មេបញ្ជាការរងអាវុធហត្ថខណ្ឌចំការមនទទួល​មរណភាពក្នុងវ័យ៥៣ឆ្នាំ

លោកវរសេនីយ៍ត្រី អ៊ុម សាមុត មេបញ្ជាការរងកងរាជអាវុធហត្ថខណ្ឌចំការមន ចំណុះបញ្ជាការដ្ឋានកងរាជអាវុធហត្ថរាជធានីភ្នំពេញ បានទទួលមរណភាពកាលពីវេលាម៉ោង១០និង០០នាទីព្រឹក ថ្ងៃទី២២ ខែឧសភា ក្នុងជន្មាយុ៥៣ឆ្នាំដោយរោគាពាធ នៅមន្ទីពេទ្យជោរីភ្នំពេញ។ សពលោកវរសេនីយ៍ត្រី អ៊ុម សាមិត បានតម្កល់ធ្វើបុណ្យតាមប្រពៃណីនៅគេហដ្ឋាននៃសពស្ថិតនៅផ្ទះលេខ១២៩បេ ភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។ នេះបើតាមការបញ្ជាក់ពីលោកឧត្តមសេនីយ៍ត្រី ឌឿក សាមាន បម្រើការនៅកងរាជអាវុធហត្ថលើផ្ទៃប្រទេសដែលជាឪពុកក្មេកនៃសព។

នេះគឺជាព័ត៌មានដ៏រន្ធត់ និងគួរឲ្យសោកស្តាយបំផុតសម្រាប់អាវុធហត្ថខណ្ឌចំការមន ក៏ដូចជាអាវុធហត្ថរាជធានីភ្នំពេញទាំងអស់ចំពោះមរណភាពលោកវរសេនីយ៍ត្រី អ៊ុម សាមុត មេបញ្ជាការរងកងរាជអាវុធហត្ថខណ្ឌចំការមនដែលជានាយអាវុធហត្ថមួយរូបមានសាមគ្គីភាពស្អិតរមួតជាមួយមិត្តរួមការងារ ពិសេសជាមួយប្រជាពលរដ្ឋ។

ក្នុងនោះមន្ត្រីរួមការងារក៏ដូចជាប្រជាពលរដ្ឋមានក្តីរន្ធត់ និងសោកស្តាយបំផុតចំពោះមរណភាពរបស់លោកវរសេនីយ៍ត្រី អ៊ុម សាមុត ដែលជានាយអាវុធហត្ថដ៏ល្អមួយរូប៕

អត្ថបទ៖ នរា