ព័ត៌មានជាតិ

ទៅលេងសៀមរាប តោះ! មកស្គាល់សណ្ឋាគារលំដាប់ផ្កាយទាំង ៦០ ដែលគ្រប់គ្នាចង់ដឹង

បានផុស

១១ ខែ មុន

នៅ

ថ្ងៃពុធ ១២ មេសា ២០២៣

ដោយ

Dy Bunnara

ខេត្តសៀមរាបមានភាពទាក់ទាញ និងបានក្លាយជាគោលដៅទេសចរណ៍ “ត្រូវតែទស្សនា” សម្រាប់ភ្ញៀវអន្តរជាតិដែលមកទស្សនាប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សៀមរាប ក្រៅពីសំបូរទៅដោយ សម្បត្តិវប្បធម៌ សំណង់ប្រាសាទប្រវត្តិសាស្ត្រ និងតំបន់ទេសចរណ៍ធម្មជាតិជាច្រើន ដែលល្បីល្បាញទូទាំងប្រទេសកម្ពុជា និង លើពិភពលោក ខេត្តទេសចរណ៍មួយនេះក៏មានសណ្ឋាគារប្រណិតៗលំដាប់ផ្កាយជាច្រើនសម្រាប់ទទួលភ្ញៀវទេសចរ។

ពាក់ព័ន្ធនឹងសណ្ឋាគារលំដាប់ផ្កាយនេះ កាលពីឆ្នាំ ២០១៩ ក្រសួងទេសចរណ៍បានផ្តល់ចំណាត់ថ្នាក់សណ្ឋាគារចំនួន ៦០ នៅក្នុងខេត្តសៀមរាបដែលមានស្តង់ដា ហើយទទួលបានការវាយតម្លៃជាសណ្ឋាគារកម្រិតផ្កាយ ១ ដល់ផ្កាយ ៥។

ការវាយតម្លៃ និងផ្តល់ចំណាត់ថ្នាក់សណ្ឋាគារទទួលបានកម្រិតផ្កាយ ត្រូវអនុវត្តតាមគោលការណ៍ដូចជា៖

ទី១៖ សម្ភារៈបរិក្ខាប្រើប្រាស់ និងគុណភាព ក្នុងបន្ទប់ភ្ញៀវស្នាក់នៅ
ទី២៖ សេវាកម្មបម្រើការស្នាក់នៅក្នុងសណ្ឋាគារ
ទី៣៖ ការរៀបចំ និងតុបតែងលំអរនៅក្នុងបន្ទប់ភ្ញៀវស្នាក់នៅ និងទីធ្លាសាធារណៈរបស់សណ្ឋាគារជាដើម។

សណ្ឋាគារទាំង ៦០ ដែលទទួលបានចំណាត់ថ្នាក់ពីផ្កាយ ១ ដល់ ផ្កាយ ៥ នៅក្នុងខេត្តសៀមរាបមានឈ្មោះដូចជា៖

បើតាមរបាយការណ៍របស់រដ្ឋបាលខេត្តសៀមរាប ខេត្តសៀមរាបបច្ចុប្បន្នមានសណ្ឋាគារសរុប ២៣៧ ទីតាំងដែលសរុបមានជាង ១៥ ០០០ បន្ទប់ និងផ្ទះភ្ញៀវ ២៨៣ ទីតាំង។ ខេត្តក៏មានអាជីវកម្មទេសចរណ៍ដូចជាភោជនីយដ្ឋានចំនួន ២៣៩ កន្លែង ហាងម៉ាហ្សា ៦៩ កន្លែង មគ្គុទេសក៍ទេសចរណ៍ ៥ ១១៧ នាក់ និងទីភ្នាក់ងារទេសចរណ៍ ៣២១។

មុនផ្ទុះវិបត្តិជំងឺកូវីដ កាលពីឆ្នាំ ២០១៨ ខេត្តសៀមរាបទទួលបានភ្ញៀវទេសចរសរុបចំនួន ៥,៧ លាននាក់ ក្នុងនោះភ្ញៀវអន្តរជាតិចំនួន ២,៥លាននាក់ ប៉ុន្តែដោយសារវិបត្តិសកលនៃជំងឺកូវីដ-១៩ បានជះឥទ្ធិពលយ៉ាងខ្លាំងចំពោះវិស័យទេសចរណ៍ខេត្តចាប់ពីឆ្នាំ ២០១៩ ដែលសេវាកម្មទេសចរណ៍ត្រូវបានបិទ និងផ្អាកស្ទើរតែទាំងស្រុង ហើយទើបនឹងបានចាប់ផ្តើម មានកំណើនភ្ញៀវទេសចរប្រសើរឡើងវិញនៅឆ្នាំ២០២២។

ដោយឡែកនៅឆ្នាំ ២០២៣ ខេត្តសៀមរាប នឹងរៀបចំព្រឹត្តិការណ៍អង្គរសង្រ្កាន្តដ៏ធំក៏ចំគម្រប់ខួប ១០ ឆ្នាំ ដែលរំពឹងនឹងអាចទាក់ទាញទេសចររាប់រាប់ម៉ឺននាក់។

នៅក្នុងកម្មវិធីមាគ៌ាអភិវឌ្ឍកម្ពុជាដែលរៀបចំឡើងដោយកម្ពុជាថ្មីកាលពីម្សិលមិញនេះ លោក ថោង រដ្ឋសក្តិ រដ្ឋលេខាធិការក្រសួងទេសចរណ៍បានឱ្យដឹងថា ការកក់បន្ទប់សណ្ឋាគារ ផ្ទះសំណាក់ សម្រាប់ស្នាក់នៅមុនពេលពិធីបុណ្យចូលឆ្នាំខ្មែរ និងការរៀបចំអង្គរសង្ក្រាន្តនៅខេត្តសៀមរាបពេញណែនអស់ហើយ។

លោកបន្តថា សង្ក្រាន្តឆ្នាំនេះខុសប្លែកពីឆ្នាំមុនៗ ដោយសារការរៀបចំធំជាងមុន ហើយណាមួយក្នុងរយៈពេល ៣ ឆ្នាំនេះ ខេត្តសៀមរាបក៏បានរៀបចំគោលដៅទេសចរណ៍ និងរមណីយដ្ឋានទេសចរណ៍ថ្មីៗជាច្រើន ដែលនឹងទាក់ទាញទេសចរចង់មកដើរកម្សាន្តជាពិសេសថ្ងៃកម្មវិធីអង្គរសង្ក្រាន្ត ដែលស្របពេលពិធីបុណ្យចូលឆ្នាំខ្មែរខាងមុខនេះ៕