ព័ត៌មានជាតិ

កម្ពុជា-ចិនរៀបការសម្តែង Flash Mob “ខ្សែក្រវាត់និងផ្លូវ កម្ពុជាចិន ធ្វើដំណើរជាមួយគ្នា” នៅបរិវេណទីធ្លាខាងក្រោយសាលមហោស្រពចតុមុខរាជធានីភ្នំពេញ

បានផុស

៣ years មុន

នៅ

ថ្ងៃសុក្រ ៧ កក្កដា ២០២៣

ដោយ

ដើម្បីអបអរសាទរខួបគម្រប់១០ឆ្នាំ នៃការលើកឡើងនូវគំនិតផ្ដួចផ្ដើមខ្សែក្រវាត់ និងផ្លូវ និងខួបគម្រប់៦៥ឆ្នាំ នៃការបង្កើតចំណងការទូត កម្ពុជា-ចិន ក្រសួងវប្បធម៌និងវិចិត្រសិល្បៈ សមាគមនិស្សិតកម្ពុជា ប្រចាំសាធារណរដ្ឋប្រជាមានិតចិន និងវិទ្យុមិត្តភាពកម្ពុជាចិន នៃអគ្គស្ថានីយវិទ្យុនិងទូរទស្សន៍មជ្ឈិមចិន បានសហការគ្នារៀបចំការសម្ដែង Flash Mob “ខ្សែក្រវាត់និងផ្លូវ កម្ពុជា ចិន ធ្វើដំណើរជាមួយគ្នាអបអរសាទរខួបគម្រប់១០ឆ្នាំ នៃការលើកឡើងនូវគំនិតផ្ដួចផ្ដើម ខ្សែក្រវាត់និងផ្លូវ និងខួបគម្រប់៦៥ឆ្នាំ នៃការបង្កើតចំណងការទូតកម្ពុជា-ចិន ” នាថ្ងៃទី០៧ ខែកក្កដា នៅបរិវេណទីធ្លាខាងក្រោយសាលមហោស្រពចតុមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បទចម្រៀង ចិន ដូចជាបទ “Wo De Hao Xiong Di”(បងប្អូនល្អ) និងបទ”Shanghai Tan”(ឆ្នេរសៀងហៃ) និង ការសម្ដែងកម្មវិធី“ប្ដូររបាំងមុខ”របស់សិល្បករចិន ព្រមទាំង“របាំក្ងោកប៉ៃលិន” និង“របាំ ឆៃយ៉ាំមិត្តភាពកម្ពុជាចិន ”ដែល សម្ដែងដោយក្រុមសិល្បៈនៃក្រសួងវប្បធម៌និងវិចិត្រសិល្បៈ ទទួលបានការអបអរសាទរយ៉ាងខ្លាំងពីសំណាក់យុវជន កម្ពុជាដែលបានសិក្សានៅប្រទេសចិន។ ការច្រៀងចម្រៀងរួមគ្នារវាងសិល្បករ និងទស្សនិកជនធ្វើឱ្យបរិយាកាសកាន់តែ សប្បាយរីករាយ ។

លោក ឈាង ឆដាភ័ក្រ្ត ប្រធាននាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ បានចាត់ទុកថា ព្រឹត្តិការណ៍នេះ ពិតជាបានជំរុញដល់កិច្ចសហប្រតិបត្តិការរវាងកម្ពុជានឹងចិនកាន់តែរឹងមាំលើគ្រប់វិស័យ ជាពិសេសផ្នែកវប្បធម៌នៃប្រទេសទាំងពីរ។

តាមរយៈសិល្បៈទាំងពីរប្រទេសកម្ពុជាចិន យើងរំពឹងថា ចំណងមិត្តភាពរបស់យើងកាន់តែរឹងមាំបន្ថែមទៀត ជាទូទៅយើងតែងតែនិយាយថា ចំណងមិត្តភាពរបស់យើងជាចំណងមិត្តភាពដែកថែប ។ អ៊ីចឹងបន្ទាប់ពីខួប៦៥ឆ្នាំនេះទៅ តាមរយៈការផ្លាស់ប្តូរបទពិសោធន៍ផ្នែកវប្បធម៌ សិល្បៈកម្ពុជាចិន ចំណងមិត្តភាពយើងកាន់តែរឹងមាំអមតៈទៅមុខទៀត ។

ក្នុងចំណោមទស្សនិកជនជាច្រើននាក់ ដែលបានចូលរួមព្រឹត្តិការណ៍ ដ៏មានសារសំខាន់នេះ លោក សាន្ត វណ្ណដេត បានបង្ហាញអារម្មណ៍ភ្ញាក់ផ្អើល និងរំភើបចិត្តយ៉ាងខ្លាំង ចំពោះការរៀបចំការសម្តែង Flash Mob “ខ្សែក្រវាត់និងផ្លូវ កម្ពុជាចិន ធ្វើដំណើរជាមួយគ្នា”នេះ ។

លោកបានបញ្ជាក់ថា បើនិយាយពីទំនាក់ទំនងរវាងកម្ពុជា និងចិន គឺយើងបាននឹកឃើញភ្លាមដល់ សម្តេចព្រះនរោត្តម សីហនុព្រះរតនកោដ្ឋ អតីតព្រះមហាក្សត្រកម្ពុជា ដែលទ្រង់ជាអ្នកបង្កើតឱ្យទំនាក់ទំនងការទូតរវាងកម្ពុជា និងចិនជាផ្លូវការកាលពី៦៥ឆ្នាំមុន។

ព្រះបាទសម្តេចព្រះនរោត្តម សីហនុព្រះរតនកោដ្ឋ គឺជាព្រះមហាវិរក្សត្រ ដែលពុំមានអ្នកណាមកជំនួសទ្រង់បាននៅក្នុងដួងចិត្តប្រជាជនខ្មែរឡើយ។ គ្រប់ពូជនៃចំណងមិត្តភាពកម្ពុជាចិន ដែលព្រះអង្គបណ្តុះចេញ ប្រៀបបានទៅនឹងដើមឈើមួយដើម បានឆ្លងកាត់ព្យុះភ្លៀងអស់រយៈពេល៦៥ឆ្នាំ ឥឡូវនេះ បានធំលូតលាស់ក្លាយជាដើមឈើដ៏ធំស្កឹមស្កៃ។ មិត្តភាពកម្ពុជាចិនត្រូវតែស្នងបន្តពីមួយជំនាន់ទៅមួយជំនាន់ទៅមុខទៀត»។

សូមបញ្ជាក់ថា ប្រទេសកម្ពុជានិងចិនបានភ្ជាប់ទំនាក់ទំនងការទូតជាផ្លូវការជាមួយគ្នាកាលពីថ្ងៃទី១៩ ខែ កក្កដា ឆ្នាំ១៩៥៨។ រហូតមកដល់ពេលនេះការផ្លាស់ប្តូរទំនាក់ទំនងទេ្វភាគី បានបន្តនូវប្រវត្តិរឿងរ៉ាវជាគំរូល្អៗជាច្រើនក្នុងប្រវត្តិសាស្ត្រ ដែលត្រូវបានកូនចៅជំនាន់ក្រោយអនុវត្តបន្តពីមួយជំនាន់ទៅមួយជំនាន់ទៀត៕