ព័ត៌មានជាតិ

បុណ្យចេតិយអ្នកឧកញ៉ា មហា ភក្តីសប្បុរិស ភោគាធិបតី ហ៊ុន នាង និង មហាឧបាសិកា ឌី ប៉ុក នៅវត្តព្រះបារមីវង្កតបុរី

បានផុស

២ years មុន

នៅ

ថ្ងៃអាទិត្យ ១០ មីនា ២០២៤

ដោយ

ចេតិយរបស់អ្នកឧកញ៉ា មហា ភក្តីសប្បុរិស ភោគាធិបតី ហ៊ុន នាង និង មហាឧបាសិកា ឌី ប៉ុក មាតា បិតារបស់ សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នៅវត្តព្រះបារមីវង្កតបុរី ស្ថិតនៅសង្កាត់ទឹកថ្លា ខណ្ឌសែនសុខ ដែលបានសម្រួល និងជួសជុលជាថ្មី ត្រូវបានធ្វើពិធីបុណ្យពុទ្ធាភិសេក និងឆ្លងទៅតាមបែបព្រះពុទ្ធសាសនា នាព្រឹកថ្ងៃទី ១០ ខែមីនា ឆ្នាំ ២០២៤ នេះ។

ពិធីបុណ្យនេះបានធ្វើឡើងដោយមានការអញ្ជើញចូលរួមពី លោកជំទាវ ហ៊ុន ស៊ីណាត ,លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និង ឯកឧត្ដម ហ៊ុន ម៉ានី ឧបនាយករដ្ឋមន្ត្រី ,ឯកឧត្ដម ហ៊ុន ម៉ានិត, លោកជំទាវ ហ៊ុន ម៉ាលី កូនរបស់ សម្ដេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និង លោក នេត សាវឿន ,លោក ឃួង ស្រេង អភិបាលរាជធានីភ្នំពេញ និងលោកស្រី ព្រមទាំងកូនចៅ ញាតិសន្ដានរបស់ត្រកូល ហ៊ុន ជាច្រើនរូបទៀត។

ក្នុងពិធីនេះមាននមស្ការព្រះរតនត្រ័យ សមាទានសីល បង្វិលពពិលជុំវិញចេតិយ ប្រគេនទេយ្យទានចំពោះព្រះសង្ឃ ,និមន្តព្រះសង្ឃចម្រើនព្រះបរិត្ត ដោយបាននិមន្តចូលរួមពី សម្តេចព្រះវនរ័ត កិត្តិបណ្ឌិត ណយ ច្រឹក សម្តេចព្រះសង្ឃនាយករងទី ២ នៃព្រះរាជាណាចក្រកម្ពុជា ចូលរួមផងដែរ។

គួរបញ្ជាក់ថា អ្នកឧកញ៉ា មហា ភក្តីសប្បុរិស ភោគាធិបតី ហ៊ុន នាង កើតឡើង ២៧ ខែ ០៨ ឆ្នាំ ១៩២៣ និងបានទទួលមរណភាព កាលពីថ្ងៃទី ១២ ខែ ០៧ ឆ្នាំ ២០១៣ ក្នុងជន្មាយុ ៩០ ឆ្នាំ។ ចំណែក មហាឧបាសិកា ឌី ប៉ុក កើតនៅថ្ងៃទី ១៧ ខែ ០៦ ឆ្នាំ ១៩១៩ និងបានទទួលមរណភាព កាលពីថ្ងៃទី ១០ ខែ ០៣ ឆ្នាំ ១៩៩៨។ អ្នកមានគុណទាំង ២ របស់ សម្ដេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ត្រូវបានដង្ហែមកតម្កល់ទុកនៅក្នុងចេតិយវត្តព្រះបារមីវង្កតបុរី ស្ថិតនៅសង្កាត់ទឹកថ្លា ខណ្ឌសែនសុខនេះ ដើម្បីគោរពបូជា៕

អត្ថបទ ៖ ស្រីរ័ត្ន