រាជរដ្ឋាភិបាល គ្រោងអភិវឌ្ឍមុខរបរ​គ្រួសារក្រីក្រ​ដើម្បីបង្កើនប្រាក់ចំណូល​សម្រួលជីវភាព

រាជរដ្ឋាភិបាលកម្ពុជា មានគម្រោងជួយអភិវឌ្ឍមុខរបរដល់គ្រួសារក្រីក្រ ដើម្បីបង្កើនប្រាក់ចំណូលធ្វើឱ្យជីវភាពរស់នៅកាន់​តែប្រសើរឡើង។

ថ្លែងក្នុងកិច្ចសន្ទនាប្រចាំឆ្នាំ ស្តីពីកិច្ចគាំពារសង្គម ការស្តារសេដ្ឋកិច្ច និងសិទ្ធិឌីជីថលនៅកម្ពុជា ក្រោមប្រធានបទ រួមគ្នា ដើម្បីអនាគតកាន់តែប្រសើរនៅព្រឹកថ្ងៃទី២០ធ្នូ លោក សំហេង បុរស រដ្ឋមន្ត្រីប្រតិភូអមនាយរដ្ឋមន្ត្រី រដ្ឋលេខាធិការ​ក្រសួង​សង្គមកិច្ច និងជាប្រធានក្រុមប្រឹក្សាភិបាលមូលនិធិជាតិជំនួយសង្គម បានមានប្រសាសន៍ថា នាពេលអនាគតរាជ​រដ្ឋាភិបាលតាមរយៈក្រុមប្រឹក្សាជាតិគាំពារសង្គម បាននិងកំពុងរៀបចំសេចក្តីព្រាងអនុក្រឹត្យស្ដីពីកញ្ចប់គ្រួសារ និងកំពុង​សិក្សារៀបចំគម្រោងបញ្ចប់ភាពក្រីក្រសំដៅទៅដល់កម្មវិធីផ្ទេរសាច់ប្រាក់ពីជំនួយសង្គ្រោះទៅជាកម្មវិធីផ្ទេរប្រាក់សម្រាប់ជួយអភិវឌ្ឍគ្រួសារវិញ។

លោករដ្ឋមន្ត្រីប្រតិភូបានបន្តថា តាមរយៈកម្មវិធីនេះនឹងជួយអភិវឌ្ឍមុខរបរបង្កើនប្រាក់ចំណូលដើម្បីធ្វើឱ្យជីវភាពរស់​នៅរបស់ប្រជាពលរដ្ឋកាន់​តែប្រសើរឡើងសំដៅធ្វើយ៉ាងណាឱ្យគ្រួសារក្រីក្រអាចមានលទ្ធភាពរកប្រាក់ចំណូល​ចិញ្ចឹមគ្រួសារដោយមិនពឹងផ្អែកទាំងស្រុងលើរបបថវិកាដែលរាជរដ្ឋាភិបាល បានផ្ដល់ជួនតាមរយៈកម្មវិធីផ្ទេរ​សាច់ប្រាក់ជំនួយសង្គម។

លោករដ្ឋមន្ត្រីប្រតិភូបានបន្តទៀតថា គិតត្រឹមថ្ងៃទី១៨ខែធ្នូឆ្នាំ២០២២នេះ មានគ្រួសារក្រីក្រនិងងាយរងគ្រោះ​ដោយសារ​ជំងឺកូវីដ១៩ទទួលបានប្រាក់ឧបត្ថម្ភពីរដ្ឋាភិបាលជាង៧០ម៉ឺនគ្រួសារ ស្មើនឹងជាង៣លាននាក់ ដោយចំណាយថវិកា ៣៥៩៨៦៨៨០៧១០០០រៀល ប្រហែលជិត៩០០លានដុល្លារ។ ឧបត្ថម្ភដល់ស្ត្រីមានផ្ទៃពោះ និងកុមារអាយុក្រោម ២ឆ្នាំចំនួន ២៨៨៥៤៥នាក់ ចំណាយថវិកា ៨៧០៣៦៩៦០០០០រៀល ប្រហែល ២១លានដុល្លារ ឧបត្ថម្ភដល់គ្រួសារ​រងគ្រោះដោយហានិភ័យអតិផរណាចំនួន ២៦០៥៤គ្រួសារ ចំណាយថវិកា ៣៦៤៦៣៩០១៨០០រៀល ប្រហែលជាង៩លានដុល្លារ និងឧបត្ថម្ភដល់គ្រួសាររងគ្រោះដោយទឹកជំនន់ចំនួន ៩៩១៦៩គ្រួសារ ចំណាយថវិកា​១៥៥ ៩៩៦ ៩៦០ ០០រៀលប្រហែលជិត៤លានដុល្លារ។

លោកបន្ថែមទៀតថា កិច្ចសន្ទនាប្រចាំឆ្នាំនាពេលនេះធ្វើឡើងដើម្បីឱ្យមានទំនាក់ទំនងទៅវិញទៅមក រវាងអង្គការ​សង្គមស៊ីវិល និងអ្នកបង្កើតគោលនយោបាយ តាមរយៈកិច្ចសហប្រតិបត្តិការរួមគ្នា នាំមកនូវសំឡេងរួម ក្នុងការដោះ​ស្រាយបញ្ហាប្រឈម នៃ ការអភិវឌ្ឍ និងដើម្បី ឆ្នុះបញ្ចាំងអំពីតួនាទីរបស់អ្នកពាក់ព័ន្ធ ដែលរួមចំណែក​ដល់ការស្តារ​សេដ្ឋកិច្ច និង សង្គមឡើងវិញ បន្ទាប់ពីជំងឺរាតត្បាតកូវីដ-១៩។

គួរបញ្ជាក់ថា យុទ្ធសាស្ត្រជាតិគាំពារសង្គមសម្រាប់ជនក្រីក្រ និងជនងាយរងគ្រោះ  ត្រូវបានគណៈរដ្ឋមន្ត្រី អនុម័តពី​កាល​ពីថ្ងៃទី១៨ ខែមីនា ឆ្នាំ២០១១ ក្នុងគោលបំណងកាត់បន្ថយភាពក្រីក្ររ៉ាំរ៉ៃ និងអសន្តិសុខស្បៀង ជួយជនក្រីក្រ​ក្នុងការសម្របខ្លួនទៅនឹងវិបត្តិ និងការបង្កើតមូលធនមនុស្សសម្រាប់ពេលអនាគត ក្នុងការជួយកាត់បន្ថយភាពក្រីក្រ៕

អត្ថបទ៖ សំអឿន