ព័ត៌មានជាតិ

ក្រសួងអប់រំ ហាមប្រើប្រាស់ទូរសព្ទដៃ ឧបករណ៍អេឡិចត្រូនិក ក្នុងថ្នាក់រៀន ឬ ម៉ោងសិក្សា មិនបម្រើឲ្យសកម្មភាពសិក្សា

បានផុស

៣ years មុន

នៅ

ថ្ងៃពុធ ២៥ តុលា ២០២៣

ដោយ

ក្រសួងអប់រំ យុវជន និងកីឡា បានហាមឃាត់ការប្រើប្រាស់ទូរសព្ទដៃ ឬ ឧបករណ៍អេឡិចត្រូនិកក្នុងថ្នាក់រៀន ឬ ម៉ោងសិក្សា ដែលមិនបម្រើឲ្យសកម្មភាពសិក្សាដោយគ្មានការអនុញ្ញាតពីគ្រូកំពុងបង្រៀន ជាពិសេសការលេងហ្គេម និងបណ្ដាញទំនាក់ទំនងសង្គម មិនពាក់ព័ន្ធនឹងសកម្មភាពសិក្សា។

យោងតាមសេចក្ដីណែនាំរបស់ក្រសួងអប់រំ ចុះថ្ងៃទី ២៤ តុលានេះ បានណែនាំដល់គ្រូកំពុងបង្រៀនក្នុងថ្នាក់ និងប្រធានថ្នាក់ ត្រូវណែនាំសិស្សក្នុងថ្នាក់ដែលប្រើប្រាស់ទូរសព្ទដៃ ឬ ឧបករណ៍អេឡិចត្រូនិកនាំឲ្យខាត ឬរំខានដល់ការសិក្សា។

ក្រសួង ក៏បានណែនាំបន្ថែមដល់មន្ទីរអប់រំ យុវជន និងកីឡារាជធានី ខេត្ត គណៈគ្រប់គ្រងគ្រឹះស្ថាន សិក្សាសាធារណៈទាំងអស់ រួមគ្នាពង្រឹងវិន័យ និងបង្កើនប្រសិទ្ធភាព នៃការប្រើប្រាស់ឧបករណ៍អេឡិចត្រូនិក ក្នុងបរិវេណគ្រឹះស្ថានសិក្សាសាធារណៈរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកគណៈគ្រប់គ្រងគ្រឹះស្ថានសិក្សា ត្រូវណែនាំជាប្រចាំអំពីវិន័យ និងបទបញ្ជាផ្ទៃក្នុងរបស់សាលារៀន ដល់សិស្សានុសិស្ស ពាក់ព័ន្ធនឹងការប្រើប្រាស់ទូរសព្ទដៃ និងឧបករណ៍អេឡិចត្រូនិក ឲ្យស្របនឹងគោលបំណង នៃការអប់រំ។ ក្រុមប្រឹក្សាកុមារ និងក្រុមប្រឹក្សាយុវជន ត្រូវចូលរួមណែនាំសមាជិក ឲ្យផ្តោតលើការសិក្សារៀនសូត ជាជាងការចំណាយពេលលើការលេងហ្គេម និងការប្រើប្រាស់បណ្ដាញទំនាក់ទំនងសង្គម ដែលមិនពាក់ព័ន្ធនឹងសកម្មភាពសិក្សា។

គណៈគ្រប់គ្រងគ្រឹះស្ថានសិក្សា ត្រូវជំរុញ និងលើកទឹកចិត្តឲ្យសិស្សមានទម្លាប់ធ្វើស្វ័យសិក្សា អាន និងស្រាវជ្រាវក្នុងបណ្ណាល័យ។ បង្កើត និងអនុវត្តការអប់រំក្រៅម៉ោងសិក្សា ដូចជាក្លិបសិក្សាតាមកម្រិតថ្នាក់ និងតាមមុខវិជ្ជា៕

អត្ថបទ ៖ សំអឿន