ព័ត៌មានជាតិ

ស្ពានដីឥដ្ឋ-ថ្មគរ នៅកៀនស្វាយឆ្លងទន្លេភ្ជាប់ទៅផ្លូវល្បឿនលឿនភ្នំពេញបាវិត ចាប់ផ្តើមចុះគ្រឿងចក្របើកការដ្ឋានសាងសង់

បានផុស

៧ ខែ មុន

នៅ

ថ្ងៃសៅរ៍ ៣០ វិច្ឆិកា ២០២៤

ដោយ

ពិធីសូត្រមន្តសុំម្ចាស់ទឹកម្ចាស់ដី ម្ចាស់ព្រៃព្រឹក្សា បានរៀបចំឡើងដើម្បីផ្តើមដំណើរការការងារវិស្វកម្មការដ្ឋានសាងសង់ស្ពានដីឥដ្ឋ-ថ្មគរ ស្ថិតក្នុងឃុំដីឥដ្ឋ ស្រុកកៀនស្វាយ និងឃុំថ្មគរ ស្រុកល្វាឯម ខេត្តកណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរៀបចំពិធីសូត្រមន្តសុំម្ចាស់ទឹកម្ចាស់ដី ម្ចាស់ព្រៃព្រឹក្សាទៅតាមប្រពៃណី ទំនៀមទំលាប់ បានធ្វើឡើងកាលពីថ្ងៃទី ២៩ ខែវិច្ឆិកា ឆ្នាំ២០២៤ ដោយមានការចូលរួមពីលោក សូរ វ៉ិចទ័រ រដ្ឋលេខាធិការក្រសួងសាធារណការនិងដឹកជញ្ជូន និងជាប្រធានគ្រប់គ្រងគម្រោង រួមទាំងមន្ត្រីពាក់ព័ន្ធ អាជ្ញាធរមូលដ្ឋាន និងក្រុមហ៊ុនសាជីវកម្មស្ពាន និងថ្នល់ចិន (CRBC)តំណាងក្រុមហ៊ុនទីប្រឹក្សាបច្ចេកទេសក្វាងចូវ វ៉ានអាន។

ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) ដែលចាប់ផ្តើមបើកការដ្ឋានសាងសង់នេះ មានទីតាំងស្ថិតនៅភាគអាគ្នេយ៍នៃរាជធានីភ្នំពេញ តភ្ជាប់ត្រើយខាងលិចនៃមហាវិថី ស៊ី ជីនពីង និងត្រើយខាងកើតជាមួយផ្លូវល្បឿនលឿនភ្នំពេញ-បាវិត។

ថ្លែងនៅចំពោះមុខពលរដ្ឋនិងក្រុមហ៊ុននៅក្នុងថ្ងៃបើកការដ្ឋានសាងសង់ស្ពានឆ្លងកាត់ទន្លេមេគង្គ (ដីឥដ្ឋ-ថ្មគរ) និងផ្លូវល្បឿនលឿនភ្នំពេញបាវិតកាលពីថ្ងៃទី៧ ខែមិថុនា ឆ្នាំ២០២៣ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា បានណែនាំឲ្យក្រុមហ៊ុនសាងសង់ធ្វើយ៉ាងណាត្រូវជំរុញដំណើរការសាងសង់ស្ពាននិងផ្លូវត្រូវឱ្យរួចរាល់ដំណាលគ្នា ហើយប្រសិនបើការដ្ឋានស្ពានសាងសង់រួចមុនគឺកាន់តែល្អ ព្រោះប្រជាជននឹងឆាប់បានធ្វើដំណើរឆ្លងកាត់ដោយមិនចាំបាច់ឆ្លងទូកដរដូចមុនទៀត។

ប្រមុខដឹកនាំកម្ពុជាបានបន្តថា ដំបូងឡើយការសាងសង់ស្ពានឆ្លងកាត់ទន្លេមេគង្គក្រោម (កៀនស្វាយ-ល្វាឯម) ភ្ជាប់ទៅផ្លូវល្បឿនលឿនភ្នំពេញ-បាវិត តម្រូវឱ្យពលរដ្ឋឆ្លងត្រូវបង់ថ្លៃធ្វើដំណើរទាំងនៅលើស្ពានទាំងនៅលើផ្លូវ ប៉ុន្តែដោយសារគិតគូរដល់ជីវភាពប្រជាពលរដ្ឋ រាជរដ្ឋាភិបាលក៏បានបញ្ចេញថវិកាជាតិប្រមាណ ២៣០ លានដុល្លារ ចេញថ្លៃសាងសង់ស្ពាន ដើម្បីឱ្យប្រជាពលរដ្ឋអាចធ្វើដំណើរដោយមិនចាំបាច់បង់ថ្លៃឆ្លងស្ពាននោះឡើយ។

សម្តេចបញ្ជាក់យ៉ាងដូច្នេះថា «បើឲ្យក្រុមហ៊ុនទទួលបន្ទុកចំណាយសាងសង់ទាំងផ្លូវនិងស្ពាន គឺពលរដ្ឋត្រូវបង់ថ្លៃធ្វើដំណើរទាំងប្រើប្រាស់ផ្លូវនិងស្ពាន។ អីចឹងរដ្ឋាភិបាលសុខចិត្តបញ្ចេញប្រាក់វិនិយោគសាងសង់ស្ពានដោយខ្លួនឯង បញ្ចៀសការយកលុយពីពលរដ្ឋក្នុងការធ្វើដំណើរឆ្លងកាត់ស្ពាន»៕