រដ្ឋមន្ត្រីសុខាភិបាល ណែនាំដល់មន្ត្រីត្រូវប្រកាន់ខ្ជាប់នូវ បី«ពេញ»ដើម្បីអនុវត្តការងារទទួលបានប្រសិទ្ធភាព

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលបានណែនាំដល់ថ្នាក់ដឹកនាំ និងមន្ត្រីសុខាភិបាលទាំងអស់
ត្រូវប្រកាន់ខ្ជាប់នូវ បី«ពេញ» ដើម្បីអនុវត្តការងារទទួលបានប្រសិទ្ធភាព និងជោគជ័យសំដៅចូលរួមលើកកម្ពស់វិស័យសុខាភិបាលឱ្យកាន់តែរីកចម្រើនបន្ថែមទៀត។

លោករដ្ឋមន្ត្រីបានលើកឡើងបែបនេះកាលពីរសៀលថ្ងៃទី២៤ធ្នូ ក្នុងឱកាសធ្វើបទបាឋកថាក្នុងវគ្គភាពជាអ្នកដឹកនាំ និងនវានុវត្តន៍ ជូនថ្នាក់ដឹកនាំ និងមន្រ្តីសុខាភិបាលគ្រប់ឋានានុក្រមក្រោមឱវាទក្រសួងសុខាភិបាលតាមប្រព័ន្ធវីដេអូ
សន្និសីទ (Zoom) ដែលមានសមាសភាពចូលរួមសរុបចំនួន ៤,២៥៣ នាក់។

លោករដ្ឋមន្រ្តីបានមានប្រសាសន៍ថា បី«ពេញ» ដែលថ្នាក់ដឹកនាំ និងមន្ត្រីត្រូវប្រកាន់ខ្ជាប់រួមមាន(១)ពេញជាសមត្ថភាពការងារ (២)ពេញម៉ោងការងារ (៣)ពេញនៃការទទួលខុសត្រូវក្នុងការបំពេញការងារ។ ជាមួយគ្នានេះដែរ លោករដ្ឋមន្រ្តី បានធ្វើបទបាឋកថាលើប្រធានបទ ការបង្កើនសមិទ្ធិផលការងារ (Performance) របស់បុគ្គលក្រុមការងារក្នុងវិស័យសុខាភិបាល ដោយប្រើប្រាស់ព័ត៌មានត្រឡប់ដើម្បីឱ្យបុគ្គលអាចកែប្រែ ឬអភិវឌ្ឍន៍ខ្លួនឱ្យទទួលបានលទ្ធផលពេញលេញ។

បន្ថែមពីលើនេះ លោករដ្ឋមន្ត្រី ក៏បានលើកយកភាពខុសគ្នារវាង Mentoring (ចង្អុលបង្ហាញ) និង Coaching (បង្ហាត់បង្ហាញ)។ លោករដ្ឋមន្ត្រីបានឆ្លៀតយកឱកាសមុនដំណាច់ឆ្នាំ២០២៤នេះ ប្រកាសទទួលស្គាល់ការខិតខំប្រឹងប្រែងរបស់មន្រ្តីសុខាភិបាលទាំងអស់ជាពិសេសក្នុងឆ្នាំ២០២៤ ដោយបានបង្ហាញនូវការឯកភាពក្នុងវិស័យ និងការចុះសម្រុងគ្នាក្នុងការខិតខំកែរលំអសេវាសុខាភិបាលដើម្បីឆ្លើយតបទៅនឹងតំរូវការរបស់ប្រជាជនក៍ដូចជាការលើកកំពស់តម្លៃរបស់វិជ្ជាជីវៈសុខាភិបាល។

នៅក្នុងសប្តាហ៍នេះ ក៏មានបទបង្ហាញពីការធ្វើ PDIA សម្រាប់ការដោះស្រាយភាពមិនពេញចិត្តរបស់អតិថិជនលើការរងចាំទទួលសេវានៅមន្ទីរពេទ្យបង្អែកបាកាន ខេត្តពោធិ៍សាត់៕

អត្ថបទ៖ សំអឿន