សម្ដេចតេជោ ហ៊ុន សែន សង្ឃឹមថា ពលរដ្ឋនឹងបន្តបោះឆ្នោតជូនគណបក្សប្រជាជនកម្ពុជា នៅថ្ងៃទី ២៣​ខែកក្កដាខាងមុខ

ស​ម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី បានថ្លែងអំណរគុណដល់ប្រជាពលរដ្ឋនៅខេត្តត្បូងឃ្មុំ និងប្រជាពលរដ្ឋនៅទូទាំងប្រទេស ដែលបានបោះឆ្នោតជូនគណបក្ស​ប្រជាជនកម្ពុជា ហើយសង្ឃឹមថា នៅថ្ងៃទី ២៣ ខែកក្កដា ឆ្នាំ ២០២៣ខាងមុខនេះ ប្រជាពលរដ្ឋនឹងបន្តបោះឆ្នោតជូនគណបក្សប្រជាជនកម្ពុជា បន្តទៀត។

នៅក្នុងពិធីសម្ពោធដាក់ឲ្យប្រើប្រាស់ជាផ្លូវការ មន្ទីរពេទ្យបង្អែកស្រុកក្រូចឆ្មារ ខេត្តត្បូងឃ្មុំ នាព្រឹកថ្ងៃទី ៣ ខែមេសានេះ សម្ដេចតេជោ ហ៊ុន សែន បានថ្លែងអំណរគុណដល់ប្រជាពលរដ្ឋរស់នៅខេត្តត្បូងឃ្មុំ និយាយដោយឡែក និងប្រជាពលរដ្ឋរស់នៅទូទាំងប្រទេស និយាយជារួម ដែលបានបោះឆ្នោតជូនគ​ណ​បក្សប្រជាជនកម្ពុជា នាពេលកន្លងមក និងសង្ឃឹមថា នៅថ្ងៃទី ២៣ ខែកក្កដា ឆ្នាំ ២០២៣ខាងមុខនេះ ប្រជាពលរដ្ឋរស់នៅខេត្តត្បូងឃ្មុំ និងនៅទូទាំងប្រទេស នឹងបន្តបោះឆ្នោតជូនគណបក្សប្រជាជនកម្ពុជា បន្តទៀត។

សម្ដេចតេជោ ហ៊ុន សែន ថ្លែងបែបនេះថា «ហើយសង្ឃឹមថា ថ្ងៃ ២៣ ខែកក្កដា ឆ្នាំ ២០២៣ ខាងមុខនេះ មិនភ្លេចនឹងការចូលរួមបោះឆ្នោត ក្នុងបរិយាកាសមួយដែលអព្យាក្រិត្យ គ្មានការគំរាមកំហែង ហើយក៏សង្ឃឹមថា បងប្អូន​នឹងមិនភ្លេចគណបក្សប្រជាជនកម្ពុជា»។

សម្ដេចតេជោ ហ៊ុន សែន លើកឡើងថា ប្រជាពលរដ្ឋបោះឆ្នោតជូនគណបក្សប្រជាជនកម្ពុជា គឺដើម្បីធានាម្ខាងគឺសន្តិភាព និងម្ខាងទៀតគឺដំណើរការអភិវឌ្ឍ៕