កុល ដាវី រំលឹកចំណងស្នេហ៍ ១០ឆ្នាំ ជាមួយ សុខ រក្សា និងសន្យាថែសុភមង្គលនេះឱ្យគង់វង្សដល់ចាស់

អតីតតារាសម្ដែងសិចស៊ីល្បីឈ្មោះ កុល ដាវី ដែលត្រូវជាភរិយាតារាចម្រៀងចាស់វស្សា លោក សុខ រក្សា បានរំលឹកនូវអនុស្សាវរីយ៍ចំណងស្នេហ៍ ១០ឆ្នាំ ខ្លួនជាមួយស្វាមីដោយសន្យាថា នឹងថែរក្សាសុភមង្គលស្នេហ៍នេះឱ្យគង់វង្សដល់ចាស់រៀងខ្លួន។

ក្នុងឱកាសរំលឹកថ្ងៃកំណើតស្វាមី អ្នកនាង កុល ដាវី បានសារភាពអារម្មណ៍ដ៏ជ្រាលជ្រៅចំពោះស្វាមីថា “រីករាយថ្ងៃកំណើតប្តីសម្លាញ់ ជាង ១០ឆ្នាំហើយ ដែលពួកយើងប្រើជីវិតគូជាមួយគ្នារហូតដល់ឥឡូវមានវត្តមានកូនស្រីជាទីស្រលាញ់របស់ពួកយើងថែមម្នាក់ ពួកយើងពិតជាឆ្លងកាត់ព្យុះភ្លៀង រឿងតូចធំមកជាមួយគ្នា ផ្អែកស្មាគ្នាទៅវិញទៅមក លួងលោមគ្នា ហើយក៏កាន់ដៃគ្នាដើរទៅមុខបន្ត អរគុណប្តីដែលចូលមកក្នុងជីវិតអូន”។

ទន្ទឹមពាក្យពេចន៍ដ៏ផ្អែមល្ហែម អតីតអ្នកសិល្បៈរូបនេះ ក៏បានសន្យាចំពោះស្វាមី ដោយមានសាធារណជនអ្នកគាំទ្រចាំជាសាក្សីដែរថា ខ្លួននឹងថែរក្សាសុភមង្គលមួយនេះឱ្យគង់វង្សរហូតដល់ចាស់រៀងខ្លួន។

ដ្បិតចំណងស្នេហ៍អ្នកសិល្បៈមួយគូនេះ មានរយៈពេល ១០ឆ្នាំហើយក្តី តែការរួមរស់ជាគូស្វាមីភរិយា ទើបតែបានប្រមាណជាជិត ៧ឆ្នាំប៉ុណ្ណោះ ពោលគឺតារាប្រុសស្រីទាំងពីរដួងនេះ បានរៀបអាពាហ៍ពិពាហ៍កាលពីថ្ងៃទី០៨ ខែមីនា ឆ្នាំ២០១៩ និងទទួលបានចំណងដៃកូនស្រីម្នាក់ក្នុងខែមេសា ឆ្នាំ២០២២ផងដែរ។

អ្វីដែលគួរកត់សម្កាល់ ក្រោយចាប់ដៃគ្នាជាសាងសុភមង្គលគ្រួសារលោក សុខ រក្សា ក៏ដូចជាអតីតតារាសម្ដែង កុល ដាវី ហាក់ឃ្លាតឆ្ងាយពីរង្វង់សិល្បៈ ដោយបានងាកទៅពង្រឹងលើជំនួញ និងវង់តន្រ្តីផ្ទាល់ខ្លួន៕ ចាន់រ៉ា