ព័ត៌មានអន្ដរជាតិ

វិស័យទេសចរណ៍ថៃ រំពឹងផលប៉ះពាល់ពីពន្ធខ្ពស់របស់ ត្រាំ

បានផុស

១ year មុន

នៅ

ថ្ងៃសុក្រ ១១ កក្កដា ២០២៥

ដោយ

ប្រតិបត្តិករទេសចរណ៍ថៃ សម្ដែងការព្រួយបារម្ភពីផលរំខាននៃពន្ធខ្ពស់របស់សហរដ្ឋអាមេរិកលើវិស័យទេសចរណ៍ថៃដោយប្រយោល ប៉ុន្តែផលប៉ះពាល់មិនកើតឡើងខ្លាំងភ្លាមៗនោះទេរហូតដល់ឆ្នាំក្រោយ ដោយសារតែភ្ញៀវទេសចរភាគច្រើនបានកក់ការធ្វើដំណើរកម្សាន្តមកថៃសម្រាប់រដូវកាលខ្ពស់ខាងមុខរួចហើយ។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានក្រុមប្រឹក្សាទេសចរណ៍ខេត្តភូកេត លោក Rangsiman Kingkaew បាននិយាយថា សេដ្ឋកិច្ចនៃទីផ្សារទេសចរបរទេសសំខាន់ៗសម្រាប់ថៃ ដូចជាកូរ៉េខាងត្បូង និងជប៉ុន ត្រូវរងដោយពន្ធខ្ពស់របស់សហរដ្ឋអាមេរិក ទោះបីជាពេលបច្ចុប្បន្នមានពេលដើម្បីចរចាបន្ថែមទៀតក្ដី។ បន្ថែមពីលើនោះ ភាពតានតឹងពាណិជ្ជកម្មរវាងអាមេរិក និងចិន នៅតែបន្តកើតមាន ដែលអាចបណ្តាលឱ្យតម្លៃនៃការរស់នៅសម្រាប់ប្រជាជនប្រទេសធំៗទាំង២កើនឡើង ដែលតម្រូវឱ្យពួកគេកាត់បន្ថយការចំណាយ ហើយធ្វើឱ្យការធ្វើដំណើរកម្សាន្តធ្លាក់ចុះ។

ជាមួយគ្នានេះ ទេសចរក្នុងស្រុកថៃ ដែលជួយជំរុញដល់ការធ្វើដំណើរនារដូវទាប ក៏រំពឹងពីផលប៉ះពាល់នៃពន្ធខ្ពស់ ៣៦ ភាគរយ លើទំនិញថៃរបស់ប្រធានាធិបតីអាមេិរក ដូណាល់ ត្រាំ ផងដែរ។

មែនទែនទៅ លោក Rangsiman រំពឹងថា គោលនយោបាយពន្ធនឹងបង្កផលប៉ះពាល់សម្រាប់វិស័យទេសចរណ៍សកលទាំងមូល ដោយសារតែវាធ្វើឱ្យមនុស្សកាត់បន្ថយការចំណាយ ក្រោមផលប៉ះពាល់ដោយប្រយោលពីការធ្លាក់ចុះនៃកំណើនសេដ្ឋកិច្ច និងពាណិជ្ជកម្ម។

លោកបន្តថា ក្នុងអំឡុងពេលនៃភាពមិនប្រាកដប្រជានេះ រដ្ឋាភិបាលថៃគួរឆ្លៀតឱកាសដោះស្រាយចំណុចខ្សោយក្នុងវិស័យទេសចរណ៍។ ទាំងនេះរួមបញ្ចូលការកម្ពស់មុខមាត់របស់ប្រទេស ទាក់ទងបញ្ហាសុវត្ថិភាព និងគម្រោងហេដ្ឋារចនាសម្ព័ន្ធជាដើម។

លោក Rangsiman បាននិយាយថា គូប្រជែងថៃ ដូចជាប្រទេសវៀតណាម បាននិងកំពុងវិនិយោគយ៉ាងខ្លាំងលើទិសដៅទេសចរ និងហេដ្ឋារចនាសម្ព័ន្ធថ្មីៗ ប៉ុន្តែការអភិវឌ្ឍន៍ទេសចរណ៍របស់ថៃវិញ គ្មានភាពស៊ីសង្វាក់គ្នា ហើយបន្តពឹងផ្អែកជាចម្បងលើកន្លែងទាក់ទាញដែលមានស្រាប់៕