ប្រព័ន្ធលូបង្ហូរទឹកស្អុយនៅខេត្តរតនគិរី កំពុងជះក្លិនមិនល្អដល់ផ្លូវដង្ហើមប្រជាពលរដ្ឋ

ប្រព័ន្ធលូមួយកន្លែង នៅត្រង់ចំណុច ខាងជើងវត្តភ្នំស្វាយ ទល់មុខស្ថានីយ៍ប្រេងឥន្ធនៈតេលា ស្ថិតក្នុង ភូមិ៧មករា សង្កាត់ឡាបានសៀក ក្រុងបានលុង ខេត្តរតនគិរី បានកកស្ទះជាច្រើនខែឆ្នាំ ធ្វើឱ្យទឹកស្អុយហៀរហូរចេញមកខាងក្រៅពេញចិញ្ចើមផ្លូវ ជះក្លិនស្អុយសាយភាយបង្កឱ្យប៉ះពាល់ផ្លូវដង្ហើមប្រជាពលរដ្ឋ និងអ្នកធ្វើដំណើរយ៉ាងធ្ងន់ធ្ងរ។

ទាក់ទិនការលើកឡើងខាងលើនេះ លោក ឃឹម រមនី អនុប្រធាន មន្ទីរសាធារណការ និងដឹកជញ្ជូនខេត្តរតនគីរី បានឱ្យ កម្ពុជាថ្មី ដឹងថា លោកបានរាយការណ៍ជូនទៅថ្នាក់លើរួចហើយ។ លោក ឃឹម រមនី មិនបានបំភ្លឺបញ្ជាក់ថា នឹងត្រូវធ្វើ ឬក៏ជួសជុលយ៉ាងណានៅឡើយទេ។

កន្លងមកប្រព័ន្ធលូបង្ហូរទឹកស្អុយមួយកន្លែងនេះ ខាងមន្ទីរមន្ត្រីសាធារណការ និងដឹកជញ្ជូនខេត្ត ធ្លាប់បានជួសជុលម្តងរួចមកហើយ ប៉ុន្តែនៅតែស្ទុះទឹកមិនហូរ ហើយគម្របលូក៏បានបាក់សង្ស័យឡានដឹកប្រេងសាំងបើកបរឆ្លងកាត់ទីនោះ។ ទឹកហៀរហូរចេញមកខាងក្រៅនៅជាប់នឹងផ្លូវជាតិលេខ៧៨ ធ្វើឱ្យជះក្លិនមិនល្អដល់ប្រជាពលរដ្ឋ ដែលធ្វើដំណើរតាមដងផ្លូវ ជាពិសេសភ្ញៀវជាតិ និងអន្តរជាតិ ដែលចូលមកលេងកម្សាន្តនៅខេត្តរតនគីរី។

គួរឱ្យដឹងថា ហេដ្ឋារចនាសម្ព័ន្ធផ្លូវថ្នល់នៅតាមបណ្ដាស្រុកមួយចំនួន ជាពិសេសនៅក្នុងខេត្តរតនគិរី ត្រូវបានរៀបចំធ្វើខ្វែងខ្វាត់គ្រប់ទីកន្លែង ប៉ុន្ដែប្រព័ន្ធលូបង្ហូរទឹកមួយចំនួនមិនត្រូវបានរៀបចំឱ្យបានត្រឹមត្រូវ ដើម្បីរំដោះទឹកនោះទេ៕

អត្ថបទ៖ វុទ្ធឦសាន