ព្រឹកនេះ សម្តេចតេជោ អញ្ជើញពិនិត្យមើលការជួសជុលកែលម្អស្តូប ព្រះបរមរតនកោដ្ឋ

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជានាព្រឹកថ្ងៃ១៩ខែមីនា ២០២១នេះនឹងអញ្ជើញពិនិត្យមើលការជួសជុលកែលម្អស្តូប ព្រះបរមរូបព្រះបរមរតនៈកោដ្ឋ ព្រះមហាវិរក្សត្រ ព្រះបាទនរោត្តម សីហនុ។

ការជួសជុលកែលម្អស្តូបព្រះបរមរតនៈកោដ្ឋ រហូតមកដល់ពេលនេះសម្រេចបានប្រមាណ៩៥ភាគរយ ហើយ​គ្រោងឲ្យ រួចរាល់នៅចុងខែមីនានេះ។

អភិបាលរាជធានីភ្នំពេញ លោក ឃួង ស្រេង បានឲ្យដឹងថា រដ្ឋបាលរាជធានីបានជួសជុល និងថែទាំជាប្រចាំ ព្រមទាំងប្រារព្ធពិធីថ្វាយកុសលឧទ្ទិសដល់ដួងព្រះវិញ្ញាណក្ខ័ន្ធ ព្រះករុណាព្រះបាទសម្តេចព្រះនរោត្តម សីហនុ ព្រះបរមរតនៈកោដ្ឋជារៀងរាល់ឆ្នាំ។

លោកអភិបាលរាជធានី ភ្នំពេញបានឲ្យដឹងទៀតថា ការជួសជុលកែលម្អនេះមានដូចជា ដំបូល ពិដាន លាបក្បាច់ពណ៌ ទឹកមាស ផ្នែកខាងលើព្រះបរមរូប ជួសជុលជើងទម្រថ្មម៉ាប និងថ្មភ្នំ រួមទាំងការថែទាំសួនច្បារ រៀបចំប្រព័ន្ធបាញ់ទឹកជាថ្មី ឡើងវិញរួមទាំងការកាប់ដើមក្ងោកចាស់ៗដែលពុកផុយរួច ដាំជាថ្មីឡើងវិញផងដែរ៕

អត្ថបទ៖ណារី