ព័ត៌មានជាតិ

ក្រសួងការងារ ធ្វើទំនើបកម្មស្ថាប័ន ដើម្បីពង្រឹងប្រសិទ្ធភាព នៃការផ្តល់សេវាសាធារណៈ

បានផុស

៣ ខែ មុន

នៅ

ថ្ងៃចន្ទ ១០ មីនា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានធ្វើទំនើបកម្មស្ថាប័ន ដើម្បីពង្រឹងប្រសិទ្ធភាព នៃការផ្តល់សេវាសាធារណៈឱ្យកាន់តែប្រសើរឡើងបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងកាលពីពេលថ្មីៗ នេះថា ដើម្បីពង្រឹងប្រសិទ្ធភាព នៃការផ្តល់សេវាសាធារណៈ ក្រសួង បានបន្តលើកកម្ពស់វិធានការគ្រប់គ្រងមន្ត្រីរាជការ និងមន្ត្រីកិច្ចសន្យា ដើម្បីពង្រឹងសមត្ថភាពស្ថាប័ន ពិនិត្យ និងវិភាគមុខងារ រចនាសម្ព័ន្ធឡើងវិញ ស្របតាមវិធានការគន្លឹះក្នុងការជំរុញកំណែទម្រង់រដ្ឋបាលសាធារណៈ និងក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា។

ក្នុងនោះបានបែងចែកវេនបំពេញការងារ និងពង្រឹងរបៀបរបបការងារ ដើម្បីបង្កើន និងធានាប្រសិទ្ធភាពការងារ ដោយវេនទី ១ គឺ ចាប់ពីម៉ោង ៧:០០ នាទីព្រឹក ដល់ម៉ោង ១១:៣០ នាទីព្រឹក , ពេលរសៀលចាប់ពីម៉ោង ១២:៣០ នាទីរសៀល ដល់ ម៉ោង ១៦:០០ នាទីរសៀល , វេនទី ២ គឺ ចាប់ពីម៉ោង ៨:៣០ នាទីព្រឹក ដល់ម៉ោង ១២:០០ នាទីព្រឹក , ពេលរសៀលចាប់ពីម៉ោង ១៣:០០ នាទីរសៀល ដល់ម៉ោង ១៧:៣០ នាទីរសៀល , វេនយប់ចាប់ពីម៉ោង ១៨:០០ នាទីល្ងាច ដល់ម៉ោង ១:០០ នាទីរំលងអធ្រាត្រ ដែលមានបែងចែកឱ្យវេនធ្វើការពី ថ្ងៃចន្ទ រហូតដល់ថ្ងៃសុក្រ និង ពីថ្ងៃពុធ រហូតដល់ថ្ងៃអាទិត្យ។

លោករដ្ឋមន្ត្រី បានបន្តថា ជាមួយគ្នានេះដែរ ក្រសួងបានធ្វើឌីជីថលនីយកម្មការគ្រប់គ្រងវត្តមានតាមរយៈការស្គែនមុខ ផ្អែកតាមបំណែងចែកវេនការងារ និងដាក់ឱ្យអនុវត្តនៅទីស្តីការក្រសួង គ្រឹះស្ថាន អ.ប.វ. សាធារណៈ ក្រោមឱវាទក្រសួង និងមន្ទីរការងារ និងបណ្ដុះបណ្ដាលវិជ្ជាជីវៈ រាជធានី ខេត្ត និងបានជំរុញបរិវត្តកម្មឌីជីថល ដើម្បីធ្វើទំនើបកម្មស្ថាប័ន និងការផ្តល់សេវាសាធារណៈ និងសេវាគាំទ្រទូទៅតាមរយៈការដាក់ឱ្យអនុវត្តថ្នាលបច្ចេកវិទ្យាឌីជីថល ដើម្បីពង្រឹងប្រសិទ្ធភាព នៃការផ្តល់សេវាសាធារណៈរបស់ក្រសួង និងបានដាក់ឱ្យដំណើរការ បញ្ជរសេវាសាធារណៈចល័ត និងបានសហការជាមួយក្រសួងប្រៃសណីយ៍ និងទូរគមនាគមន៍ ក្នុងការបញ្ជូនសារខ្លីពាក់ព័ន្ធ (១) កម្មវិធីអប់រំបណ្ដុះបណ្ដាលជំនាញវិជ្ជាជីវៈ និងបច្ចេកទេស , (២) បេឡាជាតិសន្តិសុខសង្គម , (៣) ឱកាសការងារ , (៤) ការហាមឃាត់ការប្រើប្រាស់ពលកម្មកុមារ , និង (៥) ទេសន្តរប្រវេសន៍ការងារទៅលេខទូរស័ព្ទ (Push Message)៕

អត្ថបទ ៖ សំអឿន