ក្រុមហ៊ុនបរទេស​មួ​យ​ផលិត​ស្រាស​ខ្មែរ​​តាម​ស្តង់ដានាំ​ចេញទៅ​បរទេស

ក្រុមហ៊ុន Pernod Ricard Cambodge បាន​កំពុង​ផលិត កែច្នៃ ស្រា​ស​ខ្មែរ​នាំ​ចេញទៅ​លក់នៅ​ក្រៅ​ប្រទេស។

ក្នុង​ជំនួប​ពិភាក្សាការងារ​ជាមួយលោក ស៊ុន ចាន់ថុល កាល​ពី​ម្សិលមិញ លោក Ong Daren នាយកគ្រប់គ្រងនៃក្រុមហ៊ុន Pernod Ricard Cambodge ដែលជាក្រុមហ៊ុនវិនិយោគលើការផលិតកែច្នៃប្រភេទស្រាអង្ករខ្មែរ​បាន​គូស​បញ្ជាក់ថា Pernod Ricard Cambodge ជាបុត្រសម្ព័ន្ធនៃក្រុមហ៊ុន Pernod Ricard ដែលជាក្រុមហ៊ុនផលិតស្រា​មានប្រតិបត្តិការនៅប្រមាណ ៨៦ សាខា និងមានផលិតផលអន្តរជាតិជាម៉ាកល្បីៗដូចជា Absolut Vodka, Martell Cognac, Mumm Champagne, The Glenlivet និង Chivas Regal whiskey ជាដើម។

ទាក់ទង​ដំណើរការអាជីវកម្ម​នៅ​​កម្ពុជា លោក​ថា ក្រុមហ៊ុន Pernod Ricard Cambodge បានចុះបញ្ជីនៅកម្ពុជា​ក្នុងឆ្នាំ២០១៧ ដើម្បីវិនិយោគលើការផលិត កែច្នៃ ស្រាអង្កររបស់ខ្មែរ​​​។

លោក​បន្ត​ថា ការ​ផលិត​របស់ក្រុមហ៊ុនមានវិធានការត្រួតពិនិត្យគុណភាព និងសុវត្ថិភាព សំដៅឱ្យតម្លៃលើផលិតផលនិងរសជាតិដើមនៃស្រាអង្ករ ស្រា-ស ខ្មែរ​​ស្រប​តាម​ស្តង់ដា​បច្ចេកទេស​​​ដើម្បី​នាំ​ចេញទៅក្រៅប្រទេស៕