លោក មាស វីរិទ្ធ៖ ការចូលរួមអំពាវនាវ និងទាញយក App NoDrug មកប្រើប្រាស់នាំឱ្យបញ្ហាគ្រឿងញៀនថយចុះ

នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន ថា ការចូលរួមតាមការអំពាវនាវ និងទាញយក App NoDrug មកប្រើប្រាស់នាំឱ្យបញ្ហាគ្រឿងញៀននៅមូលដ្ឋានថយចុះ។

លោក​នាយឧត្តមសេនីយ៍ បានលើកឡើងបែបនេះ ក្នុងឱកាសដឹកនាំកិច្ចប្រជុំផ្សព្វផ្សាយសេចក្តីសម្រេចលេខ០០៦ សសរ.អ.ជ.ប.គ.ញ.ចុះថ្ងៃទី២៤ ខែឧសភា ឆ្នាំ២០២៤ ស្តីពីការបង្កើតគណ:គ្រប់គ្រងកម្មវិធីទូរស័ព្ទដៃNodrug របស់អាជ្ញាធរជាតិប្រយុទ្ធប្រឆាំងគ្រឿងញៀន នៅព្រឹកថ្ងៃទី៣១ ខែឧសភា ឆ្នាំ២០២៤ ជាការប្រជុំដោយផ្ទាល់ និងពីចំងាយ Zoom ដែលមានអ្នកចូលរួមពីថ្នាក់ជាតិ និងក្រោមជាតិ (រាជធានី ខេត្ត ខណ្ឌ ក្រុង ស្រុក)។

លោកអគ្គលេខាធិការ បានសាទរ លើកទឹកចិត្តឱ្យចូលរួម បំផុសឱ្យបន្តផ្សព្វផ្សាយនូវសេចក្តីអំពាវនាវ ជំរុញការទាញយកកម្មវិធី App Nodrug ពីសំណាក់សាធារណជន ពិសេស យុវជន ដើម្បីទទួលចំណេះដឹង រាយការណ៍ករណីគ្រឿងញៀនក្នុងមូលដ្ឋាន ដើម្បីចូលរួមធ្វើឱ្យសម្រេចបាននូវឆន្ទ:ដ៏មុតស្រួចរបស់រាជរដ្ឋាភិបាលនីតិកាលទី៧ ដឹកនាំសម្តេចមហាបវរធិបតី ហ៊ុន ម៉ាណែត កាត់បន្ថយ និងឈានទៅលុបបញ្ហាគ្រឿងញៀន “រួមគ្នាដើម្បីជិវិត និងសហគមន៍គ្មានគ្រឿងញៀន”។

ជាមួយគ្នានោះ លោកនាយឧត្តមសេនីយ៍ បានបន្តថា ការចូលរួមតាមការអំពាវនាវ និងទាញយក App NoDrug មកប្រើប្រាស់របស់សាធារណជនមានន័យថា ចូលរួមការងារប្រយុទ្ធប្រឆាំងគ្រឿងញៀន និងនាំឱ្យបញ្ហាគ្រឿងញៀននៅមូលដ្ឋានថយចុះ ហើយអាជ្ញាធរមានសមត្ថកិច្ចគ្រប់ថ្នាក់ត្រូវតែចូលរួមដោះស្រាយនូវព័ត៌មានដែលផ្តល់ដោយប្រជាពលរដ្ឋមកកាន់ App Nodrug៕