូ ព្រោះតែរុស្ស៊ីហាក់មិនខ្វាយខ្វល់ចំពោះការចរចាសន្តិភាពសោះ។

យ៉ាងណា ឆ្លើយសំណួរអ្នកសារព័ត៌មានជុំវិញរឿងនេះ លោកត្រាំនិយាយថា «មានតែខ្ញុំម្នាក់គត់ដែលជាអ្នកសម្រេចលើរឿងនេះ។ យើងនឹងឃើញថាតើរុស្ស៊ីធ្វើចរិតបែបណា ហើយយើងនឹងឃើញអ្វីកើតឡើង។ ឥឡូវយើងកំពុងស្ថិតក្នុងពេលវេលាដ៏សំខាន់»។

ពាក់ព័ន្ធរឿងទណ្ឌកម្មនេះដែរ កាលពីថ្ងៃ​ចន្ទ លោកត្រាំប្រកាសហើយថា លោកនឹងមិនដាក់ទណ្ឌកម្មថ្មីលើរុស្ស៊ីឡើយ ដោយសង្កត់ធ្ងន់ទៅលើសារៈសំខាន់នៃការសម្របសម្រួលកិច្ច​ចរចាសន្តិភាពរវាងទីក្រុងកៀវនិងមូស្គូ​ជាមុន​សិន។

ការសម្រេចចិត្ត​របស់លោក ត្រាំ ធ្វើឡើងបន្ទាប់ពីមានការសន្ទនាតាមទូរសព្ទរយៈពេលពីរម៉ោងជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន ក្នុងអំឡុងពេលដែលមេដឹកនាំទាំងពីរបានយល់ព្រមផ្តួចផ្តើមការពិភាក្សាបទឈប់បាញ់ភ្លាមៗ។

លោក ត្រាំ បាន​បង្ហាញ​ការ​ជឿជាក់ថា វា​មានឱកាសសម្រាប់វឌ្ឍនភាពក្នុងការចរចា ហើយ​​លោក​ក៏​ជឿ​ដែរ​ថា លោក ពូទីន ពិត​ចង់បញ្ចប់សង្រ្គាមនៅអ៊ុយក្រែ​ន​មែន។ ក្នុងពេលជាមួយគ្នានោះ លោក ត្រាំ បានអះអាង​ថា ​នឹង​ដក​ខ្លួន​ចេញ​ពី​កិច្ច​ចរចា ប្រសិន​បើ​យល់ថា ​លោក​មិន​អាច​ជួយ​អ្វី​បាន​ថែម​ទៀត​នៅ​ក្នុង​ដំណើរ​ការ​បញ្ចប់​ជម្លោះ​រវាង​រុស្ស៊ី​-អ៊ុយក្រែន។

សូមបញ្ជាក់ថា ប្រទេសលោកខាងលិច បានដាក់ទណ្ឌកម្មយ៉ាងធ្ងន់ធ្ងរលើរុស្ស៊ី ចាប់តាំងពីសង្គ្រាមនៅអ៊ុយក្រែនផ្ទុះឡើងក្នុងឆ្នាំ២០២២ ដ្បិតទីក្រុងមូស្គូ ថ្កោលទោសម្តងហើយម្តងទៀតថា វិធានការនេះគឺខុសច្បាប់និងគ្មានប្រសិទ្ធភាពក៏ដោយ៕

អត្ថបទ៖ សុខ សុវណ្ណ

ចុចអាន៖ ត្រាំ បដិសេធដាក់​ទណ្ឌកម្មថ្មីលើរុស្ស៊ី ដោយ​ផ្តល់អាទិភាពដល់កិច្ចចរចាបទឈប់បាញ់មុន​សិន