រដ្ឋបាលខេត្តតាកែវ កំពុងស្ថាបនា សួនតេជោសន្តិភាព ដើម្បីទាក់ទាញពលរដ្ឋមកកម្សាន្ដ

ឆាប់ៗនេះ សមិទ្ធិផលថ្មីក្នុងក្រុងដូនកែវ ខេត្តតាកែវ នឹងលេចរូបរាងឡើងនៅជ្រុងខាងលិចឈាងខាងត្បូងបឹងតាកែវ ស្របសួនច្បារមុខមន្ទីរអប់រំយុវជននិងកីឡាខេត្ត គឺសួនតេជោសន្តិភាព។

បន្ថែមលើសួនច្បារដែលបានស្ថាបនារួចរាល់ស្ថាពរមាន៣ទីតាំង សមិទ្ធិផលថ្មីបន្ថែមមួយទៀតត្រូវបានរដ្ឋបាលខេត្តតាកែវ កំពុងស្ថាបនាឡើង ជាកន្លែងលម្អក្រុងផង សម្រាប់ប្រជាពលរដ្ឋដើរកម្សាន្តលំហែរអារម្មណ៍ និងហាត់ប្រាណផងដែរ។

តាមលិខិតរបស់ក្រសួងធនធានទឹក និងឧតុនិយម ចុះថ្ងៃទី១២ ខែកុម្ភៈ ឆ្នាំ២០២៤ បញ្ជាក់ថា សំណើរសុំកាត់ឆ្វៀល​ពីដីសាធារណៈរបស់រដ្ឋ មកជាដីឯកជនរបស់រដ្ឋ ដើម្បីរៀបចំសាងសង់ សួនតេជោសន្តិភាព ដែលមានទីតាំងស្ថិតនៅខាងលិចសួនច្បារតាមបណ្តោយមាត់បឹងតាកែវ ទល់មុខមន្ទីរអប់រំយុវជននិងកីឡាខេត្ត ទំហ៊ំ៣៨,៣៩២ម៉ែត្រការ៉េ ត្រូវបានយល់ព្រមសម្រេចតាមសំណើររបស់រដ្ឋបាលខេត្តតាកែវ។

សូមបញ្ជាក់ថា គិតមកដល់ថ្ងៃទី២ ខែសីហា ឆ្នាំ២០២៤នេះ គម្រោងសាងសង់សួន តេជោសន្តិភាព បាននិងកំពុងចាក់ដីទ្រាប់បាតគ្រិះបំពេញបង្ហាប់ បន្ទាប់ពីការបើកការសាងជិត២ខែមកហើយ៕

អត្ថបទ៖ វីរៈ