​សហគមន៍កសិកម្មទំនើប ជួយកសិករឱ្យទទួលបាន​ទុនកម្ចី​ ខណៈរដ្ឋ កំពុងទម្លាក់ឥណទានថ្មី $៣៥ លាន

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា សហគមន៍​កសិកម្ម​ទំនើប គឺជាដំណោះស្រាយមួយដ៏ល្អជួយប្រ​ជាកសិករក្នុងការទទួល​បានទុន​កម្ចី​សម្រាប់​ផលិត​កម្ម​ចំគោលដៅ ធានាបាននូវការផ្គត់​ផ្គង់​ទាំងគុណភាព និងបរិមាណ។

លោករដ្ឋមន្ត្រីបានបញ្ជាក់ថា សហគមន៍កសិកម្មទំនើប ទទួលបានការ​គាំទ្រ​ពីក្រសួងកសិកម្ម ដែលសហគមន៍នេះនឹងជួយកាត់បន្ថយថ្លៃដើមផលិត ដែលមានហានិភ័យទាបពីកត្តាទីផ្សារ និងកត្តាអាកាសធាតុ និងមាន​រចនាសម្ព័ន្ធគ្រប់គ្រងច្បាស់លាស់ សំដៅលើកកម្ពស់ជីវភាពប្រជាពលរដ្ឋ ទទួលបានផលចំនេញ និង​សេដ្ឋកិច្ចមាត្រដ្ឋាន។

​លោក ឌិត ទីណា ​បានលើកឡើងក្នុងពេលចូលរួមពិធីចុះហត្ថលេខាលើអនុស្សរណៈ​នៃការ​យោគ​យល់​គ្នារវាងក្រសួងកសិកម្ម ជាមួយធនាគារអភិវឌ្ឍន៍​ជនបទ ​និង​កសិកម្ម​ សាជីវកម្មធានា​ឥណ​ទានកម្ពុជា និងធនាគារពាណិជ្ជកម្មក្រៅ​ប្រទេសនៃ​កម្ពុជា​ នៅទីស្តីការក្រសួងនៅថ្ងៃទី ១០ ខែកក្កដា ឆ្នាំ ២០២៥​។ ​

​លោករដ្ឋមន្ត្រីបានលើកឡើងថា នេះជាសមិទ្ធផលថ្មីនៃការខិតខំប្រឹងប្រែងរបស់ក្រសួងកសិកម្ម សហការជាមួយដៃគូសម្រាប់ការអភិវឌ្ឍន៍វិស័យកសិកម្មកម្ពុជា ធានាឱ្យបាននូវសន្តិសុខស្បៀង និងនិរន្តរភាពសេដ្ឋកិច្ច និងបរិស្ថាន ស្របតាមទស្សនទាន «មានហូប មានប្រើ មានបាន និង​មានរហូត»។

ក្រសួង​កសិកម្ម ​កំពុង​រៀបចំ​ឥណទាន​ថ្មី​ប្រមាណ ៣៥ លាន​ដុល្លារ ដើម្បីជា​ទុន​បន្ថែម​ដល់​សហគមន៍​កសិកម្ម​ទំនើប​។ ​

កម្ពុជានឹងមាន​សហគមន៍កសិកម្មទំនើបសរុបប្រមាណ ១៨ សហគមន៍ នៅដំណាច់ឆ្នាំ ២០២៥ ​ដែល​ត្រូវ​បាន​បង្កើត និង​ចុះ​បញ្ជីដោយ​ក្រសួង​កសិកម្មកម្ម។

ក្នុង​នោះ សហគមន៍​កសិកម្ម​ទំនើបចំនួន ១៣ ត្រូវបានរៀបចំបង្កើត ឡើងនៅក្នុងខេត្តចំនួន ៧ លើមុខដំណាំយុទ្ឋសាស្ត្រចំនួន៤ មុខគឺ ដំណាំស្រូវ ដំណាំបន្លែ ដំណាំស្វាយចន្ទី និងដំណាំម្រេច ជា​ដើម​៕