ពន្ធដារ នឹងបើកវគ្គជំនាញពន្ធលើប្រាក់ចំណូល និងនីតិវិធីរៀបចំលិខិតប្រកាសពន្ធ

អគ្គនាយកដ្ឋានពន្ធដារ ប្រកាសបើកវគ្គបណ្តុះបណ្តាល ស្តីពីជំនាញពន្ធលើប្រាក់ចំណូល និងនីតិវិធីរៀបចំលិខិតប្រកាស​ពន្ធលើប្រាក់ចំណូល ដល់សាធារណជនទូទៅ។ វគ្គបណ្តុះបណ្តាលនេះ នឹងប្រព្រឹត្តិទៅនៅថ្ងៃទី ៣០-៣១ មករា ឆ្នាំ ២០២៣​។ នេះបើតាមការជូនដំណឹងរបស់អគ្គនាយកដ្ឋានពន្ធដារ។

បើតាមអគ្គនាយកដ្ឋានពន្ធដារ ក្រោយបញ្ចប់វគ្គបណ្តុះបណ្តាលនេះ សិក្ខាកាម នឹងទទួលបានដូចជា ៖ យល់ច្បាប់ បទប្បញ្ញត្តិ និងលិខិតបទដ្ឋានគតិយុត្តផ្សេងៗ ពាក់ព័ន្ធលើ​ប្រាក់ចំណូល, ធ្វើនិយ័តកម្មប្រាក់ចំណូលជាប់​ពន្ធស្រប​ច្បាប់ស្តីពីសារពើពន្ធ, គណនាមូលដ្ឋានគិតពន្ធ និងពន្ធលើប្រាក់ចំណូល, បំពេញលិខិតប្រកាសពន្ធលើ​ប្រាក់ចំណូល​បានត្រឹមត្រូវ, អាចប្រើប្រាស់ប្រព័ន្ធគ្រប់គ្រងការដាក់លិខិតប្រកាសពន្ធអាជីវកម្មតាមអនឡាញ( e-Filing) ស្ទាត់ជំនាញ និងអាចប្រើប្រាស់ប្រព័ន្ធគ្រប់គ្រងការដាក់លិខិតប្រកាសពន្ធលើប្រាក់ចំណូលតាមអនឡាញស្ទាត់ជំនាញ៕