ឧត្តមសេនីយ៍ឯក លឹម តុងហួត ៖ ព្រឹត្តិការណ៍ប្រកួតវោហាកោសល្យបានផ្ដល់ចំណេះដឹងពីបញ្ហាគ្រឿងញៀន និងបារីអេឡិចត្រូនិក

ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណ: នៃអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា ព្រឹត្តិការណ៍ «ប្រកួតវោហាកោសល្យ» បានផ្ដល់ចំណេះដឹងពីបញ្ហាគ្រឿងញៀន, App NoDrug , និងបារីអេឡិចត្រូនិក ដល់យុវជន ជាពិសេសនិស្សិតដែលជាទំពាំងស្នងឬស្សី។

លោកបានលើកឡើងបែបនេះ នៅក្នុងកម្មវិធីប្រកួតវោហាកោសល្យរបស់និស្សិតនៃ វិទ្យាស្ថានជាតិកសិកម្មព្រែកលៀប កាលពីថ្ងៃទី​០៣ ខែមេសា ឆ្នាំ ២០២៦ ដែលមានអ្នកចូលរួមជាង២០០នាក់។

ក្នុងឱកាសនោះ លោក លឹម តុងហួត បានថ្លែងកោតសសើរដល់ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ព្រមទាំងអ្នកពាក់ព័ន្ធដែលបានផ្តល់កិច្ចសហការរៀបចំការប្រកួតឱ្យទទួលបានជោគជ័យហើយនិស្សិតទាំងអស់ទទួលបានចំណេះដឹងពីបញ្ហាគ្រឿងញៀន និងអត្ថប្រយោជន៍ពីការប្រើប្រាស់App NoDrug និងបារីអេឡិចត្រូនិក។ លោកមានប្រសាសន៍ថា៖«ពួកគាត់អាចជាសកម្មជនថ្មីចូលរួមជួយដល់ការងារផ្សព្វផ្សាយ អប់រំ ” ខ្ញុំនិងអ្នក មិត្តខ្ញុំនិងមិត្តអ្នក មិនប្រើគ្រឿងញៀន សហគមន៍យើងនឹងមានសុវត្ថិភាព»។

ចំណែកលោក ឡោ រស្មី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ក៏បានថ្លែងកោតសរសើរដល់គ្រប់ភាគីពាក់ព័ន្ធ ពិសេសនិស្សិតវិទ្យាស្ថានជាតិកសិកម្មព្រែកលៀប ដែលបានខិតខំប្រកបដោយមនសិកាស្នេហាជាតិ ស្រឡាញ់សង្គម ជួយសង្គម តាមរយ:ការចូលរួមយ៉ាងស្រួចស្រាល សហការគ្នា សាមគ្គីគ្នា ធ្វើការជាក្រុមនិងចូលរួមឆ្លើយតបនៅប្រធានបទចំនួន៣។

ប្រធានបទទាំងនោះរួមមាន  ១.តួនាទីយុវជនក្នុងការងារយុទ្ធប្រឆាំងគ្រឿងញៀន ២.អត្ថប្រយោជន៍ App NoDrug និង ៣.ផលវិបាកនៃបារីអេឡិចត្រូនិច។ ការប្រកួតវោហាកោសល្យនេះ ក្រុមនីមួយៗបានធ្វើបទបង្ហាញយ៉ាងផុសផុល ពាក់ព័ន្ធគ្រោះថ្នាក់នៃគ្រឿងញៀន និងបារីអេឡិចត្រូនិក​ នៅក្នុងសង្គម។

ក្នុងឱកាសនោះដែរ លោក ឡោ រស្មី លើកទឹកចិត្តដល់អ្នកចូលរួមឱ្យយកចំណេះដឹងដែលទទួលបាននេះទៅផ្សព្វផ្សាយបន្តបន្ថែមទៀតដើម្បីរួមគ្នាកសាងបាននូវសហគមន៍មួយមានសុវត្ថិភាពពីគ្រឿងញៀន មានការអភិវឌ្ឍរីកចម្រើនបន្ថែមទៀត៕