អបអរសាទរ! ក្រមាក្នុងប្រពៃណីខ្មែរត្រូវបាន UNESCO ដាក់បញ្ចូលជាសម្បត្តិបេតិកភណ្ឌអរូបី នៃមនុស្សជាតិ

ក្រមាក្នុងប្រពៃណីខ្មែរ ត្រូវបានអង្គការយូណេស្កូ ដាក់បញ្ជូលជាសម្បត្តិបេតិកភណ្ណអរូបី នៃមនុស្សជាតិ។ ការសម្រេចនេះធ្វើឡើងក្នុងកិច្ចប្រជុំលើកទី១៩ របស់គណៈកម្មាការអន្តររដ្ឋាភិបាលដើម្បីការការពារបេតិកភណ្ឌវប្បធម៌អរូបីរបស់អង្គការយូណេស្កូ រៀបចំឡើងនៅទីក្រុងអាសង់ស្យុង ប្រទេសប៉ារ៉ាហ្គាយ នាថ្ងៃទី០៤ ខែធ្នូ ឆ្នាំ២០២៤ នេះ។

ទម្រាំត្រូវបានអង្គការយូណេស្កូ ដាក់បញ្ជូលក្រមាខ្មែរជាសម្បត្តិបេតិកភណ្ណអរូបី នៃមនុស្សជាតិ ក្រសួងវប្បធម៌ និងវិចិត្រសិល្បៈ បានខិតខំធ្វើកិច្ចការងារជាច្រើនជាមួយភាគីពាក់ព័ន្ធអស់រយៈពេលជាង៣ឆ្នាំ ដោយបានស្រាវជ្រាវ ចងក្រងឯកសារ រៀបចំកិច្ចប្រជុំជាមួយអ្នកភូមិ អ្នកត្បាញក្រមា អ្នកប្រើប្រាស់ក្រមា អ្នកសិក្សាស្រាវជ្រាវ និងភាគីពាក់ព័ន្ធដទៃទៀត នៅក្នុងខេត្តសៀមរាប ក៏ដូចជាការបើកសិក្ខាសាលាផ្សេងទៀត។

សូមរម្លឹកថា កាលពីថ្ងៃទី០១ ខែកក្កដា​ ឆ្នាំ២០១៨  ក្រមាប្រវែង១០០០ម៉ែត្រ ដែល​ក្រុមការងារGOGO Cambodia រៀបចំឡើងដោយប្រមូលផ្ដុំអ្នកត្បាញរាប់ពាន់នាក់ រយៈពេល៥ខែ ត្រូវបានជាប់ក្នុងកំណត់ត្រាពិភពលោក Guinness World Records។​

គួរឱ្យដឹងដែរថា កាលពីថ្ងៃទី២៨ ខែកុម្ភៈ ឆ្នាំ២០២៣ ថៃក៏បានបង្ហើបគម្រោងស្នើសុំចុះក្រមា (Multifunctional Clothes In Thai Life) ទៅក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូផងដែរ៕