ក្រសួងការងារ ណែនាំ​ នាយក​សហគ្រាស, គ្រឹះស្ថាន​ និង​កម្មករនិយោជិត ឱ្យអនុវត្តន៍​វិធានការណ៍​សុខាភិបាល ដើម្បីកាត់បន្ថយ​ជំងឺមិនឆ្លង​

ភ្នំពេញ ៖ នាថ្ងៃទី២៦ ខែកុម្ភៈ ឆ្នាំ២០២៥នេះ ក្រសួងការងារ និងបណ្ដុះបណ្តាលវជ្ជជីវៈ បានចេញសេចក្តីណែនាំ ស្តីពី​ការ​លើក​កម្ពស់​ឥរិយាបថ​រស់នៅប្រកបដោយសុខុមាលភាពរបស់កម្មករនិយោជិត នៅតាមសហគ្រាស គ្រឹះសា្ថន ដោយតម្រូវឱ្យអនុវត្តន៍វិធានការណ៍សុខាភិបាល ដើម្បី​កាត់បន្ថយ កត្តាហានិភ័យចម្បង នៃជំងឺមិនឆ្លង រួមមាន ជំងឺបេះដូងសរសៃឈាម ជំងឺទឹកនោមផ្អែម ជំងឺមហារីក និងជំងឺផ្លូវដង្ហើមរ៉ាំរ៉ៃ។

ម្ចាស់, ឬ នាយកសហគ្រាស គ្រឹះស្ថាន និងកម្មករនិយោជិតទាំងអស់​ ត្រូវ​អនុវត្ត​វិធានការណ៍សុខាភិបាល​ដូច​ខាង​ក្រោម៖

ទី១– ម្ចាស់ ឬ នាយកសហគ្រាស គ្រឹះស្ថាន 

-ត្រូវ​រៀប​ចំ​ឱ្យមានការផ្តល់សេវាពិនិត្យ និង​ព្យាបាល​បឋម​នៅ​តាមសហគ្រាស គ្រឹះស្ថាន សម្រាប់ កម្មករនិយោជិតរបស់ខ្លួន

-ជំរុញការបណ្ដុះបណ្តាល និង​អប់រំ​ដល់កម្មករនិយោជិត​អំពី​ភាព​ចាំ​បាច់​នៃឥរិយាបថរស់​នៅ​ប្រកប ដោយសុខុមាលភាព ដើម្បីអាចចជៀសផុតពីជំងឺមិនឆ្លងដែលបណ្តាលមកពីរបបអាហារគ្មាន សុខុមាលភាព កង្វះសកម្មភាពរាងកាយរាប់បញ្ចូលទាំងការធ្វើលំហាត់ប្រាណ ការប្រើប្រាស់ ផលិតផលថ្នាំជក់ និងការប្រើប្រាស់គ្រឿងស្រវឹងប្រកបដោយគ្រោះថ្នាក់

​-ចាក់​ផ្សាយសារសំឡេង ឬវីដេអូអប់រំ និងបិទផ្សាយផ្ទាំងព័ត៌មានអំពីវិធានការបង្ការជំងឺមិនឆ្លង នានា​នៅ​តាមទីតាំងដែលកម្មករនិយោជិតងាយមើលឃើញ ស្តាប់ឮ និងអានបាន ដូចជា នៅតាម ច្រកចេញ-ចូល ឬនៅក្នុងអគារផលិតកម្ម បន្ទប់ប្រជុំ គិលានដ្ឋាន អាហារដ្ឋាន ឬកន្លែងបរិភោគ អាហារជាដើម 

-ត្រូវផ្ដល់ភេសជ្ជៈអនាម័យឱ្យបានគ្រប់គ្រាន់ដល់កម្មករនិយោជិត និងត្រូវហាមឃាត់ដាច់ខាតការយក ចូល​ទី​កន្លែង​ធ្វើការ ឬផ្តល់ឱ្យកម្មករនិយោជិតក្នុងម៉ោងធ្វើការ​នូវភេសជ្ជៈមានជាតិស្រវឹង

-ចាត់​វិធានការតាមដានស្ថានភាពសុខុមាលភាពរបស់កម្មករនិយោជិតជាប្រចាំ និងលើកទឹកចិត្តឱ្យ កម្មករនិយោជិត ប្រកាន់យកឥរិយាបថរស់នៅប្រកបដោយសុខុមាលភាព ដូចជាការអនុវត្តរបប អាហារសុខភាព ធ្វើសកម្មភាពរាងកាយឱ្យបានគ្រប់គ្រាន់ ជៀសវាងការប្រើប្រាស់ផលិតផលថ្នាំជក់ និងកាត់បន្ថយការប្រើប្រាស់គ្រឿងស្រវឹងប្រកបដោយគ្រោះថ្នាក់។

ទី២–កម្មករនិយោជិត 

-អនុវត្តឱ្យបានខ្ជាប់ខ្ជួននូវវិធានការសុវត្ថិភាព និងសុខភាពការងារផ្នែកឥរិយាបថការងារ និង 

វិធានការសុខាភិបាលស្ដីពីឥរិយាបថរស់នៅប្រកបដោយសុខុមាលភាព 

-អនុវត្តរបបអាហារសុខភាព ដោយត្រូវកាត់បន្ថយការប្រើប្រាស់អំបិល (រួមទាំង ទឹកត្រី ទឹកស៊ីអីវ ប្រហុក ផ្អក កាពិ ប៊ីចេង ម្សៅស៊ុប ប្រេងខ្យង), ស្ករ, ខ្លាញ់ (ខ្លាញ់សត្វ ឬខ្លាញ់កែច្នៃ) ឬប្រេង នៅពេលចម្អិន ឬពេលបរិភោគអាហារ 

-កាត់បន្ថយការទទួលទានអាហារដែលមានជាតិប្រៃ ដូចជាគ្រឿងជ្រក់ ឬត្រាំ សាច់ក្រក ទឹកប្រហុក ត្រីងៀត និងអាហារផ្អាប់ផ្សេងៗ 

-កាត់បន្ថយការទទួលទានភេសជ្ជៈផ្អែម និងអាហារដែលមានផ្ទុកជាតិស្ករច្រើន កាត់បន្ថយការពិសាគ្រឿងស្រវឹងឱ្យបានជាអតិបរមា 

-ចៀសវាងការប្រើប្រាស់ផលិតផលថ្នាំជក់ ដូចជាបារី បារីអេឡិចត្រូនិច និងស៊ីហ្សាជាដើម ទទួលទានទឹកស្អាតឱ្យបានយ៉ាងតិច ២លីត្រ ក្នុង១ថ្ងៃ 

-ទទួលទានបន្លែ ផ្លែឈើស្រស់ និងគ្រាប់ធញ្ញជាតិ ជំនួសអាហារកញ្ចប់ អាហារទាន់ចិត្ត ឬអាហារ កែច្នៃ ដែលមានជាតិស្ករ អំបិល ខ្លាញ់ ឬប្រេងច្រើន 

-ទទួលទានអាហារមួយចំនួន ដូចជា ស្ងោរ ឬចំហុយ ចៀសវាងអាហារបំពង ចៀន ដែលប្រើប្រាស់ ខ្លាញ់សត្វ ឬខ្លាញ់កែច្នៃ 

-ចូលរួមធ្វើសកម្មភាពរាងកាយឱ្យបានទៀតទាត់ តាមរយៈការលេងកីឡា ដូចជា បាល់ទាត់ វាយសី ឬបាល់បោះ និង/ឬ ការធ្វើលំហាត់ប្រាណជាប្រចាំយ៉ាងហោចណាស់ ៣០នាទី ក្នុង ១ថ្ងៃ ដូចជា ដើរលឿន រត់ ហែលទឹក ជិះកង់ រាំ ការលើកទម្ងន់ ការអាវ៉ង់ យោហ្គាល 

ក្រសួងការងារ និងបណ្តុះបណ្តាលវិជ្ជាជីវៈ មានក្តីសង្ឃឹមយ៉ាងមុតមាំថា ម្ចាស់ ឬនាយកសហគ្រាស គ្រឹះស្ថាន និងកម្មករនិយោជិតទាំងអស់​អនុវត្ត​តាមខ្លឹមសារសេចក្ដីណែនាំខាងលើនេះប្រកបដោយប្រសិទ្ធភាព៕

កែសម្រួលដោយ ៖ នាគព័ន្ធ