១១ខែ៖ កម្ពុជា ចំណាយថវិកាជាង ២២ពាន់លានដុល្លារ នាំចូលទំនិញពីបរទេស ថយចុះ ៥.៤ភាគរយ

គិតត្រឹមរយៈពេល ១១ខែ ឆ្នាំ ២០២៣ កម្ពុជា បានចំណាយថវិកាប្រមាណជាង ២២ពាន់លានដុល្លារ នាំចូលទំនិញ​ពីទីផ្សារបរទេសយកមកផ្គត់ផ្គង់ក្នុងស្រុក ធ្លាក់ចុះ ៥.៤ភាគរយ បើធៀបនឹងឆ្នាំ ២០២២ មានចំនួនជាង ២៣ពាន់​លានដុល្លារ ខណៈការនាំចេញទៅទីផ្សារអន្តរជាតិសរុបមានចំនួនជាង ២០ពាន់លានដុល្លារ។ នេះបើតាម​អគ្គនាយកដ្ឋានគយ និងរដ្ឋាករកម្ពុជា។

ចិនគឺជាប្រទេសដែលកម្ពុជា នាំចូលទំនិញច្រើនជាងគេ មានចំនួនជិត ១០ពាន់លានដុល្លារ កើនឡើងជាង ៣ភាគរយ រយៈពេល ១១ខែ ឆ្នាំ ២០២៣។ ជាមួយគ្នានេះ វៀតណាម បានាំចូលទំនិញមកកម្ពុជា គិតជាទឹកប្រាក់ប្រមាណ ៣,២ពាន់លានដុល្លារ ធ្លាក់ចុះជិត ១០ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួនជាង ៣,៦ពាន់លានដុល្លារ។

ដោយឡែកកម្ពុជា នាំចូលទំនិញពីថៃ មានចំនួនជាង ២,៦ពាន់លានដុល្លារ ថយចុះជាង ២១ភាគរយ បើធៀបនឹងឆ្នាំ ២០២២ មានចំនួនជាង ៣,៣ពាន់លានដុល្លារអាមេរិក។ ចំណែការនាំចូលពីទីផ្សារអាមេរិកគិតជាទឹកប្រាក់​មានចំ​នួនតែជាង ២២២លានដុល្លារប៉ុណ្ណោះ។

សម្រាប់ការនាំចូលទំនិញក្នុងខែ វិច្ឆិកា មានចំនួនជិត ២ពាន់លានដុល្លារ កើនឡើង ១,២ភាគរយ បើធៀបនឹងឆ្នាំ ២០២២។

ទំនិញដែលកម្ពុជា នាំចូលច្រើន មានដូចជា យានយន្ត ប្រេងឥន្ធនៈ សម្ភារៈប្រើប្រាស់ បរិក្ខារអគ្គិសនី សម្ភារសំណង់ និងវត្ថុធាតុដើមសម្រាប់កែច្នៃនាំចេញ ដែលភាគច្រើន បាននាំចូលពីប្រទេសចិន។ នេះបើតាមការបញ្ជាក់របស់អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា។

បើតាមអ្នកឧកញ៉ា លឹម ហេង ធ្លាប់បានថ្លែងប្រាប់កម្ពុជាថ្មីថា ការនាំចូលទំនិញមានការធ្លាក់ចុះនេះ មានពីរកត្តា គឺទី១. ការធ្លាក់ចុះតម្រូវការវត្ថុធាតុផ្នែកសំណង់ ដោយសារវិស័យនេះ មានការថយចុះក្នុងការ​សាងសង់ដែលធ្វើឱ្យការ​នាំចូល​ក៏មានការធ្លាក់ចុះផងដែរ និងទី២. កម្ពុជា មានរោងចក្រសហគ្រាសជាច្រើន ដែលអាចផលិត និងផ្គត់ផ្គង់វត្ថុ​ធាតុដើម បរិក្ខារ សម្ភារៈ របស់ប្រើប្រាស់ផ្សេងៗ ផលិតបានដោយខ្លួនឯង។

លោកឧកញ៉ា​ លឹម ហេង បានសង្កត់ធ្ងន់ថា «ទៅថ្ងៃអនាគត ការនាំចូលទំនិញពីក្រៅប្រទេសកាន់តែមានការថយចុះ ព្រោះកម្ពុជា បានបង្កើនការផលិត ដោយមានការវិនិយោគទាំងក្នុងស្រុក និងមកពីបរទេស ដើម្បីបង្កើនការនាំចេញ​តាមរយៈកិច្ចព្រមព្រៀង​ពាណិជ្ជកម្មផ្សេងៗ»។

សូមបញ្ជាក់ថា គិតត្រឹមរយៈពេល ១១ខែ ឆ្នាំ ២០២៣ ទំហំពាណិជ្ជកម្មរវាងកម្ពុជា អន្តរជាតិ មានចំនួនជាង ៤២ពាន់​លានដុល្លារ។ ក្នុងនោះ ទំហំពាណិជ្ជកម្មជាមួយចិន មានចំនួនច្រើនជាងគេ ប្រមាណជាង ១១ពាន់លានដុល្លារ , អាមេរិក ៨,៣ពាន់លានដុល្លារ, វៀតណាម មានចំនួនជាង ៥,៨ពាន់លានដុល្លារ , ថៃ ៣,៣ពាន់លានដុល្លារ និងជប៉ុន មានចំនួនជាង ១,៦ពាន់លានដុល្លារ។ នេះបើតាមរបាយការណ៍គយ និងរដ្ឋាករកម្ពុជា៕