ព័ត៌មានជាតិ

អាជ្ញាធរខណ្ឌសែនសុខ យកចិត្តទុកដាក់ពីបញ្ហាកកស្ទះប្រព័ន្ធលូក្នុងមូលដ្ឋាន នារដូវវស្សា

បានផុស

២ years មុន

នៅ

ថ្ងៃសុក្រ ១៩ កក្កដា ២០២៤

ដោយ

ក្រោយទទួលដំណឹងពីប្រជាពលរដ្ឋអំពីបញ្ហាកកស្ទះប្រព័ន្ធលូមួយខ្សែ ក្នុងមូលដ្ឋានសង្កាត់ទឹកថ្លា ជាក់ស្ដែងនៅព្រឹកថ្ងៃទី ១៩ ខែកក្កដា ឆ្នាំ ២០២៤ លោក ម៉ូវ ម៉ានិត អភិបាល នៃគណៈអភិបាលខណ្ឌសែនសុខ បានចាត់ឲ្យមន្ត្រីក្រោមឱវាទ ដោយមានការចូលរួមពីលោកមេភូមិចុងថ្នល់ខាងលិច ដឹកនាំកម្លាំង ចុះស្តារបូមប្រព័ន្ធលូ ដើម្បីសម្រួលដល់ចរន្តទឹកហូរដែលរងការកកស្ទះដោយសារសំរាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ូវ ម៉ានិត បានឲ្យដឹងថា ក្រោយទទួលបានព័ត៌មាននេះ លោកបានចាត់ចែងទៅមន្ត្រីជំនាញ ដើម្បីចេញរថយន្តបូមលូចុះស្តារបូមប្រព័ន្ធលូមួយនេះ។

លោកបន្តថា ទីតាំងខាងលើ ជាចំណុចទាបជាងនីវ៉ូទឹក ហើយលំហូរទឹកឆ្ងាយពីប្រព័ន្ធប្រឡាយទឹក ជាហេតុធ្វើឲ្យផ្លូវមួយខ្សែនេះមានការស្ទះ នារដូវវស្សា តែទោះជាយ៉ាងណា លោក នឹងបន្តធ្វើបែបនេះឲ្យបានញឹកញាប់តាមតែអាចធ្វើបាន។

គួរបញ្ជាក់ថា ប្រព័ន្ធផ្លូវលូមួយខ្សែ ប្រវែងប្រមាណជាង ១០០ ម៉ែត្រ ត្រូវបានកកស្ទះ និងជន់លិច នារដូវវស្សា ក្រោយភ្លៀង ៣ ទៅ ៤ ថ្ងៃ ឬ ឈានដល់មួយសប្ដាហ៍ក៏មាន ដែលតាមស្ថានភាពទឹកភ្លៀង ទីតាំងនេះស្ថិតនៅខាងលិចក្បែររបងវិទ្យាស្ថានពហុបច្ចេកទេស ព្រះកុសុមៈ ស្ថិតក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ។

ប្រជាពលរដ្ឋរស់នៅតាមបណ្ដោយផ្លូវខាងលើបានឲ្យដឹងថា ប្រព័ន្ធលូនៅទីនេះ រងការខូចខាតស្ទើរទាំងស្រុងទៅហើយ ចំពោះរដូវវស្សា មិនថាភ្លៀងតិច ឬ ខ្លាំង ដឹងតែជន់លិច បើភ្លៀងខ្លាំងវិញទឹកលិចត្រឹមក្បាលជង្គង់ ហើយមិនងាយស្រកនោះទេ ៤ ទៅ ៥ ថ្ងៃ ឯណោះ ព្រោះប្រព័ន្ធលូតូច មិនងាយរំដោះទឹកចេញទាន់ ម្យ៉ាងទៀតលូក៏ខូចខាតច្រើន សំរាម និងភក់ណែន។

ប្រជាពលរដ្ឋ ក៏បានសំណូមពរដល់ លោកអភិបាលខណ្ឌ និង លោក ឃួង ស្រេង អភិបាលរាជធានីភ្នំពេញ មេត្តាជួយផ្លាស់ប្ដូរប្រព័ន្ធលូឲ្យមានមុខកាត់ធំជាងមុន ដើម្បីឲ្យបរិមាណទឹកអាចហូរបានច្រើនទាន់ពេលវេលា មិនបង្កជាការជន់លិចផ្ទះប្រជាពលរដ្ឋ៕

អត្ថបទ ៖ សំណាង