មន្ទីររ៉ែ និងថាមពល ខេត្តព្រះវិហារ បន្តលុបបំបាត់សកម្មភាពជីករ៉ែអនាធិបតេយ្យ

នៅថ្ងៃទី២២ ខែមិថុនា ឆ្នាំ២០២៤ ក្រុមការងារមន្ទីររ៉ែ និងថាមពល ខេត្តព្រះវិហារ សហការជាមួយ ព្រះរាជអាជ្ញាអមសាលាដំបូងខេត្ត រដ្ឋបាលស្រុករវៀង និងកងរាជអាវុធហត្ថស្រុករវៀង បានចុះបង្ក្រាប និងកាយលុបរណ្ដៅរ៉ែមាសអណាធិបតេយ្យនៅតំបន់ឈើភ្លើង ស្ថិតក្នុងភូមិភ្នំដែក ឃុំរមទម ស្រុករវៀង ខេត្តព្រះវិហារ។ នេះបើតាមសំណេរនៅលើបណ្ដាញទំនាក់ទំនងសង្គមរបស់ក្រសួងរ៉ែ និងថាមពល។

ក្នុងប្រតិបត្តិការនេះ មន្ទីរបង្រ្កាបអណ្តូងរ៉ែបញ្ឈរចំនួន ០៣រណ្តៅ ក្នុងនោះរណ្ដៅទី១ ទំហំ ១ម៉ែត្រ x ៣ម៉ែត្រ  ជម្រៅ ៣ម៉ែត្រ ចំណែករណ្ដៅទី២ ទំហំ ២ម៉ែត្រ x ៥ម៉ែត្រ ជម្រៅ ៥ម៉ែត្រ រីឯរណ្ដៅទី៣ ទំហំ ១ម៉ែត្រx ១.៥ម៉ែត្រ ជម្រៅ ៣ម៉ែត្រ និងរោងស្នាក់នៅទំហំ ៣ម៉ែត្រ x ៨ម៉ែត្រ។  ដោយក្រុមការងារជំនាញ កាយបំផ្លាញរណ្ដៅទាំង០៣  និងរោងស្នាក់នៅចោល។

ក្រសួងរ៉ែ និងថាមពល អះអាងថានឹងបន្តសកម្មភាពទប់ស្កាត់ និងលុបបំបាត់សកម្មភាពរ៉ែអនាធិបតេយ្យជាបន្តទៀត។

ជាថ្មីម្តងទៀត ក្រសួងរ៉ែ និងថាមពល អំពាវនាវឱ្យប្រជាពលរដ្ឋចូលរួមសហការណ៍ជាមួយក្រសួង តាមរយៈការរាយការណ៍ពីរាល់សកម្មភាពសង្ស័យនៃការធ្វើអាជីវកម្មរ៉ែអនាធិបតេយ្យនានា តាមរយៈខ្សែទូរស័ព្ទលេខ ០៩៥ ៧២ ៧៧ ២៧៕