សម្ដេចតេជោ ហ៊ុន សែន ជឿជាក់ថា ព្រឹទ្ធសភានឹងដំណើរការល្អ ក្រោយជួបសមាជិកព្រឹទ្ធសភា មកពីគណបក្សឆន្ទៈខ្មែរជាង ៣ ម៉ោង

សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ​នៅព្រឹកថ្ងៃទី ​១៨ ខែមេសា ​ឆ្នាំ ២០២៤ ​នេះ ​បានជួបសន្ទនាជាមួយ​ លោក គង់ មុនីកា សមាជិកព្រឹទ្ធសភាមកពីគណ​បក្សឆន្ទៈ​ខ្មែរ​ និងសមាជិកព្រឹទ្ធសភាពីររូបទៀតគឺលោក សុក ហាច និងលោក សេង ម៉ាឌី។

សម្ដេចតេជោ ហ៊ុន សែន មានប្រសាសន៍ថា រយៈពេលជាង៣ម៉ោងនៃការសន្ទនា​ប្រកប​ដោយ​ភាពស្មោះត្រង់ស្និទ្ធស្នាលគោរពគ្នាទៅវិញទៅមក ធ្វើឲ្យសម្ដេចជឿជាក់​ថា ព្រឹទ្ធសភានឹង​ដំណើរ​ការល្អ ខណៈថ្នាក់ដឹកនាំសភាទាំងអស់ក៏បានជូនពរគ្នា​ក្នុងឱកាសបុណ្យចូលឆ្នាំថ្មីកន្លងមក។

កាលពីថ្ងៃទី ០៣ ខែមេសា ឆ្នាំ ២០២៤ អង្គព្រឹទ្ធសភា ដែលវត្តមានសមាជិក សមាជិកាសរុប ៦២រូប បានបោះឆ្នោតជ្រើសរើសសម្ដេចតេជោ ហ៊ុន សែន ​ជាប្រធានព្រឹទ្ធសភា សម្រាប់នីតិកាលទី ០៥៕