ព័ត៌មានជាតិ

យុវជន គាំទ្រយ៉ាងខ្លាំងចំពោះជំហរមុតមាំរបស់ថ្នាក់ដឹកនាំកម្ពុជាលើការបន្ត បិទព្រំដែន ខណៈទំនិញខ្មែរក្នុងស្រុកមានគ្រប់គ្រាន់សម្រាប់ប្រើប្រាស់

បានផុស

៩ ខែ មុន

នៅ

ថ្ងៃសុក្រ ៣ តុលា ២០២៥

ដោយ

យុវជនកម្ពុជា សម្តែងការគាំទ្រយ៉ាងខ្លាំងចំពោះជំហរមុតមាំរបស់ថ្នាក់ដឹកនាំកម្ពុជាលើការសម្រេចបន្តបិទព្រំដែនកម្ពុជា-ថៃ ខណៈការបិទនេះ នឹងធ្វើឲ្យទំនិញខ្មែរកាន់តែផុលផុសខ្លាំងសម្រាប់ប្រជាជនប្រើប្រាស់ និងមានផលិតផលប្រើប្រាស់គ្រប់គ្រាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមយុវជន លើកឡើងថា ការសម្រេចចិត្តរបស់ថ្នាក់ដឹកនាំដែលមាន សម្តេចតេជោ ហ៊ុន សែន និង សម្តេចធិបតី ហ៊ុន ម៉ាណែត ក្នុងការបន្តបិទព្រំដែនរវាងប្រទេសទាំង ០២ គឺជាការសម្រេចចិត្តដ៏ត្រឹមត្រូវបំផុត ព្រោះភាគីថៃជាអ្នកបិទច្រកព្រំដែនជាឯកតោភាគីមុន។

យុវជនបន្ថែមថា ដោយសារកត្តាបិទព្រំដែន ហើយពុំមានទំនិញសៀមចូលមកក្នុងដីខ្មែរនេះហើយ ទើបធ្វើឲ្យខ្មែរងាកមកគាំទ្រផលិតផលរបស់ខ្មែរ ស្ទើរតែពាសពេញប្រទេស ខណៈទំនិញខ្មែរ ក៏ជាផលិតផលដែលមានគុណភាពល្អ មិនចាញ់ផលិតផលប្រទេសដទៃនោះឡើយ។ ជាពិសេសនោះ ជួយលើកស្ទួយសេដ្ឋកិច្ចដល់ប្រជាពលរដ្ឋ និងម្ចាស់អាជីវកម្មក្នុងស្រុកផងដែរ។

សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានគណបក្សកាន់អំណាច ធ្លាប់បានបញ្ជាក់ថា ជំហររបស់កម្ពុជា នឹងមិនផ្លាស់ប្ដូរទេ ហើយកម្ពុជាក៏មិនធ្វើថោកទៅសុំថៃបើកច្រកព្រំដែននោះដែរ។ ថៃ អាចបន្តបិទ ១០០ ឆ្នាំទៀត ក៏កម្ពុជាមិនស្លាប់ដែរ។

សម្តេចតេជោ បានអរគុណទៅភាគីថៃ ដែលតាមរយៈការបិទព្រំដែនជាឯកតោភាគីនេះ ធ្វើឲ្យទំនិញថៃនាំចូលមកមិនបាន ហើយបានធ្វើឲ្យទំនិញកម្ពុជាដែលផលិតក្នុងស្រុកមានការរីកចម្រើនយ៉ាងខ្លាំង។ ប្រជាជនកម្ពុជាដែលស្រឡាញ់ជាតិនាំគ្នាគាំទ្រប្រើប្រាស់ទំនិញក្នុងស្រុក ដែលនេះនឹងគាំទ្រដល់ការរីកចម្រើនខាងសេដ្ឋកិច្ចសម្រាប់រយៈពេលវែងផងដែរ៕

អត្ថបទ ៖ សុភា