ព័ត៌មានជាតិ

អាជ្ញាធរខេត្ត និងមន្ត្រីសុរិយោដីខេត្តតាកែវ ចុះចែកបណ្ណកម្មសិទ្ធិដីធ្លី ជាង ៥០០ បណ្ណ នៅស្រុកបូរីជលសារ

បានផុស

១០ ខែ មុន

នៅ

ថ្ងៃព្រហស្បតិ៍ ២២ សីហា ២០២៤

ដោយ

នៅព្រឹកថ្ងៃទី ២២ ខែសីហា ឆ្នាំ ២០២៤ នេះ លោក លី សាវ៉េត អភិបាលរងខេត្តតាកែវ បានចុះចែកវិញ្ញាបនបត្រសម្គាល់ម្ចាស់អចលនវត្ថុ បណ្ណកម្មសិទ្ធិ ជូនប្រជាពលរដ្ឋ ចំនួន ៥៤៥ បណ្ណ រស់នៅភូមិកំពង់អំពិល ស្រុកបូរីជលសារ ខេត្តតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុវត្តតាមកម្មវិធីនយោបាយរបស់រាជរដ្ឋាភិបាល អាជ្ញាធរខេត្តតាកែវ និង មន្ទីរជំនាញ បានខិតខំពន្លឿនចុះវាស់វែងប្រមូលទិន្នន័យក្បាលដីធ្វើការចុះបញ្ជីដីធ្លីមានលក្ខណៈជាប្រព័ន្ធជូនប្រជាពលរដ្ឋនៅតាមបណ្ដាក្រុង-ស្រុក ទាំង ១០ និងពន្លឿនការចេញវិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋស្របទៅតាមគោលនយោបាយរបស់រាជរដ្ឋាភិបាលកម្ពុជាបច្ចុប្បន្ន ដែលមានការយកចិត្តទុកដាក់ខ្ពស់លើកំណែទម្រង់ដីធ្លី។

យោងតាមរបាយការណ៍របស់ លោក នួន សុធា ប្រធានមន្ទីរស្ដីទី នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តតាកែវ បានឱ្យដឹងថា សម្រាប់ការចែកបណ្ណ ថ្ងៃនេះ មានចំនួន ៥៤៥ បណ្ណ ក្នុងនោះអំណោយពីរដ្ឋមាន ២១៧ បណ្ណ និង បណ្ណមានប្រភពពីអំណោយសន្តតិកម្ម ៣២៨ បណ្ណ នៅភូមិកំពង់អំពិល ស្រុកបូរីជលសារ ខេត្តតាកែវ។

មានមតិសំណេះសំណាលជាមួយប្រជាពលរដ្ឋនាឱកាសនោះ លោក លី សាវ៉េត អភិបាលរងខេត្ត បានលើកឡើងថា ដោយអនុវត្តតាមកម្មវិធីនយោបាយរាជរដ្ឋាភិបាល ក្រោមការដឹកនាំដ៏ប៉ិនប្រសប់របស់ សម្ដេចតេជោ ហ៊ុន សែន អតីតនាយករដ្ឋមន្ត្រី និងការដឹកនាំប្រកបដោយគតិបណ្ឌិតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា រាជរដ្ឋាភិបាលបច្ចុប្បន្ន មានការយកចិត្តទុកដាក់ខ្ពស់លើកំណែទម្រង់វិស័យដីធ្លី ពិសេសបានជំរុញ និងដាក់ចេញនូវគោលការណ៍សំខាន់ៗ ដល់អាជ្ញាធររាជធានី-ខេត្ត ដើម្បីពន្លឿនការចេញបណ្ណកម្មសិទ្ធិជូនពលរដ្ឋនៅក្នុងមូលដ្ឋានរបស់ខ្លួនឱ្យបានឆាប់រហ័សបំផុត ដើម្បីពួកគាត់បានយកទៅប្រើប្រាស់ ក៏ដូចជាទាញផលប្រយោជន៍ពីវិស័យដីធ្លីនេះ។

លោក លី សាវ៉េត បានធ្វើការផ្ដាំផ្ញើទៅកាន់ប្រជាពលរដ្ឋទាំងអស់ សូមជឿជាក់លើការដឹកនាំរបស់ប្រមុខរាជរដ្ឋាភិបាល ដែលមាន សម្តេចធិបតី ហ៊ុន ម៉ាណែត ជានាយករដ្ឋមន្ត្រី និងបន្តចូលរួមថែរក្សាសុខសន្តិភាពដែលមានបច្ចុប្បន្នឱ្យនៅគង់វង្សសម្រាប់កូនចៅជំនាន់ក្រោយ។

ជាមួយនេះ លោកក៏បានស្នើដល់ប្រជាពលរដ្ឋ ចូលរួមផ្សព្វផ្សាយនូវទិដ្ឋភាព នៃការអភិវឌ្ឍមូលដ្ឋានរបស់ខ្លួន ក្រោមម្លប់ នៃសុខសន្តិភាព ទៅកាន់ពិភពលោក តាមមធ្យោបាយនានាដែលអាចធ្វើបាន រួមគ្នាផ្សព្វផ្សាយពីផលប្រយោជន៍ នៃគម្រោងអភិវឌ្ឍន៍របស់រាជរដ្ឋាភិបាល ដែលមានគម្រោងព្រែកជីកហ្វូណនតេជោ និងចូលរួមគាំទ្រកិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA)៕

អត្ថបទ ៖ វីរៈ