អភិបាលខេត្តកំពង់ចាម ចុះពិនិត្យការសាង​សង់​ទប់ច្រាំងទន្លេបាក់​នៅខាងក្រោយវត្តមាន់ដប់

អភិបាលខេត្តកំពង់ចាម លោក អ៊ុន ចាន់ដា នៅថ្ងៃទី ១៩ ខែមករា ឆ្នាំ ២០២៥ បានដឹកនាំក្រុមការងារចុះពិនិត្យការ​សាង​សង់ទប់ស្កាត់កុំឲ្យបាក់ច្រាំងទន្លេបន្តទៀត នៅចំណុចក្រោយវត្តមាន់ដប់ ស្ថិតក្នុងភូមិមាន់ដប់ ឃុំមានជ័យ ស្រុកស្រីសន្ធរ​។

លោកអភិបាលខេត្តបានបញ្ជាក់ថា ការងារសាងសង់ទប់ស្កាត់ការបាក់ច្រាំងទន្លេនេះ គឺខាងក្រុមការងារបច្ចេកទេស របស់ក្រសួងធនធានទឹក និងឧតុនិយម បានចុះមកធ្វើការងារនេះដោយផ្ទាល់ចាប់តាំងពីចុង ខែធ្នូ ឆ្នាំ២០២៤ ដោយសហការជាមួយ អាជ្ញាធរខេត្តកំពង់ចាម បន្ទាប់ពីមានការស្នើសុំនិងសំណូមពរ ឲ្យមានកិច្ចអន្តរាគមន៍ពីខេត្ត ទៅលោករដ្ឋមន្ត្រីក្រសួងធនធានទឹក ទើបឈានឲ្យមានការសាងសង់នោះ។

បើតាមលោក អ៊ុន ចាន់ដា ការសាងសង់ដើម្បីទប់ស្កាត់ការបាក់ច្រាំងទន្លេ ស្ថិតនៅចំណុចក្រោយវត្តមាន់ដប់ បាន​សាងសង់​រួចរាល់ជាស្ថាពរហើយ។ ក្រុមការងារបច្ចេកទេសបានប្រើវិធានការច្រកបាវខ្សាច់ ទប់ច្រាំងទន្លេកន្លែងដែលបាក់ ដែលមានប្រវែងជាង ២០០ ម៉ែត្រ។

ជាមួយគ្នានេះ អាជ្ញាធរមូលដ្ឋាននៅ​បន្ត​ធ្វើការតាមដាន ក្រែងមានការប្រែប្រួលនៅឆ្នាំបន្ទាប់ ដែល​អាច​ឲ្យ​ក្រុមការងារបច្ចេកទេសមានវិធានការបន្តទៀត ដោយសារតំបន់នេះចរន្តទឹកមានការប្រែប្រួល ទៅតាមស្ថានភាពជំនន់ទឹកទន្លេឡើងតិចឬច្រើន។

លោកអភិបាលខេត្តបានបញ្ជាក់ថា បច្ចុប្បន្នក្រុមការងារបច្ចេកទេសរបស់ក្រសួងធនធានទឹក និងឧតុនិយម បានប្ដូរទីតាំងទៅ​​មើលកន្លែងផ្សេងទៀតក្នុងភូមិសាស្ត្រខេត្តកំពង់ចាមទៅតាមផែនការ ដែលអាជ្ញាធរខេត្តបានពិភាក្សានិងព្រមព្រៀងគ្នាជាមួយ​ក្រសួង៕

អត្ថបទ​៖ ​ឡេក​ ចាន់ពេជ្រ​