ក្រសួងការងារទទួលបានបណ្តឹងអនាមិកជាង​៣៦០ករណី ភាគច្រើនពាក់ព័ន្ធលក្ខខណ្ឌការងារ

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអះអាងថា នៅក្នុងឆ្នាំ២០២៤ ក្រសួងការងារបានទទួលបណ្តឹងអនាមិកជាង៣៦០ករណី ភាគច្រើនពាក់ព័ន្ធនឹងលក្ខខណ្ឌការងារ។

ក្រសួងការងារ និងបណ្តុះបណ្តាលវិជ្ជាជីវៈ បានប្រកាសដាក់ដំណើរការនូវប្រអប់បណ្តឹងអនាមិក សម្រាប់សាធារណជន
កម្មការនិយោជិត និងនិយោជកកាលពីថ្ងៃទី០៩ ខែតុលា ឆ្នាំ២០២៤ ដើម្បីឆ្លើយតបទៅនឹងចម្ងល់ ភាពមិនពេញចិត្ត ការប្តឹង និងសំណូមពរផ្សេងៗ ដែលទាក់ទងនឹងការផ្តល់សេវាសាធារណៈរបស់ក្រសួងដើម្បីបង្ការការឆបោក ឫការមិនទទួលខុសត្រូវរបស់បុគ្គលណាមួយដោយអាចដាក់ពាក្យបណ្តឹងអនាមិកបានតាមរយះគេហទំព័រ ឫការភ្ជាប់តាមរយៈស្កេន QR
Code។ ការដាក់ពាក្យបណ្តឹងអនាមិកពុំតម្រូវឲ្យបង្ហាញអត្តសញ្ញាណរបស់ម្ចាស់បណ្តឹងឡើយ។

លោក ហេង សួរ បានបន្តថា បន្ទាប់ពីដាក់ឱ្យដំណើការប្រអប់បណ្ដឹងអនាមិកសម្រាប់ទទួលបណ្ដឹងនានាពីសាធារណជនតាមរយៈគេហទំព័រ https://feedback.mlvt.gov.kh យើងបានទទួលបណ្ដឹងអនាមិកសរុបចំនួន ៣៦៤បណ្ដឹង ក្នុងនោះមានបណ្ដឹងពាក់ព័ន្ធនឹងលក្ខខណ្ឌការងារ ចំនួន ១៥២ករណី,ហត្ថពលកម្មបរទេស ចំនួន ១៣ករណី, ទេសន្តរប្រវេសន៍ការងារចំនួន ៥ករណី,បេឡាជាតិសន្តិសុខសង្គម ចំនួន ៧៩ករណី, និងការផ្ដល់សេវារបស់ក្រសួង ចំនួន
១៩ករណី៕

អត្ថបទ៖ សំអឿន