កម្ពុជា រកចំណូលបានជាង ១២ពាន់លានដុល្លារ​ពីការនាំចេញសម្លៀកបំពាក់ស្បែកជើង និងសម្ភារៈធ្វើដំណើរ

កម្ពុជា រកចំណូលបានពីការនាំចេញសម្លៀកបំពាក់ ស្បែកជើង និងសម្ភារៈធ្វើដំណើរ បានប្រមាណជាង ១២ពាន់លានដុល្លារ នៅក្នុងឆ្នាំ ២០២២ កើនឡើង ១៥ភាគរយ បើធៀបនឹងឆ្នាំ ២០២១។ នេះបើតាមរបាយការណ៍បូកសរុបការងារពាណិជ្ជកម្មឆ្នាំ២០២២ និងទិសដៅអនុវត្តន៍ការងារឆ្នាំ២០២៣ របស់ក្រសួងពាណិជ្ជកម្ម។

បើតាមរបាយការណ៍ដដែល បានបញ្ជាក់ថា ការនំាចេញ​សម្លៀកបំពាក់ មានទឹកប្រាក់ជាង ៩ ​ពាន់លានដុល្លារអាមេរិក ​កើឡើង ១៣ ​ភាគរយ, ស្បែកជើង ​មានចំនួន ១,៧ ពាន់លានដុល្លារអាមេរិក​ កើនឡើង ២៥ ភាគរយ និង​ការនាំចេញ​សម្ភារៈធ្វើដំណើរ មានទំហំទឹកប្រាក់ជាង ​១,៧ ​លានដុល្លារ ដោយ​បាន​កើនឡើងប្រមាណ ​១៩ ភាគរយ​ បើប្រៀបធៀប និងឆ្នំា២០២១។

បើតាមក្រសួង​ពាណិជ្ជកម្ម ការនាំចេញទំនិញសំខាន់ៗ​របស់កម្ពុជា ​នៅក្នុងឆ្នាំ ២០២២ មាន​ទំហំទឹកប្រាក់​សរុបប្រមាណជាង ២២ ពាន់លានដុល្លារអាមេរិក កើនឡើងជាង ១៦ ភាគរយ បើធៀបទៅឆ្នាំ ២០២១។

យោងតាមរបាយការណ៍របស់អគ្គនាយកដ្ឋានគោលនយោបាយ នៃក្រសួងសេដ្ឋកិច្ច និងហិរញ្ញវត្ថុ បានបង្ហាញថា វិស័ឧស្សាហកម្មបម្រើការនាំចេញ មានដូចជា វិស័យកាត់ដេរ និងកម្មន្តសាលមិនមែនកាត់ដេរ រក្សាបានកំណើនរឹងមាំ ដោយសារនិន្នាការល្អប្រសើរនៃតម្រូវការខាងក្រៅ។ ការនាំចេញផលិតផលកាត់ដេរ និងមិនមែនកាត់ដេរ បានកើនឡើង​ក្នុងអត្រា ១៤,៥ភាគរយ និង ២៤,៧ភាគរយ រៀងគ្នា ដែលទ្រទ្រង់ឱ្យវិស័យនេះ សម្រេចបាននូវកំណើន​ក្នុងរង្វង់ ១០,៨ភាគរយ និង ១២,២ភាគរយ រៀងគ្នា ក្នុងឆ្នាំ ២០២២៕