ព័ត៌មានជាតិ

ឆ្នេរប្រណិតខេត្តកែបបញ្ចប់ការចាក់ដីបំពេញ ១០០ ភាគរយ កំពុងបន្តដាំដើមឈើនិងចាក់ខ្សាច់បន្ថែម

បានផុស

៣ years មុន

នៅ

ថ្ងៃព្រហស្បតិ៍ ១១ ឧសភា ២០២៣

ដោយ

គម្រោងពង្រីកឆ្នេរថ្មីប្រវែង ២៧០០ ម៉ែត្រនៅខេត្តកែប បានបញ្ចប់ការចាក់ដីបំពេញ ១០០ ភាគរយ ខណៈអាជ្ញាធរកំពុងបន្តការដាំដើមឈើ និងការចាក់ខ្សាច់បន្ថែមរួមទាំងការស្ថាបនាហេដ្ឋារចនាសម្ព័ន្ធផ្សេងៗទៀតជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម ពិសិដ្ឋ អភិបាលនៃគណៈអភិបាលខេត្តកែបបានបញ្ជាក់ក្នុងសន្និសីទនៅទីស្តីការគណៈរដ្ឋមន្រ្តីនៅព្រឹកនេះថា គម្រោងអភិវឌ្ឍឆ្នេរថ្មីប្រវែង ២៧០០ ម៉ែត្រនៅខេត្តកែប មកដល់ពេលនេះបានបញ្ចប់ការចាក់ដីបំពេញ ១០០% ខណៈអាជ្ញាធរកំពុងបន្តការដាំដើមឈើ និងចាក់ខ្សាច់បន្ថែមរួមទាំងការស្ថាបនាផ្លូវក្នុងគម្រោងបន្តបន្ទាប់ទៀត។

«ការចាក់ដីបំពេញបានបញ្ចប់ ១០០ ភាគរយ នៅតែការចាក់ខ្សាច់បំពេញបន្ថែម និងការដាំដើមឈើនៅលើដីចំណីឆ្នេរតែប៉ុណ្ណោះ។ ក្នុងគម្រោងត្រូវចាក់បំពេញដីចូលសមុទ្រ ៥០ ម៉ែត្រ ៥០ ម៉ែត្រទៀតដាំដើមឈើ និង ៣០ ម៉ែត្រចាក់ខ្សាច់បំពេញបន្ថែម។ ការដាំឈើនឹងចាប់ផ្ដើមនៅខែវស្សានេះ និងការស្ថាបនាផ្លូវនឹងចាប់ផ្ដើមធ្វើនៅខែប្រាំង»។

លោកបន្តថា គម្រោងពង្រីកឆ្នេរថ្មីនេះមានការគិតគូររវាងអាជ្ញាធរខេត្ត និងគណៈកម្មការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជាដែលមានលោកជា សុផារ៉ា ជាប្រធានដឹកនាំ ក្នុងការកែលម្អអភិវឌ្ឍឆ្នេរថ្មីនេះ ធ្វើយ៉ាងណាឲ្យបានទាំងសោភ័ណភាព គុណភាព និងនិរន្តរភាព។

គម្រោងអភិវឌ្ឍន៍ឆ្នេរខ្សាច់កម្សាន្តសាធារណៈកម្រិតខ្ពស់នៅខេត្តកែប ក្រោមទម្រង់កិច្ចសន្យាអភិវឌ្ឍន៍រវាងរដ្ឋ និងឯកជន ក្នុងគោលដៅកែលម្អនិងបង្កើតឆ្នេរខ្សាច់កម្សាន្តសាធារណៈលម្អសាធារណៈ និងផ្ទៃបៃតងសម្រាប់ភ្ញៀវទេសចរជាតិនិងអន្តរជាតិ។

ឆ្នេរកម្សាន្តថ្មីនេះមានទីតាំងស្ថិតនៅភូមិថ្មី សង្កាត់ព្រៃធំ ក្រុងកែប ខេត្តកែប ដែលមានប្រវែង ២៧០០ម៉ែត្រ ក្នុងនោះមានឆ្នេរខ្សាច់កម្សាន្តសាធារណៈតាមបណ្ដោយឆ្នេរសមុទ្រមានទទឹងយ៉ាងតិចប្រវែង ៣០ មានការរៀបចំសួនច្បារសាធារណៈ និងដាំដើមឈើនៅលើដីចំណីឆ្នេរសមុទ្រមានទទឹងប្រវែង ៥០ ម៉ែត្រ។

គួរបញ្ជាក់ថា បច្នុប្បន្នខេត្តកែបមានឆ្នេរពីរកន្លែងសម្រាប់ពលរដ្ឋកម្សាន្តមួយហៅថាឆ្នេរស្រីស ដែលមានប្រវែងជាង ៣០០ ម៉ែត្រ និងឆ្នេរធម្មជាតិមួយទៀតគឺឆ្នេរអង្កោលមានប្រវែងជាង ២០០០ ម៉ែត្រ មានទីតាំងនៅស្រុកដំណាក់ចង្អើរ ដែលមិនទាន់ទទួលបានការអភិវឌ្ឍក្លាយជាឆ្នេរទេសចរពេញលេញនៅឡើយ៕

Related Topics:ខេត្តកែប លោក សោម ពិសិដ្ឋ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា