សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ឧបត្ថម្ភថវិកា ១ម៉ឺនដុល្លារដល់កីឡាការិនី ប៊ូ សំណាង

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានប្រកាសឧបត្ថម្ភថវិកាចំនួន ១ម៉ឺនដុល្លារដល់កីឡាការិនី ប៊ូ សំណាង ដែលរត់ក្រោមដំណក់ទឹកភ្លៀរហូតដល់ទីបញ្ចប់ ទោះបីជាខ្លួនមិនជាប់ចំណាត់ថ្នាក់ក៏ដោយ។

តាមរយៈបណ្ដាញសង្គមតេលេក្រាម នៅរសៀលថ្ងៃទី ១០ ខែឧសភានេះ សម្ដេចតេជោ ហ៊ុន សែន បានសរសេរថា ​បើទោះបីជាសម្ដេច បាននិងកំពុងចូលរួមក្នុងកិច្ចប្រជុំកំពូលអាស៊ាននៅឥណ្ឌូណេស៊ី តែសម្ដេចក៏នៅបន្តតាមដានការប្រកួតកីឡាស៊ីហ្គេមលើកទី ៣២ នៅកម្ពុជាដែរ។

សម្ដេចតេជោ ហ៊ុន សែន បានសរសេរបន្តថា «រឿងដែលគួរឲ្យចាប់អារម្មណ៍ គឺកីឡាការិនី ប៊ូ សំណាង រត់ក្រោមដំណក់ទឹកភ្លៀងរហូតដល់ទីបញ្ចប់ ទោះបីជាខ្លួនមិនជាប់ចំណាត់ថ្នាក់ក៏ដោយ»។ ដូច្នេះ ដើម្បី​លើកទឹកចិត្តសម្រាប់ការអត់ធ្មត់ សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានប្រកាសជួយឧបត្ថម្ភថវិកា ១ម៉ឺដុល្លារដល់កីឡាការិនី ប៊ូ សំណាង។ សម្ដេចតេជោ ហ៊ុន សែន បានណែនាំឲ្យលោក សេង ទៀង យកថវិកាជូនកីឡាការិនី ប៊ូ សំណាង ដោយផ្ទាល់ដៃ។

កាលពីព្រឹកថ្ងៃទី ១០ ខែឧសភា ឆ្នាំ ២០២៣នេះ លោក ខៀវ កាញារីទ្ធ រដ្ឋមន្ដ្រីក្រសួងព័ត៌មាន និងសប្បុរសជនមួយចំនួន បានឧបត្ថម្ភថវិកាដល់កីឡាការិនី ប៊ូ សំណាង សម្រាប់ជាការលើកទឹកចិត្តសម្រាប់កីឡាការនីអត្តពលកម្មរូបនេះ ដែលបានខិតខំប្រឹងប្រែងក្នុងការចូលរួមប្រកួតលើវិញ្ញាសារត់ បើទោះបីជាមិនទទួលបានលទ្ធផលល្អយ៉ាងណាក៏ដោយ។

សូមជម្រាបថា កីឡាការិនី ប៊ូ សំណាង បានទទួលការចាប់អារម្មណ៍យ៉ាងខ្លាំងពីមហាជន អ្នកសារព័ត៌មានជាតិ និងអន្តរជាតិ ក្នុងអំឡុងពេលកីឡាការនីរូបនេះ ចូលរួមប្រកួតលើវិញ្ញាសារត់ចម្ងាយ ៥,០០០ម៉ែត្រ នៅពហុកីឡដ្ឋានជាតិមរតកតេជោ ដែលពេលនោះស្ថិតក្រោមដំណក់ទឹកភ្លៀង តែកីឡាការនី ប៊ូ សំណាង បានតស៊ូព្យាយាម ពុះពាររត់ដល់ទី ដោយមិនបោះបង់ការប្រកួតឡើយ។

កីឡាការិនីជម្រើសជាតិ ប៊ូ សំណាង ត្រូវបានប្រជាជនកម្ពុជា កោតសរសើរ និងមានមោទកភាពចំពោះភាពអំណត់ និងការតស៊ូរបស់កញ្ញាសម្រាប់ការប្រកួតនេះ ក្នុងព្រឹត្តិការណ៍កីឡាស៊ីហ្គេមលើកទី ៣២ ក្រោមមេឃភ្លៀងធ្លាក់យ៉ាងខ្លាំង ខណៈដែលដឹងថា ខ្លួនមិនទទួលបានមេដាយក៏ដោយ ក៏កីឡាការនី ប៊ូ សំណាង នៅតែតស៊ូរត់ដល់ទីបញ្ចប់ដែរ៕