ព័ត៌មានជាតិ

ឯកឧត្ដម ហ៊ុន ម៉ានី ៖ ឯកឧត្ដម ពេជ្រ ប៊ុនធិន ជាឥស្សរជនពោរពេញដោយចំណេះ ជំនាញ បទពិសោធ ឧត្ដមគតិស្នេហាជាតិ

បានផុស

១ year មុន

នៅ

ថ្ងៃសុក្រ ៦ តុលា ២០២៣

ដោយ

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បង្ហាញសុទិដ្ឋិនិយមថា ឯកឧត្ដមកិត្តិបណ្ឌិត ពេជ្រ ប៊ុនធិន គឺជាឥស្សរជនពោរពេញដោយចំណេះ ជំនាញ បទពិសោធ ប្រកបដោយឧត្ដមគតិស្នេហាជាតិ។

ការបង្ហាញសុទិដ្ឋិនិយមនេះ ក្នុងជំនួបរវាង ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ជាមួយ ឯកឧត្ដមកិត្តិបណ្ឌិត ពេជ្រ ប៊ុនធិន អតីតរដ្ឋមន្ត្រីក្រសួងមុខងារសាធារណៈ កាលពីថ្ងៃទី ៥ ខែតុលា ឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្ដម ហ៊ុន ម៉ានី បង្ហាញសុទិដ្ឋិនិយមដូច្នេះថា «អាយុមិនមែនត្រឹមជាតួលេខទេ តែបង្ហាញពីការឆ្លងកាត់បទពិសោធជាក់លាក់ នៃការវិវត្តរបស់សង្គម និងចំណេះដឹងនានា។ ឯកឧត្ដមកិត្តិបណ្ឌិត ពេជ្រ ប៊ុនធិន គឺជាឥស្សរជនពោរពេញដោយចំណេះ ជំនាញ បទពិសោធ ប្រកបដោយឧត្ដមគតិស្នេហាជាតិ»។

ឯកឧត្ដម ហ៊ុន ម៉ានី បានមានប្រសាសន៍ថា ក្នុងជំនួបនាព្រឹកថ្ងៃទី ៥ ខែតុលា នេះ ឯកឧត្ដមកិត្តិបណ្ឌិត ពេជ្រ ប៊ុនធិន បានផ្ដល់ដំបូន្មាន និងចែករំលែកចំណេះដឹងរបស់ ឯកឧត្ដម ជាច្រើន លើវិស័យមុខងារសាធារណៈ ដោយបានពន្យល់ពីការវិវត្ត និងភាពប្រឈមរបស់រដ្ឋបាលសាធារណៈកម្ពុជាក្នុងដំណាក់កាលនីមួយៗ នៃប្រវត្តិសាស្ត្រ ក្នុងនោះ (១) ១៩៥៣ ៖ ការប្រឈមនៅក្រោយសម័យអាណានិគមនិយមបារាំង បន្ទាប់ពីការចាកចេញភ្លាមៗ នៃមន្ត្រីរដ្ឋបាលបារាំង (២) ១៩៧៩ ៖ បញ្ហាប្រឈមក្នុងការដឹកនាំ និងគ្រប់គ្រងរដ្ឋបាលសាធារណៈនៅក្រោយសម័យខ្មែរក្រហមដែលធនធានមនុស្ស និងមន្ត្រីរាជការគ្រប់វិស័យ ត្រូវបានកាប់សម្លាប់ (៣) ១៩៩៣ ៖ ដែលកម្ពុជាត្រូវកែសម្រួលរចនាសម្ព័ន្ធរដ្ឋ និងសមាហរណកម្មសង្គមពីគ្រប់ភាគី។

ឯកឧត្ដម ហ៊ុន ម៉ានី បញ្ជាក់ថា ការប្រឈមទាំងអស់នេះ និងដំណោះស្រាយជាបន្តបន្ទាប់ ពិតជាទាមទារឲ្យមានភាពជាអ្នកដឹកនាំឆ្លើយតបនឹងស្ថានភាពជាក់ស្ដែង ជាមួយឥរិយាបថ និងសិល្បៈ ក្នុងការសម្របសម្រួលប្រកបដោយភាពចាស់ទុំ រហូតទើបយើងអាចមានការវិវឌ្ឍមកដល់សព្វថ្ងៃនេះ។

ឯកឧត្ដម ហ៊ុន ម៉ានី បន្ថែមថា ជារួម ប្រព័ន្ធដឹកនាំគ្រប់គ្រងមុខងារសាធារណៈដែលមានពេលបច្ចុប្បន្ននេះ មិនមែនកើតឡើងដោយឯកឯងនោះទេ ប៉ុន្តែដោយការលះបង់ និងកិច្ចខិតខំប្រឹងប្រែងរបស់ថ្នាក់ដឹកនាំគ្រប់ដំណាក់កាលទាំងអស់។ ចេញពីបទពិសោធដ៏ឆ្អិនឆ្អៅទាំងអស់នោះ ឯកឧត្ដមកិត្តិបណ្ឌិត បានណែនាំលើការដឹកនាំ និងអភិវឌ្ឍន៍វិស័យមុខងារសាធារណៈថា ឲ្យធ្វើយ៉ាងណា ត្រូវគោរពគោលការណ៍ច្បាប់ និងចំណាយពេលវេលាពន្យល់ អប់រំ ណែនាំ ហើយស្នើឲ្យមានការចូលរួមទាំងអស់គ្នា ដើម្បីការពារផលប្រយោជន៍សាធារណៈ (ប្រទេសជាតិ) ការពារផលប្រយោជន៍ក្រសួង ស្ថាប័ន និងការពារប្រយោជន៍មន្ត្រី។

ឯកឧត្ដមរដ្ឋមន្ត្រីក្រសួងមុខងារសាធារណៈ បន្ថែមទៀតថា ទាំងអស់នេះ ជាពុទ្ធិ និងបទពិសោធខ្វះមិនបានសម្រាប់ ឯកឧត្ដម ដែលជាអ្នកដឹកនាំជំនាន់ក្រោយ ឲ្យឈ្វេងយល់ ហើយបន្តសិក្សា រៀនសូត្រ ពីប្រវត្តិ នៃវិស័យនេះ បទពិសោធ និងទស្សនាទាននានា ដើម្បីបន្តវឌ្ឍនភាពវិស័យមុខងារសាធារណៈឆ្ពោះទៅមុខជាបន្តទៀត៕

អត្ថបទ ៖ ពិសី

Related Topics:ឯកឧត្ដម ហ៊ុន ម៉ានី