ស្តេចប្រដាល់ ម៉ានី ផាកគីអាវ មកកម្សាន្តនៅខេត្តសៀមរាប ជាចំណែកជួយផ្សព្វផ្សាយទេសចរណ៍កម្ពុជា

ក្រោយចូលជួបសម្តែងការគួរសម និងពិភាក្សាការងារជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រួចមក នៅថ្ងៃទី០១ ខែមិថុនា ឆ្នាំ២០២៤ លោក ម៉ានី ផាកគីអាវ (Manny Pacquiao) កំពូលកីឡាករប្រដាល់ និងជាអតីតសមាជិកព្រឹទ្ធសភានៃប្រទេសហ្វីលីពីន ព្រមទាំងភរិយា ក៏បានបន្តដំណើរទៅកាន់ខេត្តសៀមរាប ហើយបានអញ្ជើញទស្សនាប្រាសាទអង្គរវត្ត ប្រាសាទបាយ័ន និងប្រាសាទតាព្រហ្ម ក្នុងតំបន់រមណីយដ្ឋានអង្គរ ដើម្បីស្វែងយល់អំពីរចនាបថ ស្ថាបត្យកម្មសំណង់ប្រាសាទរបស់កម្ពុជា ដែលជាសម្បត្តិបេតិកភណ្ឌដ៏អស្ចារ្យក្នុងពិភពលោក។

ដំណើរទស្សនកិច្ចរបស់ លោក ម៉ានី ផាកគីអាវ រួមជាមួយភរិយា បានចូលរួមចំណែកយ៉ាងសំខាន់ក្នុងការផ្សព្វផ្សាយពីតំបន់ទេសចរណ៍វប្បធម៌ និងភាពទាក់ទាញរបស់កម្ពុជាទៅកាន់ពិភពលោក ជាពិសេស សកម្មភាពនេះក៏ជាផ្នែកមួយនៃការជំរុញផ្សព្វផ្សាយយុទ្ធនាការ ឆ្នាំទស្សនាសៀមរាប២០២៤៕

ដោយ៖ជុន កុសល