ព័ត៌មានជាតិ

ផលិតផល៩៧ស្តង់ តាំងបង្ហាញក្នុងពិព័រណ៍សក្តានុពលខេត្តនិងផលិតផលនាំចេញ-នាំចូលក្រុងបានលុងលើកទី៤

បានផុស

១ ខែ មុន

នៅ

ថ្ងៃពុធ ២២ មីនា ២០២៣

ដោយ

រតនគិរី ៖ ពិព័រណ៍ពាណិជ្ជកម្មផលិតផលនេះត្រូវបានរៀបចំធ្វើឡើងនៅព្រលានយន្តហោះ ស្ថិតនៅក្រុងបានលុង ខេត្តរតនគិរី ហើយត្រូវបានសម្ពោធឲ្យដំណើរការនៅរសៀលថ្ងៃទី២២ ខែមីនា ឆ្នាំ២០២៣នេះ លោក ងិន ណែល អភិបាលខេត្តស្តីទី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ខៀវ ថា ប្រធានមន្ទីរពាណិជ្ជកម្មខេត្តរតនគិរីបានលើកឡើងថា ពិព័រណ៍ផលិតផលសក្តានុពល របស់ខេត្តនិងផលិតផលនាំចេញ-នាំចូលក្រុងបានលុងខេត្តរតនគិរី លើកទី៤ ឆ្នាំ២០២៣នេះប្រព្រឹត្តទៅរយៈពេល៧ថ្ងៃ ដោយគិតចាប់ពីថ្ងៃទី២២ ដល់ថ្ងៃ២៨ ខែមីនា ឆ្នាំ២០២៣ ដែលមានអាជីវករចូលរូមសរុប ប្រមាណ៩៧ស្តង់។

ក្នុងនោះមន្ទីរអង្គភាពអាជីវករសហគ្រាស ក្រុមហ៊ុនក្នុងខេត្ត និងមកពីបណ្ដារមន្ទីរពាណិជ្ជកម្មខេត្ត មានដូចជា ខេត្តក្រចេះ,ស្ទឹងត្រែង,មណ្ឌលគីរី ព្រះវិហារ,កំពង់ធំ និងខេត្តត្បូងឃ្មុំ សរុប ចំនួន២០ស្តង់។ ក្រៅពីនេះគឺអាជីវករ សេវាករ ពាណិជ្ជករ មកពីក្រៅខេត្តមានលក់ផលិតផលចម្រុះមានដូចជា ផលិតផល ប្រើប្រាស់ និងចំណីអាហារ ប្រមាណជាង៧៩ស្តង់ ដាក់តាំងបង្ហាញនូវផលិតផលជាច្រើនប្រភេទ ដែលប្រកបដោយគុណភាព និងសុវត្ថិភាពដែលអាចឆ្លើយតបតម្រូវការទីផ្សារ តម្រូវការប្រើប្រាស់របស់ប្រជាជនទាំងក្នុង និងក្រៅខេត្តបាន។

ក្នុងពិធីសម្ពោធពិព័រណ៍ពាណិជ្ជកម្មខេត្តរតនគិរី លើកទី៤នេះ លោក ងិន ណែល អភិបាលខេត្តស្តីទី បានចាត់ទុកពិព័រណ៍ផលិតផល គឺជាការបង្កើតឲ្យមានបរិយាកាសពាណិជ្ជកម្មដល់អាជីវករ សេវាករ ពាណិជ្ជករក្នុងមូលដ្ឋាន រវាងខេត្តរតនគិរី និងខេត្តទាំងអស់នៅក្នុងប្រទេស ជំរុញវិស័យពាណិជ្ជកម្មនៅក្នុងខេត្តរតនគិរី ធ្វើសកម្មភាពរវាងខេត្ត និងខេត្តឲ្យមានភាពរស់រវើក មានសម្ព័ន្ធភាពល្អនិងគ្នា បង្កើតឲ្យមានសកម្មភាពពាណិជ្ជកម្មបន្ថែមលើវិស័យកសិកម្ម កសិ-ឧស្សាហកម្ម កសិ-ពាណិជ្ជកម្ម និងវិស័យទេសចរណ៍។

លោកអភិបាលខេត្តស្តីទីបានបន្តថា ពិព័រណ៍ពានិជ្ជកម្មនេះក៏មានការបង្កើតឲ្យមានឱកាសនាំចេញ តាមរយៈអ្នកផ្គត់ផ្គង់ដល់អ្នកទេសចរណ៍ និងអ្នកប្រើប្រាស់ ជាពិសេសជំរុញឲ្យបណ្ដាខេត្តទាំងអស់ បានចូលរួមប្រាស្រ័យផ្លាស់ប្តូរគំនិតគ្នា និងបង្ហាញពីផលិតផលរបស់ខ្លួនសំដៅលើការផ្លាស់ប្ដូរទំនិញ រវាងខេត្ត និងខេត្ត ពង្រឹង និងពង្រីកពាណិជ្ជកម្ម នៅក្នុងខេត្តឲ្យកាន់តែមានភាពទូលំទូលាយផ្នែកសេដ្ឋកិច្ច បង្កើតឱកាសឲ្យប្រជាជន អ្នកផលិតក្នុងខេត្ត ក្នុងប្រទេសឲ្យទទួលបានចំណេះដឹង និងរៀនសូត្រនូវព័ត៌មានថ្មីៗ បង្កើតនូវសតិបញ្ញាថ្មីមួយស្តីទី បច្ចេកទេសផលិត ការអភិវឌ្ឍផលិតផល និងទីផ្សារ និងការវិវត្តន៍ផលិតផលរបស់ខេត្តនានា ក៏ដូចជាផលិតផលពីបរទេស ក្នុងន័យផ្លាស់ប្តូរព័ត៌មានពាណិជ្ជកម្មរវាងគ្នានិងគ្នា បង្កើតទីផ្សារផ្គត់ផ្គង់ និងប្រើប្រាស់ជាក់ស្តែងផងដែរ៕

ដោយ ៖ វុទ្ធឦសាន