ព័ត៌មានជាតិ

គណៈកម្មាធិការអចិន្ត្រៃយ៍រដ្ឋសភា កំណត់កាលបរិច្ឆេទបន្តសម័យប្រជុំរដ្ឋសភា លើកទី ១ នីតិកាលទី ៧ នាថ្ងៃទី ៣១ សីហាខាងមុខ

បានផុស

១០ ខែ មុន

នៅ

ថ្ងៃអង្គារ ២៩ សីហា ២០២៣

ដោយ

នៅព្រឹកថ្ងៃទី ២៩ ខែសីហា ឆ្នាំ ២០២៣ នេះ គណៈកម្មាធិការអចិន្ត្រៃយ៍រដ្ឋសភា នៃព្រះរាជាណាចក្រកម្ពុជា បានបើកកិច្ចប្រជុំក្រោមអធិបតីភាពដ៏ខ្ពង់ខ្ពស់ លោកស្រីកិត្តិសង្គហបណ្ឌិត ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា ដើម្បីពិភាក្សា និងអនុម័តលើរបៀបវារៈចំនួន ៤ ដោយក្នុងនោះក៏មានការកំណត់កាលបរិច្ឆេទបន្តសម័យប្រជុំរដ្ឋសភា លើកទី ១ នីតិកាលទី ៧ នាថ្ងៃទី ៣១ ខែសីហា ឆ្នាំ ២០២៣ ខាងមុខនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របៀបវារៈទាំង ៤ ដែលអង្គប្រជុំគណៈកម្មាធិការអចិន្ត្រៃយ៍រដ្ឋសភា បានលើកយកមកធ្វើការពិភាក្សា និងអនុម័ត ទទួលបាននូវលទ្ធផលដូចខាងក្រោម ៖

១-អង្គប្រជុំបានអនុម័តឯកភាពលើសំណើសុំផ្លាស់ប្ដូរតំណាងរាស្ត្រ នៃគណបក្សប្រជាជនកម្ពុជា ចំនួន ២៩ រូប តាមសំណើរបស់គណបក្សប្រជាជនកម្ពុជា។ ការប្រកាសសុពលភាព នៃអាណត្តិបេក្ខជនទាំង ២៩ រូប នឹងធ្វើឡើងនៅក្នុងសម័យប្រជុំរដ្ឋសភានាពេលខាងមុខនេះ។

២-អង្គប្រជុំបានអនុម័តលើរបាយការណ៍ ស្ដីពីលទ្ធផល នៃការទទួលពាក្យសុំឈរឈ្មោះជាបេក្ខជនសមាជិកក្រុមប្រឹក្សាធម្មនុញ្ញ ចំនួន ១ រូប សម្រាប់ជំនួស លោក សំ ព្រហ្មនា សមាជិកក្រុមប្រឹក្សាធម្មនុញ្ញ ដែលបានទទួលមរណភាព ជ្រើសតាំងដោយរដ្ឋសភា នីតិកាលទី ៧។

៣-អង្គប្រជុំបានអនុម័តយល់ព្រមលើសមាសភាពលេខាធិការសម័យប្រជុំរដ្ឋសភា លើកទី ១ នីតិកាលទី ៧ ចំនួន ៣ រូប ដែលមានរាយនាមដូចតទៅ ៖

-លោក ឃុត ចាន់ដារ៉ា អាយុ ៤២ ឆ្នាំ

-លោក ម៉ាត់ សេត អាយុ ៤២ ឆ្នាំ

-លោក សេង ញ៉ក់ អាយុ ៤៣ ឆ្នាំ

៤-អង្គប្រជុំបានអនុម័តយល់ព្រមលើកាលបរិច្ឆេទបន្តសម័យប្រជុំរដ្ឋសភា លើកទី ១ នីតិកាលទី ៧ នៅថ្ងៃព្រហស្បតិ៍ ទី ៣១ ខែសីហា ឆ្នាំ ២០២៣ វេលាម៉ោង ៨ និង ០០ នាទីព្រឹក ដែលមានរបៀបវារៈដូចខាងក្រោម ៖

៤-១.ការសម្រេចអំពីសុពលភាព នៃអាណត្តិ របស់បេក្ខជនជាប់ឆ្នោតតំណាងរាស្ត្រ នីតិកាលទី ៧ នៃរដ្ឋសភា ចំនួន ២៩ រូប ជំនួសតំណាងរាស្ត្រដែលបានសុំលាលែង។

៤-២.ការបោះឆ្នោតជ្រើសតាំង លោក យក់ ង៉ុយ ជាសមាជិកក្រុមប្រឹក្សាធម្មនុញ្ញ ជំនួស លោក សំ ព្រហ្មនា សមាជិកក្រុមប្រឹក្សាធម្មនុញ្ញ ដែលបានទទួលមរណភាព ជ្រើសតាំងដោយរដ្ឋសភា នីតិកាលទី ៧៕