សេដ្ឋកិច្ច

កម្ពុជាចំណាយជាង ១,៦ ពាន់លានដុល្លារ ក្នុងការនាំចូលប្រេង

បានផុស

៦ ខែ មុន

នៅ

ថ្ងៃសុក្រ ២៣ មករា ២០២៦

ដោយ

កម្ពុជាបានចំណាយប្រាក់ជាង ១,៦៨ ពាន់លានដុល្លារ លើការនាំចូលប្រេងឥន្ធនៈ និងប្រេងម៉ាស៊ូត ដើម្បីផ្គត់ផ្គង់ការប្រើប្រាស់ក្នុងស្រុក កាលពីឆ្នាំ ២០២៥ ធ្លាក់ចុះប្រមាណ ១១% ធៀបនឹងឆ្នាំ ២០២៤ ឆ្លុះបញ្ចាំងពីដំណើរការដឹកជញ្ជូន និងការផ្លាស់ប្ដូរឥរិយាបទរបស់អ្នកប្រើប្រាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យពីក្រសួងពាណិជ្ជកម្ម តម្លៃនាំចូលប្រេងសរុបនោះ ការនាំចូលប្រេងម៉ាស៊ូតមានតម្លៃជាង ១,២៥ ពានលានដុល្លារ ធ្លាក់ចុះ ១១% និងប្រេងសាំង មានតម្លៃ ៨៤០ លានដុល្លារ ធ្លាក់ចុះ ១១,២៤%។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ប្រាប់កម្ពុជាថ្មីថា ដើមឡើយយើងវាយតម្លៃលើប្រេងទៅលើកំណើនចរាចរសេដ្ឋកិច្ចក្នុងប្រទេស កំណើនប្រើប្រាស់ប្រេងមានន័យថា ដំណើរការដឹកជញ្ជូន សេដ្ឋកិច្ច ឬសេវាកម្ម វាដើរ ប៉ុន្តែឥឡូវ ដំណើរការសេដ្ឋកិច្ចពិបាកប៉ាន់ស្មានដោយសារប្រេងណាស់។

អ្នកឧកញ៉ាបានបន្ថែមថា ការនាំចូលប្រេងធ្លាក់ចុះ បណ្ដាលមកពីប្រជាពលរដ្ឋ និងរោងចក្រមួយចំនួន គាត់ប្រើអគ្គិសនីជំនួសដោយប្រេង ជាពិសេសគឺយានយន្ត ឥឡូវយើងឃើញហើយ វាច្រើនតែប្រើរថយន្តអគ្គិសនី ជំនួសដោយប្រេង។

អ្នកឧកញ៉ា លឹម ហេង លើកឡើងថា៖ «វាមិនប៉ះពាល់ដល់កំណើនសេដ្ឋកិច្ចយើងទេ កំណើនសេដ្ឋកិច្ចយើងនៅតែកើនហើយថាមពលបៃតងមកជំនួស ថាមពលវារីអគ្គិសនីដែលកម្ពុជាកំពុងបង្កើនជាង ៦០% នៅទូទាំងប្រទេសទៅហើយ ដល់អញ្ចឹងការនាំចូលប្រេងនឹងថយចុះជាបណ្ដើរៗ»។

កម្ពុជាមានគោលបំណងបង្កើនចំណែកថាមពលកកើតឡើងវិញរបស់ខ្លួនឱ្យបានយ៉ាងហោចណាស់ ៧០ ភាគរយ ត្រឹមឆ្នាំ ២០៣០ ដោយរួមចំណែកដល់គោលដៅបរិស្ថាន និងកំណើនសេដ្ឋកិច្ច ដោយផ្តោតលើប្រសិទ្ធភាពថាមពល៕

អត្ថបទ៖ ឡេង ដេត