ព័ត៌មានជាតិ
តើគួរបន្តលេងតុងទីន ឬបញ្ឈប់ ខណៈបទល្មើសឆបោកតុងទីនកំពុងកើតមានជាបន្តបន្ទាប់?
«តុងទីន» គឺជាការសន្សំប្រាក់ជាក្រុមដោយទទួលបានអត្រាការប្រាក់ខ្ពស់ជាងធនាគារ និងគ្រឹះស្ថានមីក្រូហិរញ្ញវត្ថុ ហើយមិនមានកិច្ចសន្យា លិខិតស្នាមជាលាយលក្ខណ៍អក្សរ និងច្បាប់ណាកំណត់ និងអនុញ្ញាតឲ្យមានឡើយ។ បើនិយាយពីការលេងតុងទីន មនុស្សមួយចំនួនក៏ជោគជ័យ ខណៈមួយចំនួនទៀតបរាជ័យ ព្រោះត្រូវបានមេ ឬកូនតុងទីន រត់ចោលបាត់នៅពេលបានប្រាក់ហើយនោះ ហើយរហូតមានការប្ដឹងទៅតុលាការថែមទៀត។

ជាក់ស្ដែង ក្នុងរយៈពេលប៉ុន្មានថ្ងៃកន្លងទៅនេះ មានស្ត្រីជាមេតុងទីនម្នាក់ត្រូវបានដាក់ពន្ធនាគារព្រៃសរជាបណ្ដោះអាសន្ន ពីបទឆបោក និងចាយសែកស្អុយដែលមានទឹកប្រាក់រាប់សិបម៉ឺនដុល្លារ។ អ្នកនាង ឡុង រ៉ានី ជាមេតុងទីនទី២ ដែលត្រូវបានសមត្ថភាពចាប់ខ្លួន បន្ទាប់ពីអ្នកនាង អឿន ម៉ូលីកា មេតុងទីនល្បីឈ្មោះដែលត្រូវបានចាប់ខ្លួនកាលពីចុងឆ្នាំ២០២២ កន្លងទៅនេះ។ មេតុងទីន ឡុង រ៉ានី ត្រូវបានកម្លាំងនគរបាលនៃនាយកដ្ឋានព្រហ្មទណ្ឌ ក្រសួងមហាផ្ទៃ បានចាប់ឃាត់ខ្លួន និងបញ្ជូនទៅសាលាដំបូងរាជធានីភ្នំពេញ កាលពីថ្ងៃទី២១ ខែមករា ឆ្នាំ២០២៣។ ការចាប់ខ្លួនមេតុងទីនរូបនេះ បានធ្វើឡើងតាមដីកាបញ្ជាឲ្យចូលខ្លួនរបស់អយ្យការអមសាលាដំបូងរាជធានីភ្នំពេញ ដោយយោងទៅលើពាក្យបណ្ដឹងរបស់ឈ្មោះ ឈឹម ភារី។
តាមរយៈពាក្យបណ្ដឹង បានបញ្ជាក់ថា មានកូនតុងទីនជាច្រើននាក់ដែលរងគ្រោះដោយសារមេតុងទីន ឡុង រ៉ានី និងប្ដី ដោយបានយកលុយសរុបប្រមាណ ២លានដុល្លារអាមេរិក ខណៈកូនតុងទីនដែលរងគ្រោះទាំងអស់នោះកំពុងរៀបចំឯកសារពាក់ព័ន្ធ ដើម្បីប្ដឹងឈ្មោះ ឡុង រ៉ានី និងប្តី តាមផ្លូវច្បាប់ជាធរមាន។

ដោយឡែក មេតុងទីន និងជាអ្នកលក់ផលិតផលអនឡាញល្បីឈ្មោះ អ្នកនាង អឿន ម៉ូលីកា ក៏ត្រូវបានកម្លាំងកងរាជអាវុធហត្ថរាជធានីភ្នំពេញ បានចាប់ឃាត់ខ្លួន រួចបញ្ជូនទៅកាន់សាលាដំបូងរាជធានីភ្នំពេញ កាលពីថ្ងៃទី១៦ ខែធ្នូ ឆ្នាំ ២០២២ កន្លងទៅថ្មីៗនេះ ដើម្បីចាត់ការតាមច្បាប់ ក្រោយចាប់ខ្លួនពាក់ព័ន្ធករណីចេញសែកស្អុយ និងឆបោកកូនតុងទីនរបស់ខ្លួន។
អ្នកនាង អឿន ម៉ូលីកា បានជាប់ពាក់ព័ន្ធលើពាក្យបណ្តឹងចំនួន៣ ដែលសុទ្ធជាបទល្មើសព្រហ្មទណ្ឌពាក់ព័ន្ធបទឆបោក និងចេញសែកស្អុយ ស្មើទឹកប្រាក់ប្រមាណ ៣៦៥ ០០០ ដុល្លារអាមេរិក។ ពាក្យបណ្តឹងទី១ និងពាក្យបណ្ដឹងទី២ គឺប្ដឹងដោយកូនតុងទីនរបស់អ្នកនាង អឿន ម៉ូលីកា ហើយបណ្ដឹងថ្មីមួយទៀតនោះ គឺប្ដឹងដោយឈ្មោះ វឿន ដាវីន ពាក់ព័ន្ធនឹងបទឆបោក។ បច្ចប្បន្ន អ្នកនាង អឿន ម៉ូលីកា ដែលជាមេតុងទីនដ៏ល្បីឈ្មោះកំពុងជាប់ឃុំនៅក្នុងពន្ធនាគារព្រៃសរផងដែរ។

ពាក់ព័ន្ធនឹងការលេងតុងទីននេះ មិនត្រឹមតែបុគ្គលជាមេតុងទីនពីររូបនេះទេដែលត្រូវបានចាប់ខ្លួន ហើយចាត់វិធានការតាមផ្លូវច្បាប់នោះ គឺកន្លងទៅ ក៏មានករណីមេតុងទីនមួយចំនួនបានបោកយកលុយកូនតុងទីន ឬកូនតុងទីនគេចវេសមិនព្រមសងប្រាក់ ជាបន្តបន្ទាប់។ មែនទែនទៅ ការលេងតុងទីននេះ គឺមិនទាន់មានច្បាប់ណាកំណត់ ឬអនុញ្ញាតឲ្យមានជាផ្លូវច្បាប់ទេ ហើយនៅពេលមានបញ្ហានៃករណីលេងតុងទីន គឺភាគច្រើនចោទទៅលើបទឆបោក និងបទរំលោភលើសេចក្ដីទុកចិត្ត។ អ្នកច្បាប់ បានឲ្យដឹងថា បើសិនជាមេតុងទីនបោកយកលុយកូនតុងទីន ឬកូនតុងទីនគេចវេសមិនព្រមសងប្រាក់ ឬករណីមិនមានលទ្ធភាពបង់សងត្រឡប់វិញ គឺអាចប្តឹងទៅតុលាការចោទបទរដ្ឋប្បវេណី ដើម្បីទាមទារប្រាក់បាន។
បើទោះបីជាច្បាប់អាចជួយដោះស្រាយបានក្នុងករណីមេតុងទីនបោកយកលុយកូនតុងទីន ឬកូនតុងទីនគេចវេសមិនព្រមសងប្រាក់ក៏ពិតមែន ប៉ុន្តែ អ្នកដែលមានបំណងលេងតុងទីន គួរកុំលេងល្អជាង ព្រោះមានហានិភ័យខ្ពស់ណាស់ ដោយសារតែការលេងតុងទីនមានអត្រាការប្រាក់ខ្ពស់ ចំណែក នីតិវិធីនៃការដោះស្រាយលើករណីទាំងនេះ គឺមានភាពស្មុគស្មាញ ហើយអាចអូសបន្លាយរយៈពេលយូរ ដោយហេតុថា កម្ពុជាមិនមានច្បាប់ពាក់ព័ន្ធនឹងតុងទីននេះឡើយ៕

ដោយ៖ ធឿន វ៉ាន់សុង

-
ព័ត៌មានអន្ដរជាតិ៧ ថ្ងៃ ago
ពលរដ្ឋថៃ នៅជាប់ព្រំដែនមីយ៉ាន់ម៉ា កំពុងត្រៀមខ្លួនសម្រាប់ភាពអាសន្ន
-
បច្ចេកវិទ្យា៣ ថ្ងៃ ago
OPPO Reno14 Series 5G សម្ពោធផ្លូវការហើយ ជាមួយស្ទីលរចនាបថកន្ទុយទេពមច្ឆា និងមុខងារ AI សំខាន់ៗ
-
ព័ត៌មានអន្ដរជាតិ៥ ថ្ងៃ ago
ថៃ អះអាងថា ជនកំសាកដែលលួចវាយទាហានកម្ពុជា គឺជាទេសចរ ប៉ុណ្ណោះ
-
ព័ត៌មានជាតិ៥ ថ្ងៃ ago
កម្ពុជា រងឥទ្ធិពលពីព្យុះមួយទៀត គឺជាព្យុះទី៥ ឈ្មោះ ណារី (Nari)
-
ព័ត៌មានអន្ដរជាតិ៣ ថ្ងៃ ago
រដ្ឋមន្ត្រីក្រសួងថាមពលថៃ ប្រាប់ពលរដ្ឋកុំជ្រួលច្របល់ បើសង្គ្រាមផ្ទុះឡើង អ្នកខាតធំគឺខ្លួនឯង
-
ព័ត៌មានជាតិ១ សប្តាហ៍ ago
ព្យុះទី៣ និងទី៤ អស់ឥទ្ធិពល តែកម្ពុជានៅតែមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់
-
ព័ត៌មានអន្ដរជាតិ៥ ថ្ងៃ ago
«នាយករដ្ឋមន្ត្រី៣នាក់ក្នុងពេល៣ថ្ងៃ» ជារឿងដែលមួយពិភពលោក មិនអាចធ្វើបានដូចថៃ
-
សន្តិសុខសង្គម៤ ថ្ងៃ ago
អាវុធហត្ថបង្ក្រាបរថយន្ត ១ គ្រឿង លួចដឹកទឹកដោះគោស្រស់ ២៧ កេះ នាំចូលពីថៃ