ដាក់ពាក្យបណ្តឹងបាន បើក្រុមហ៊ុន​អ៉ីនធឺណិត មិនដោះស្រាយ​បញ្ហា​រអាក់រអួល​លើសេវាកម្ម

លោក ជា ច័ន្ទតារ៉ា សមាជិកនិយ័តករទូរគមនាគមន៍កម្ពុជា ពន្យល់ថា បើសិនក្រុមហ៊ុនផ្គត់ផ្គង់សេវាកម្មអ៉ីនធឺណិត មិនព្រម​ដោះស្រាយបញ្ហាសេវាកម្មខ្លួន ពោល គឺមិនទទួលខុសត្រូវ ចំពោះបញ្ហារអាក់រអួលរបស់សេវាកម្មខ្លួន (ផ្ទុយពីកិច្ចសន្យា) អ្នកប្រើប្រាស់ អាចមកដាក់ពាក្យបណ្តឹង នៅការិយាល័យនិយ័តករទូរគមនាគមន៍បាន។
លោកលើកឡើងបែបនេះ នៅក្នុងកម្មវិធី ច្បាប់និងសណ្តាប់ធ្នាប់ ដែលរៀបចំឡើងដោយ កម្ពុជាថ្មី គាំទ្រដោយនាយកដ្ឋានកណ្តាលសន្តិសុខ នៃអគ្គស្នងការដ្ឋាននគរបាលជាតិ។

បើតាមអ្នកជំនាញ និយ័តករទូរគមនាគមន៍ មានសិទ្ធិលូកដៃដោះស្រាយបញ្ហារវាងក្រុមហ៊ុន និងអ្នកប្រើប្រាស់ បើទោះបី ជាភាគីទាំងពីរមានកិច្ចសន្យាក៏ដោយ ព្រោះក្នុងដំណើរការនៃការដោះស្រាយបណ្តឹង និយ័តករទូរគមនាគមន៍ មិនធ្វើការ ដោយពិនិត្យមើលតែលើពាក្យសន្យានោះទេ គឺដោយយោងតាមបទដ្ឋានគតិយុត្តផងដែរ ដើម្បីមើលថាតើ កិច្ចសន្យារបស់ ក្រុមហ៊ុននោះ មានរំលោភបំពានលើអ្នកប្រើប្រាស់ដែរឬទេ។ លោកបន្ថែមថា “បើសិនជារកឃើញថា ភាគីក្រុមហ៊ុន​មានធ្វើ​កិច្ចសន្យារំលោភ បំពានលើសិទ្ធិអ្នកប្រើប្រាស់មែននោះ ក្រុមហ៊ុន គឺត្រូវតែផ្តល់សំណង”។

ជាជំហានដំបូង លោកស្នើឱ្យអ្នកប្រើប្រាស់សេវាកម្មក្រុមហ៊ុនណាក៏ដោយ នៅពេលមានបញ្ហា ត្រូវទាក់ទងទៅសេវាកម្ម បម្រើអតិថិជន របស់ក្រុមហ៊ុននោះជាមុនសិន ដើម្បីសួរនាំពីមូលហេតុ ថាហេតុអ្វីបានជាគាត់បំពេញសេវាជូនយើង មិនបាន?

លោកបន្តថា បើសិនទាក់ទងទៅហើយ ក្រុមហ៊ុនមិនមានដំណោះស្រាយជូនទេ អ្នកប្រើប្រាស់អាចបន្តយន្តការទី២ ដោយ​ទាក់ទង​ទៅនិយ័តករទូរគមនាគមន៍ (ការិយាល័យការពារអ្នកប្រើប្រាស់) ដើម្បីដោះស្រាយជូន ដោយនិយ័តករ ទូរគមនាគមន៍ នឹងកោះហៅក្រុមហ៊ុននោះ មកឆ្លើយតបពីមូលហេតុ ដែលមិនបំពេញតាមកិច្ចសន្យា តាមពាក្យបណ្តឹង អ្នកប្រើប្រាស់។

តាមការគូសបញ្ជាក់ បើដំណាក់កាលទី១ មិនបានផល នឹងមានវិធានការរដ្ឋបាលបន្ទាប់ អាចមានជាការព្រមាន ឬឈានដល់ការពិន័យអន្តរកាល ហើយបើធ្ងន់ធ្ងរជាងនេះ គឺអាចយកលក្ខខណ្ឌអាជ្ញាបណ្ណមកដោះស្រាយ ឬបញ្ឈប់អាជ្ញាបណ្ណ​តែម្តង៕

អត្ថបទ៖ សុធាវី